مەملەكەتتىك ءبىلىم بەرۋ گرانتتارى ۇلتتىق ءبىرىڭعاي تەستىلەۋ مەن كەشەندى تەستىلەۋدىڭ ناتيجەسىندەگى بالل ارقىلى كونكۋرستىق نەگىزدە بولىنبەك. بۇل تۋرالى ق ر ءبىلىم جانە عىلىم مينيسترلىگى مالىمدەدى.
ءبىلىم بەرۋ گرانتتارى ءبىلىم بەرۋ باعدارلامالارىنىڭ توپتارى بويىنشا بەيىندىك پاندەر باعىتىنا سايكەس بولىنەتىن بولادى. سونىمەن قاتار، گرانتتى تاعايىنداۋ كونكۋرسىندا ءتورت ءبىلىم بەرۋ باعدارلاماسىن تاڭداۋعا مۇمكىندىك بەرىلەدى.
مىسالى، بيولوگيا مەن حيميا پاندەرىن تاڭداعاندار:
"حيميا مۇعالىمدەرىن دايارلاۋ"؛
"بيولوگيالىق جانە ساباقتاس عىلىمدار"؛
"ۆەتەريناريا"؛
"جالپى مەديسينا" سياقتى ءبىلىم بەرۋ باعدارلامالارىنىڭ توپتارىن تاڭداۋ مۇمكىندىگىنە يە.
ەگەر شىعارماشىلىق ەمتيحان قامتىلعان بولسا، وندا ءبىلىم بەرۋ گرانتىن تاعايىنداۋ كونكۋرسىندا وعان ءبىر عانا ءبىلىم بەرۋ باعدارلامالار توبىن تاڭداۋ مۇمكىندىگى بەرىلەدى.
مىسالى، شىعارماشىلىق ەمتيحاندى قامتيتىن "باستاپقى اسكەري دايىندىق" ماماندىعىنا قۇجاتىن تاپسىراتىندار تەك قانا "باستاپقى اسكەري دايىندىق مۇعالىمدەرىن دايارلاۋ" سياقتى ءبىر ءبىلىم بەرۋ باعدارلامالار توبىن عانا تاڭداي الادى.
ءبىلىم بەرۋ باعدارلامالارى توپتارىنىڭ ءتىزىمى ۇلتتىق تەستىلەۋ ورتالىعىنىڭ سايتىندا كورسەتىلگەن.
ءبىلىم بەرۋ باعدارلامالارى توپتارى بويىنشا گرانتتار سانى بەكىتىلگەننەن كەيىن ق ر بعم جانە ۇلتتىق تەستىلەۋ ورتالىعىنىڭ سايتتارىندا جاريالاناتىن بولادى.
ال گرانتتى جەڭىپ العان سوڭ جوعارى وقۋ ورنىنا قابىلداۋ كەزىندە تاعى دا ناقتى ءبىلىم بەرۋ باعدارلاماسىن تاڭداۋىڭىز كەرەك بولادى.
مىسالى، "حيميا مۇعالىمدەرىن دايارلاۋ" ءبىلىم بەرۋ باعدارلامالارىنىڭ توبى بويىنشا گرانت يەگەرى بولساڭىز، وندا جوعارى وقۋ ورنىنا قابىلدانعاندا "حيميا" نەمەسە "حيميا-بيولوگيا" بويىنشا ءبىلىم بەرۋ باعدارلاماسىنىڭ بىرەۋىن تاڭداۋ قاجەت.
