سيرياداعى قازاقستاندىقتاردى ەلگە قايتارۋ بويىنشا جۇرگىزىلگەن «جۋسان» وپەراسياسى جالعاسىن تابادى. بۇل تۋرالى بۇگىن سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ايبەك سمادياروۆ مالىمدەدى دەپ جازادى Qamshy.kz اقپارات اگەنتتىگى Sputniknews.kz cايتىنىڭ دەرەگىن نەگىزگە الىپ. 

ايتا كەتسەك، «جۋسان» وپەراسياسى اياسىندا سيريادان 47 ازامات ەلگە ورالعان ەدى. ولاردىڭ دەنى، ياعني 30-ى – 1 - 5 جاس ارالىعىنداعى بالالار. 

–بۇل سوڭعى وپەراسيا ەمەس، تەك باسى عانا. قازاقستاننىڭ سىرتقى ءىستر مينيسترلىگى جانە باسقا دا مەملەكەتتىك ورگاندار ازاماتتارىمىزدىڭ تاعدىرىن ءاردايىم باستى نازاردا ۇستايدى، – دەدى سمادياروۆ سىرتقى ساياسي ۆەدومستۆودا وتكەن بريفينگتە.  

ول «جۋسان» وپەراسياسى ۇزاق دايىندالعانىن ءارى كۇردەلى بولعانىن اتاپ ءوتتى. سيرياداعى وتانداستاردى ەلگە قايتارۋعا شەتەلدىك سەرىكتەستەر مەن حالىقارالىق ۇيىمدار تارتىلعان. 

–قازاقستاندىقتاردىڭ كوبى سيريادا جۇرگەن تۋىسقاندارىمەن ءبىر جولىن تاۋىپ بايلانىسقا شىعىپ ءجۇر. وتكەن جىلى كونسۋلدىق قىزمەت دەپارتامەنتىنە 20-دان استام ءوتىنىش ءتۇستى. سونداي-اق سيرياداعى ازاماتتاردىڭ ءوزى ءتۇرلى كوميتەتتەر، الەۋمەتتىك جەلىدەگى توپتار ارقىلى بايلانىسقا شىعىپ، ۇيگە قايتقىسى كەلەتىنىن ايتىپ جاتادى، – دەدى سمادياروۆ. 

ول «جۋسان» وپەراسياسى الداعى ۋاقىتتا جالعاسىن تاباتىنىن اتاپ ءوتتى.