مەملەكەت - بىرەۋ. ەلدە - ەكى پرەزيدەنت. ناۋرىزدان كەيىنگى كوڭىل كۇي ءالى ەلەڭ - الاڭ. الداعى ەكى ء-ۇش اي كىمنىڭ كىم ەكەنىن انىق كورسەتەر. ءبىراق...
قاي پرەزيدەنتكە قارارىمىزدى بىلمەي قالدىق قوي.
انىعى، تۇڭعىشتىڭ وكىلەتتىلىگى وتە جوعارى. قىزمەتتەن كەتكەندە بىرەۋ جىلادى، ەكىنشىلەرى «ەندى قالاي بولار ەكەن؟» دەپ الاڭدادى.
ەشنارسە دە بولمايدى! تىرشىلىك بۇرىنعى جۇيەنىڭ ادەتىمەن ءارى قاراي جالعاسا بەرەدى.
19 ناۋرىز كۇنگى ساعات 19.00-دەگى مالىمدەمە حالىقتى ءارى-سارى كۇيگە تۇسىرگەنى راس. ءبىراق ءبارى كەلىسىممەن الدىن الا جۇزەگە اسىرىلعان. اقيقاتى، نازاربايەۆ ءۇشىن ءقازىر توقايەۆتىڭ ارتىق ابىرويلى كانديداتۋرا جوق. كوپتەگەن ساراپشىلار قاسىم-جومارت كەمەلۇلىن قىرعىزدىڭ روزا وتىنبايەۆاسى سەكىلدى وتپەلى كەزەڭنىڭ پرەزيدەنتى رەتىندە كورەدى. ولاي ەمەس. ويتكەنى توقايەۆتىڭ پرەزيدەنتتىككە كەلۋى الدىمەن تۇڭعىش پرەزيدەنت ءۇشىن دە، ەل ءۇشىن دە ءتيىمدى. رەسەي مەن جۇڭگو ءۇشىن دە توقايەۆتىڭ كانديداتۋراسى دۇرىس. ال وزگە ادام كەلۋى ەكىتالاي. ءقازىر ءبازبىر توپتار نەمەسە ساراپشىلار مەن ءبىرقاتار جۋرناليستەر قاۋىمى كەلەشەك سايلاۋ ءۇشىن پرەزيدەنتتىڭ تۋىسقاندارىن، اعايىندارى مەن ونىڭ قىزى داريعانىڭ ەسىمىن كوبىرەك اتاۋدا. بۇلاي بولۋى لوگيكاعا سىيمايدى. ەلدىڭ تىنىشتىعى ءۇشىن، قوعامنىڭ تۇراقتىلىعى ءۇشىن تۇڭعىش پرەزيدەنت مۇنداي قادامعا بارماۋى كەرەك. ءبىراق...
ول ءۇشىن وتپەلى پرەزيدەنتتىك كەزەڭ تۇسىندا قاسىم-جومارت توقايەۆ ەل قالايتىن قادامداردى جۇزەگە اسىرا الۋى ءتيىس. ماسەلە وسىندا. ءبىراق ونى تۇڭعىشپەن كەلىسە وتىرىپ جاساي ما، جوق الدە، ءوز قادامى ارقىلى تاۋەلسىز شەشىم شىعارا ما؟ ماسەلە وسىندا. اقيقاتى، توقايەۆقا نازاربايەۆ داۋىرىنەن ءتۇيىندى ماسەلەلەر قالدى. ول ءتۇيىندى كىم شەشەدى؟ راسىندا قوعامدا قوردالانعان پروبلەمالار ءالى جەتەرلىك. اتاپ ايتساق...
«قازاق ماسەلەسى» ءالى شەشىلگەن جوق.
مەملەكەتقۇرۋشى ۇلتتىڭ ۇپايى ءالى تۇگەل ەمەس.
مەملەكەتتىڭ ءتىلدىڭ مارتەبەسى ءالى تومەن.
تاۋەلسىزدىك العانىمىزعا 28 جىل وتسە دە، سىبايلاس جەمقورلىق ءالى جويىلعان جوق.
جەمقورلىق دەگەن – جەگى قۇرت. ونى قالاي ۇياسىندا تۇنشىقتىرا الامىز؟
ەل قازىناسىنا قول سۇققان جەمقورلاردان قالاي قۇتىلامىز؟
زاڭ بار، ءبىراق نەگە تولىققاندى جۇمىس ىستەمەيدى؟
قازاق قوعامىندا زاڭ ادىلەتتى تۇردە ۇستەمدىك قۇرۋى ءۇشىن نە ىستەلىنۋى كەرەك؟
توي، دۋمان، ىسىراپشىلىقتان قالاي ادا بولامىز؟
قازاق تويىنا رەفورما كەرەك. مۇنى قالاي رەتتەيمىز؟ وزبەك پەن تاجىك سياقتى بىزگە دە زاڭ قابىلداۋ كەرەك پە؟
ۇكىمەت پەن ءماجىلىس جانە سەنات قاشان قازاقشا سويلەيدى؟
ءبىلىم سالاسىندا نەگە مەنتاليتەتكە ساي ەمەس رەفورمالار جاسالا بەرەدى؟
ايلىعى از، بەينەتى باتپان ءمۇعالىم مەن دارىگەردىڭ مارتەبەسى قاشان كوتەرىلەدى؟
...ساۋال كوپ. جالعاسا بەرەدى. ءبىراق، كەشەدەن كەلە جاتقان بۇل ءتۇيىندى كىم شەشەدى؟ توقايەۆ پا، نازاربايەۆ پا؟ كىمگە سەنەمىز، قاي پرەزيدەنتكە قارايمىز؟!.
پىكىر قالدىرۋ