بۇدان بىلاي بانكنوتالار مەن مونەتالاردا ماتىندەر تەك مەملەكەتتىك تىلدە جازىلادى. بۇل تۋرالى قازاقستان پرەزيدەنتىنىڭ جارلىعىندا ايتىلدى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ. 

وزگەرىس 2018 جىلدىڭ 12 جەلتوقسانىندا ەنگىزىلگەن. "ۇلتتىق ۆاليۋتا - قازاقستان تەڭگەسى بانكنوتالارى مەن مونەتالارى ديزاينىنىڭ تۇجىرىمداماسىن بەكىتۋ تۋرالى" № 804 جارلىققا ساي بانكنوتا مەن مونەتالاردا قولدانىلاتىن جازبانىڭ ءماتىنى ەندى مەملەكەتتىك تىلدە عانا جازىلادى. ال ينۆەستيسيالىق جانە كوللەكسيالىق مونەتالاردا شەت تىلدەردىڭ جازبالارىن قولدانۋعا بولادى.

قۇجاتتىڭ الدىڭعى نۇسقاسىندا بىلاي جازىلعان ەدى:

"بانكنوتالار مەن مونەتالاردا مەملەكەتتىك جانە ورىس تىلدەرىندەگى جازۋلار پايدالانىلادى. شەت تىلىندە راسىمدەلەتىن باسقا ەلدەردىڭ تاپسىرىستارى بويىنشا دايىندالاتىن كوللەكسيالىق مونەتالاردى قوسپاعاندا، كوللەكسيالىق جانە ينۆەستيسيالىق مونەتالاردا جازۋلاردىڭ ءماتىنى مەملەكەتتىك، سونداي-اق ورىس نەمەسە شەت تىلدەرىندە راسىمدەلەدى".

ۇسىنعان: ماقپال سەمباي