ايلىعى تومەن بيۋدجەتتىك سالا قىزمەتكەرلەرىنىڭ جالاقىسى 2019 جىلدىڭ 1 ماۋسىمىنان باستاپ وسەدى دەپ حابارلايدى Qamshy.kz اقپارات اگەنتتىگى.

قازاقستان پرەزيدەنتى قاسىم-جومارت توقايەۆ 2019-2021 جىلدارعا ارنالعان بيۋدجەتكە وزگەرىستەر ەنگىزۋ تۋرالى زاڭعا قول قويدى. ول بۇل تۋرالى Twitter پاراقشاسىندا حابارلادى.

"2019-2021 جىلدارعا ارنالعان رەسپۋبليكالىق بيۋدجەت تۋرالى" ق ر زاڭىنا وزگەرتۋلەر مەن تولىقتىرۋلار ەنگىزۋ تۋرالى" زاڭعا قول قويدىم"، - دەپ جازدى مەملەكەت باسشىسى.

توقايەۆ قۇجاتتى ازىرلەگەن ۇكىمەتكە جانە ماڭىزدى وزگەرتۋلەردى جىلدام قاراپ، قابىلداعان پارلامەنت دەپۋتاتتارىنا العىسىن جەتكىزدى.

پرەزيدەنت بيىل 1 ماۋسىمنان باستاپ ءبىر ميلليوننان استام قازاقستاندىقتىڭ جالاقىسى وسەتىنىن حابارلادى.

"ەندى 1 ميلليوننان استام ايلىعى تومەن اۋىلدىق، اۋداندىق، وبلىستىق دەڭگەيدەگى بيۋدجەتتىك سالا قىزمەتكەرلەرىنىڭ جالاقىسى 2019 جىلدىڭ 1 ماۋسىمىنان باستاپ وسەتىن بولادى"، - دەپ جازدى ول جەكە پاراقشاسىندا.

ەسكە سالا كەتسەك، قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ 2019 جىلدىڭ 1 شىلدەسىنەن باستاپ بيۋدجەت سالاسىنداعى ايلىعى تومەن قىزمەتكەرلەردىڭ جالاقىسىن 30%-كە، اۋداندىق جانە وبلىستىق دەڭگەيلەردە تىكەلەي حالىقپەن جۇمىس ىستەيتىن اتقارۋشى ورگانداردىڭ تومەنگى ساتىداعى قىزمەتكەرلەرىنىڭ جالاقىسىن ورتاشا ەسەپپەن 25%-كە ءوسىرۋدى تاپسىرعان بولاتىن.

كەيىن مەملەكەت باسشىسى قاسىم-جومارت توقايەۆ جالاقىسى تومەن قىزمەتكەرلەردىڭ ايلىعىن 1 شىلدەدەن ەمەس، 1 ماۋسىمنان باستاپ كوتەرۋ تۋرالى تاپسىرما بەرگەن ەدى. 

ۇسىنعان: ماقپال سەمباي