الماتىدا، جامبىل اتىنداعى كىتاپحانادا «ماحابباتتىڭ ءمانى» اتتى كىتاپتىڭ تۇساۋكەسەرى ءوتتى. وعان ب ا ق وكىلدەرى، قوعام قايراتكەرلەرى مەن كىتاپتىڭ مازمۇنىنا قىزىققان وقىرمان قاۋىم جينالدى. ات تەرلەرتىپ قازاقستاننىڭ شالعاي وڭىرلەرىنەن ارنايى كىتاپتىڭ تۇساۋكەسەرىنە كەلگەندەر بولدى.

جوبا اۆتورى سانجار كەرىمباي ونشاقتى كىتاپتىڭ ەسكيزى سىزىلىپ، كەزەك كۇتتىرمەيتىن تاقىرىپتار انىقتالىپ قويعانىن، ءبىراق «ماحابباتتىڭ ءمانى تۋرالى جازۋىمىز كەرەك» دەگەن ماسەلە العا شىعىپ كەتكەنىن ايتادى.

- پسيحولوگ، پسيحياتر  ۆيكتور فرانكلدىڭ ءوزى «ەركىندىكتىڭ ءمانى»، «ءولىمنىڭ ءمانى» دەپ جازىپ كەلەدى دە، «ماحابباتتىڭ مانىنە» كەلگەندە تابانداپ تۇرىپ 55 بەت تەك سوعان ارنايدى، - دەپ ماحابباتتىڭ تۇسىندىرمەسىنىڭ قوعام ءۇشىن ماڭىزدىلىعىن تۇسىندىرەدى سانجار كەرىمباي.

كىتاپتىڭ اتاۋىنا قاراپ، ادەتتەگى كوز ۇيرەنگەن، كىتاپ دۇكەن سورەلەرىندە تولىپ تۇرعان «قىزدى قاراتۋدىڭ 99 ءتاسىلى»، «كۇيەۋىڭمەن جاقسى قارىم-قاتىناس ورناتۋدىڭ 10 جولى» سەكىلدى كىتاپتىڭ ءبىر ءتۇرى ەكەن دەپ ويلاپ قالۋىڭىز مۇمكىن. الايدا وندا عىلىمي زەرتتەۋ مەن ماحابباتقا قاتىستى ماسەلەلەردىڭ سەبەبىنە ەمەس، نەگىزىنە كوڭىل بولەدى. وندا قالاي ەمەس، نەگە دەگەن سۇراققا جاۋاپ ىزدەيدى.

 «ماحابباتتىڭ ءمانى» كىتابىن قۇراستىرۋشىلارىنىڭ ءبىرى فيلولوگ، ماگيستر ساكەن  نۇقابەك ۇلىنىڭ ايتۋىنشا، عالىم، ويشىلاردىڭ ماحابباتتىڭ ءمانى تۋرالى جازعان ماتەريالدارىن ىزدەۋ، زەرتتەۋ قيىنعا سوققانىن ايتادى.

- «ماحابباتتىڭ ءمانى» تۋرالى جازامىز «دەگەندە،  ماحاببات تۋرالى تاقىرىپ كوپ. سونى جيناپ بەرسەك بولدى دەپ ويلادىم. اقىندار تەك ماحابباتتى جىرلاعان سەكىلدى، انشىلەردىڭ بارلىعى دەرلىك ماحاببات تۋرالى ءان ايتاتىن سەكىلدى كورىندى. ناقتى اكادەميالىق فۋندامەنتالدى عىلىمعا كەلگەن كەزدە بۇل تاقىرىپتى نىسان رەتىندە تاڭداعان عالىمدار وتە از بولىپ شىقتى. عالىمداردىڭ، ويشىلداردىڭ زەرتتەۋىن سارالاۋعا تۋرا كەلدى، - دەيدى ساكەن نۇرقابەك ۇلى.

جوبا اۆتورى سانجار كەرىمبايدىڭ ايتۋىنشا، ساكەن نۇرقابەك ۇلى كىتاپتىڭ 65-70% جۇمىسىن اتقارعان. تۇراقتى كىرىسى بار جۇمىسىن ىسىرىپ قويىپ، اتالمىش كىتاپتىڭ جۇمىسىنا بىلەك سىبانا كىرىسكەن. ونىڭ ىشىندە باتىس عالىمدارىنىڭ زەرتتەۋىن سارالاپ شىققان.

ودان بولەك كىتاپتىڭ شىعۋىنا اتسالىسقاندار – ادىلبەك ءنابي، ءدىنتانۋشى ماگيستر، مۇحيت تولەگەن، ءدىنتانۋشى PHD دوكتورى.

قۇراستىرۋشىلاردىڭ ايتۋىنشا، كىتاپتا اجىراسۋ، زورلىق، نەكە، نەكەسىز بالا، ماحاببات، تۇسىك، ءسابيدى قوقىسقا تاستاۋ سەكىلدى ءبىرقاتار ماسەلەلەر كوتەرىلەدى. ونىڭ شىعۋ سەبەبى نەدە ەكەنىنە جاۋاپ ىزدەيدى. كىتاپتا تاريحي دەرەكتەر، ستاتيستيكالىق مالىمەتتەر كەزدەسەدى. مۇنىڭ بارلىعى ەكزيستەنسيا ادىسىمەن تالدانعان.