اۋرۋحانانىڭ ستاسيونارىندا 13 زارداپ شەگۋشى ەم قابىلداۋدا. ولاردىڭ بەسەۋىنە شۇعىل وپەراسيا جاسالعان، دەپ حابارلايدى Qamshy.kz اقپارات اگەنتتىگى قالا اكىمدىگىنىڭ رەسمي سايتىنىڭ دەرەگىن نەگىزگە الىپ. 

«№2 اۋرۋحاناعا 29 زارداپ شەگۋشى جەتكىزىلدى، ونىڭ 14ء-ى امبۋلاتورلىق جاعدايدا قارالدى، بارلىعىنا مەديسينالىق كومەك كورسەتىلىپ، ۇيلەرىنە جىبەرىلدى. ءقازىر ستاسيوناردا 13 ادام ەم قابىلداۋدا. ونىڭ سەگىزى ءتۇرلى جاراقاتپەن حيرۋرگيا بولىمىندە ەمدەلىپ جاتىر. ال ۇشەۋى جانساقتاۋ بولىمىندە جاساندى تىنىس الۋ قۇرالىنا قوسىلعان. ولاردىڭ جاعدايى اۋىر دەپ باعالانىپ وتىر. ەكى ناۋقاس توراكالدى حيرۋرگيا بولىمىندە»، – دەپ مالىمدەدى  №2 قالالىق اۋرۋحانانىڭ باس دارىگەرى يۆان لي.

ونىڭ ايتۋىنشا، كەشەدەن بەرى ومىرىنە ءقاۋىپ تونگەن بەس ادامعا شۇعىل وپەراسيا جاسالعان. تاعى قوسىمشا وپەراسيالار جاساۋ كوزدەلۋدە. قازىرگى تاڭدا بارلىق ناۋقاستىڭ جاعدايى تۇراقتى.

«وكىنىشكە وراي، ءبىر ايەلدىڭ وڭ اياعىن ساقتاپ قالا المادىق. اياعىن امپۋتاسيالاۋعا ءماجبۇر بولدىق. سول اياعى دا سىنعان، ءبىراق ءبىز وعان شينا سالدىق، الداعى ۋاقىتتا مەتاللووستەوسينتەز جاساپ، امان ساقتاپ قالامىز دەپ ويلايمىز. ەكىنشى ءبىر ايەلدىڭ ءبىر اياعى جول-كولىك وقيعاسى كەزىندە  كەسىلىپ كەتكەن، وعان دا كومەك كورسەتىپ جاتىرمىز. ازىرگە ونى امپۋتاسيالامايمىز، مەتاللمەن ۇستايمىز. ناۋقاستار ۇزاق ۋاقىت بويى ءبىزدىڭ تراۆماتولوگيا ءبولىمىنىڭ بازاسىندا ەمدەلەتىن بولادى»، – دەدى يۆان لي.

ەسكە سالا كەتەيىك، بۇگىن ەلوردا اكىمى باقىت سۇلتانوۆ پەن ق ر دەنساۋلىق ساقتاۋ ءمينيسترى ەلجان ءبىرتانوۆ كەشە ءىرى جول-كولىك وقيعاسىنىڭ سالدارىنان زارداپ شەككەن ازاماتتار ەم قابىلداپ جاتقان قالالىق №2 كوپبەيىندى اۋرۋحانادا بولىپ قايتتى.

اۋرۋحانانىڭ باس دارىگەرى يۆان لي قابىلداۋ، ينتەنسيۆتى تەراپيا، تراۆماتولوگيا جانە جانساقتاۋ بولىمدەرىنىڭ جۇمىسى تۋرالى ايتىپ بەردى. اۋرۋحاناداعى 3ن جۇيەسى (شۇعىلدىق ساناتىنا بايلانىستى ناۋقاستاردى سۇرىپتاۋ جۇيەسى) مەن اپاتتىق اقپارات قىزمەتى جۇيەسىنىڭ جۇمىسى  كورسەتىلدى.  

ۇسىنعان: اسەل بولات قىزى