2019 جىلدان باستاپ ەلىمىزدە ۇلتتىق ءبىرىڭعاي تەستىلەۋ قاڭتار، ناۋرىز، ماۋسىم جانە تامىز ايىندا ءتورت مارتە وتكىزىلەتىن بولدى. ءبىلىم جانە عىلىم مينيسترلىگىنىڭ اقپاراتىنا سۇيەنسەك، ۇبت-نىڭ جالپى فورماتى وزگەرمەيدى. قاڭتار، ناۋرىز جانە تامىزداعى تەست جوعارعى وقۋ ورىندارىنا اقىلى بولىمگە تۇسەتىن تۇلەكتەر ءۇشىن وتكىزىلمەك دەپ حابارلايدى Qamshy.kz اقپارات اگەنتتىگى

ۇبت-نى قاڭتاردا تاپسىرعاندار ماۋسىم ايىندا دا تاپسىرا الادى جانە مەملەكەتتىك ءبىلىم بەرۋ گرانتتارىن بەرۋ كونكۋرسىنا قاتىسا الادى.
تالاپكەر ۇبت -نى وزىنە ىڭعايلى كەز-كەلگەن پۋنكتتە تاپسىرا الادى. تەك تەستىلەۋگە قاتىسۋ ءۇشىن ۇبت وتكىزۋ پۋنكتىنە كورسەتىلگەن، ءتيىستى مەرزىمدە ءوتىنىش بەرۋى قاجەت.

ەسكە سالا كەتەيىك، 2018 جىلدان باستاپ ءار تۇلەككە ۇبت سەرتيفيكاتىمەن بىرگە، ءبىلىم بەرۋ باعدارلامالارىنىڭ ءتىزىمى، بولىنگەن گرانتتاردىڭ سانى، سونداي-اق، وتكەن جىلعى گرانتتار كونكۋرسىنىڭ ناتيجەلەرى جازىلعان اقپاراتتىق پاراقشا بەرىلەدى. اتالعان اقپاراتتىق پاراقشا تۇلەككە ءوزىنىڭ بولاشاق ماماندىعىن تاڭداۋ كەزىندە ۇلكەن كومەگىن تيگىزەدى. 

ەسكەرتە كەتەيىك، ۇبت العاش رەت 1999 جىلى ەنگىزىلدى. 2017 جىلعا دەيىن ۇبت ءۇش فۋنكسيانى اتقاردى: 11 جىلدىق وقۋدى اياقتاۋ قورىتىندىسى رەتىندەگى ءبىتىرۋ ەمتيحانى، جوعارى وقۋ ورىندارىنا ءتۇسۋ ەمتيحانى جانە تۇلەكتەرگە مەملەكەتتىك گرانتتاردى تاعايىنداۋ مەحانيزمى. ەندى قورىتىندى اتتەستاتتاۋ نەمەسە ءبىتىرۋ ەمتيحاندارى مەكتەپتەردە وتكىزىلەدى، ال ۇبت – جوعارى وقۋ ورنىنا ءتۇسۋ جانە مەملەكەتتىك گرانتتاردى تاعايىنداۋ ەمتيحانى بولىپ قالىپ وتىر. ۇبت ءبىر كەزەڭنەن تۇرادى جانە 140 بالدىق مەجەمەن باعالانادى. وقۋشىلار ءبىر كۇندە ءۇش مىندەتتى پاننەن (قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى) — ءارقايسىسىندا 20 تاپسىرمادان جانە ەكى بەيىندى پاننەن — ءارقايسىسىندا 30 تاپسىرمادان تەست تاپسىرادى. العاش ەنگىزىلگەنىنە 20 جىل بولعان ءبىلىم سىناعى 2019 جىلى 16-رەت وتكىزىلەدى. وسى جىلدار ىشىندە ۇبت-عا 1،5 ملن استام مەكتەپ ءبىتىرۋشى قاتىستى. بۇل بارلىق مەكتەپ بىتىرۋشىلەردىڭ 80%-ىن قۇرايدى.