كۇنى كەشە IX بەيجىڭ حالىقارالىق كينوفەستيۆالىنىڭ (The 9th Beijing International Film Festival) كونكۋرستىق باعدارلاماسى اياسىندا العاشقى قازاق-قىتاي بىرلەسىپ تۇسىرگەن كوركەم ءفيلمى - "كومپوزيتوردىڭ" كورسەتىلىمى ءوتتى دەپ حابارلايدى Qamshy.kz اقپارات اگەنتتىگى "قازاقفيلم" كينوستۋدياسىنىڭ باسپا ءسوز قىزمەتىنە سىلتەمە جاساپ. 

فەستيۆالدە كارتينانى فيلم اۆتورلارى مەن اكتەرلەرى تانىستىردى. اتاپ ايتار بولساق - ش.ايمانوۆ اتىنداعى "قازاقفيلم" اق ءبىرىنشى ۆيسە-پرەزيدەنتى سەرىك جۇباندىقوۆ، قويۋشى رەجيسسەرى - شەرزات ياكۋب، قوسالقى رەجيسسەرى - ءسابيت قۇرمانبەكوۆ، باقىتجان بايقاداموۆتىڭ ءرولىن سومداعان اكتەر - بەرىك ايتجانوۆ، سي سينحاي مەن ونىڭ جارىنىڭ وبرازىن جاساعان جۇڭگو اكتەرلەرى  - حۋ چجۋن جانە يۋان چۋان.  

فەستيۆال قوناقتارى جانە قىتايدىڭ شىعارماشىلىق زيالى قاۋىمى ءفيلمدى زور ىقىلاسپەن قارسى الدى. ماسەلەن، جۇڭگو سۋرەتشىسى تين حۋان فيلم تۋرالى جىلى لەبىزىن ءبىلدىرىپ، كورۋگە كەڭەس ەتتى.  

كوركەم لەنتا قىتايلىق كومپوزيتور سي سينحايدىڭ سوۆەت وداعىندا، ونىڭ ىشىندە الماتىعا ەۆاكۋاسيالانعان كەزى مەن قازاقتىڭ كومپوزيتورى باقىتجان بايقاداموۆپەن دوستىعى تۋرالى باياندايدى. ءفيلمدى ش.ايمانوۆ اتىنداعى "قازاقفيلم" كينوستۋدياسى جانە قىتايلىق "Shineworks Pictures"، "China film coproduction corporation" كومپانيالارى تۇسىرگەن.

بيىل فەستيۆالگە قاتىسۋعا 85 ەلدەن 775 كينوتۋىندى ءۇمىت بىلدىرگەن. ناتيجەسىندە، فەستيۆالدىڭ Tiantan ("اسپان عيباداتحاناسى") اتتى باس جۇلدەسى ءۇشىن ءتۇرلى ەلدەن بارلىعى 15 فيلم بايگەگە تۇسەتىن بولادى. ولاردىڭ ىشىندە قىتايلىق "اداسقان عالام"، امەريكاندىق "بەن ورالدى" (Ben Is Back)، يراندىق "وسىندا" (Iro، Here)، قازاق-قىتاي بىرلەسىپ تۇسىرگەن "كومپوزيتور" جانە باسقا دا تۋىندىلار بار. فەستيۆالدىڭ جەڭىمپازدارى بايقاۋدىڭ جابىلۋ سالتاناتىندا ءساۋىردىڭ 20-ندا جاريالاناتىن بولادى.

Tiantan باستى بايقاۋدان باسقا، بيىل فەستيۆال شەڭبەرىندە الۋان ءتۇرلى مادەني ءىس شارالار وتەدى، اتاپ ايتساق، تاقىرىپتىق سەمينارلار، جارمەڭكەلەر، كينوكارناۆال، سونداي-اق "ءۇندى كينوسىنىڭ اپتالىعى"، "بولاشاققا كوزقاراس"، "كينوداعى كلاسسيكالىق بەيجىڭ وپەراسى" سىندى باعدارلامالار مەن كينوكونسەرتتەر وتەدى. 

ەسكە سالايىق، حالىقارالىق پەكين كينوفەستيۆالى 2011 جىلى قۇرىلعان بولاتىن. قحر كينەماتوگرافيا بويىنشا مەملەكەتتىك باسقارماسىنىڭ باستاۋىمەن وتكىزىلەتىن فەستيۆالدى قىتايدىڭ مەدياكورپوراسياسى مەن پەكيننىڭ حالىق ۇكىمەتى ۇيىمداستىرىپ وتىر.

ايتا كەتەيىك، "كومپوزيتور" ءفيلمىنىڭ ءوندىرىسى ۇكىمەت دەڭگەيىندە ۇيىمداستىرىلعان بولاتىن. 2015 جىلى 31 تامىزدا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ جانە جۇڭگو حالىق رەسپۋبليكاسىنىڭ ءتوراعاسى سي ءسزينپيننىڭ قاتىسۋىمەن وتكەن مادەني-گۋمانيتارلىق ىنتىماقتاستىق تۋرالى كەلىسىمگە قول قويىلعان كەزدە ۋاعدالاستىق ەتىلگەن.  

ق ر مادەنيەت جانە سپورت مينيسترلىگىنىڭ ۇسىنىسى بويىنشا ش.ايمانوۆ اتىنداعى "قازاقفيلم" اق مەن قىتايلىق Shineworks Pictures كومپانياسى اراسىندا اتالعان ءفيلمدى بىرلەسە ءوندىرۋ، قارجىلاندىرۋ، جانە پايدالانۋ جونىندە كەلىسىمگە وتىرعان.

2017 جىلى 8 ماۋسىمدا قحر ءتوراعاسى سي ءسزينپيننىڭ قازاقستانعا جاساعان ساپارى اياسىندا قول قويىلعان بىرلەسىپ كينووندىرىستى  جۇرگىزۋ تۋرالى مەملەكەتارالىق كەلىسىم نەگىزىندە اتالعان كينوجوبا ىسكە اسقان بولاتىن. 

كارتينانىڭ تۇسىرىلىمدەرى 2017 جىلى ءوتىپ، ءفيلمنىڭ ءبىراز بولىگى قازاقستاندا جۇرگەن. سي سينحاي قىسقا عۇمىرىندا 500-دەن استام تاماشا اۋەندەر جازعان، سونداي-اق ول 10-عا جۋىق كينوفيلمدەر مۋزىكاسىنىڭ اۆتورى. الماتىدا وتكىزگەن جىلدارى ول «ۇلت ازاتتىعى» سيمفونياسىن جازعان. ازاتتىق پەن وتانعا دەگەن ادالدىقتى جىرلاپ، زورلىق-زومبىلىق پەن سوعىسقا قارسى باعىتتالعان سي سينحايدىڭ شىعارمالارىنان وتانعا دەگەن ماحابباتىن اڭعارۋعا بولادى.

ۇسىنعان: ماقپال سەمباي