كوپبالالى وتباسىدان شىققان بالالارعا ارنايى ءبىلىم گرانتى بولىنەدى. بۇل تۋرالى بۇگىن قالا حالقىنىڭ الدىندا ەسەپ بەرىپ جاتقان استانا اكىمى باقىت سۇلتانوۆ ايتتى دەپ حابارلايدى Qamshy.kz اقپارات اگەنتتىگى kazbilim.kz سايتىنا سىلتەمە جاساپ.

«جالپى تابىسى 3 كۇنكورىس مينيمۋمىنان تومەن كوپبالالى وتباسىلاردىڭ بالالارىنا استانا قالاسىنىڭ جوو-لاردا وقۋ ءۇشىن جەكەلەگەن گرانتتار بولىنەتىن بولادى. بۇل – قوسىمشا 25 ملن تەڭگە. تەحنيكالىق جانە كاسىپتىك ءبىلىم بەرۋ مەكەمەلەرىندەگى قاجەت ەتىلەتىن جۇمىسشى ماماندىعىن الۋ ءۇشىن قوسىمشا 1 مىڭنان استام گرانت قاراستىرىلعان. ءبىلىم الۋ بارىسىندا جاتاقحانا بەرىلىپ، جول ءجۇرۋ مەن تاماق تەگىن بولادى، شاكىرتاقى تولەنەدى»، – دەدى قالا باسشىسى.

سونىمەن قاتار، قالا باسشىسى ەلوردانىڭ جوعارى وقۋ ورىندارىن بىتىرگەن تۇلەكتەر جاستار تاجىريبەسى باعدارلاماسى ارقىلى جۇمىسقا ورنالاسا الاتىندىعىن ايتتى.

«بۇل رەتتە مانساپ جولىندا ودان ارى ءوسۋ ءۇشىن قاجەتتى جۇمىس تاجىريبەسىن الاتىن بولادى. ال بيزنەستىڭ جول كارتاسى بويىنشا  كاسىپكەرلىك نەگىزدەرىن وقىپ، قاجەتتى بارلىق كەڭەستەردى الا الاسىزدار جانە جەڭىلدىكتى نەسيەنى سۋبسيديالاۋ باعدارلاماسىنا قاتىسۋعا مۇمكىنشىلىك بار»، – دەدى ب.سۇلتانوۆ.

ۇسىنعان: ماقپال سەمباي