قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى اياسىندا 2018 جىلعى 14 قاراشا ساعات 11.00-دە (استانا ۋاقىتى بويىنشا) رەسپۋبليكا بويىنشا لاتىن گرافيكاسى نەگىزىندەگى «جالپىحالىقتىق ديكتانت» ءوتتى دەپ حابارلايدى.

مادەنيەت جانە سپورت مينيسترلىگىنىڭ اقپاراتى بويىنشا رەسپۋبليكالىق اكسيا ەلىمىزدىڭ بارلىق وڭىرلەرىن قامتيدى جانە وعان شامامەن 2 ملن.قازاقستاندىق قاتىستى. ديكتانت ءبىر ۋاقىتتا رەسپۋبليكا بويىنشا وڭىرلەردەگى تىلدەردى دامىتۋ باسقارمالارى دايىنداعان ارنايى اۋديتوريالاردا وتكىزىلدى.

سونداي-اق قاشىقتىقتان قاتىسۋعا نيەت بىلدىرگەن رەسپۋبليكا تۇرعىندارى ءۇشىن ديكتانتتى تىڭداۋ ساعات 11.00-دە (استانا ۋاقىتى بويىنشا) «قازاق راديوسى»، «شالقار» راديولارىنىڭ تىكەلەي ەفيرىندە جانە emle.kz، tilalemi.kz سايتتارىندا قولجەتىمدى بولدى.

جالپىرەسپۋبليكالىق اكسيا جاڭا قازاق ءالىپبيىن ناسيحاتتاۋعا، لاتىننەگىزدى قازاق ءالىپبيىن پراكتيكالىق تۇرعىدان مەڭگەرۋگە داعدىلاندىرۋعا باعىتتالعان بولاتىن.

شاراعا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى قاتىسىپ، جالپىحالىقتىق ديكتانت قاتىسۋشىلارعا ساتتىلىك تىلەدى.

سونىمەن قاتار جالپىحالىقتىق ديكتانتتى وتكىزۋ باستاماسىن بەلگىلى قوعام قايراتكەرلەرى، جازۋشىلار، عالىمدار، سپورتشىلار، سونىمەن قاتار مادەنيەت جانە ونەر سالاسىنىڭ تۇلعالارى دا قولدادى.

قازاقستان رەسپۋبليكاسى ۇلتتىق اكادەميالىق كىتاپحاناسىندا ديكتانتقا بەلگىلى قوعام قايراتكەرى، اقىن-جازۋشىلار روزا مۇقانوۆا، قونىسباي ءابىلوۆ، قازاقستاندىق ارتىستەر مايرا مۇحامەد قىزى تۇرار الىپبايەۆ، نۇربولات ارزاماس، باقتيار ادامجان، سپورتشىلاردان ۇلان رىسقۇل، سەرىك اقتايەۆ، ايبەك ورالباي، ايگەرىم ءابىلقادىروۆا جانە باسقا دا بەلگىلى مادەنيەت جانە ونەر قايراتكەرلەرى قاتىستى.