بۇگىن «سامۇرىق-قازىنا» ءۇاق» اق قولداۋىمەن اقتاۋ تەڭىز پورتىنان قازاقستاننىڭ العاشقى «تۇركىستان» فيدەرلىك كەمەسى باكۋ پورتىنا جول تارتتى.
ءىس-شاراعا «سامۇرىق-قازىنا» ۇلتتىق ءال-اۋقات قورى» اق باسقارما ءتوراعاسى احمەتجان ەسىموۆ، ماڭعىستاۋ وبلىسىنىڭ اكىمى ەرالى توعجانوۆ، «قازاقستان تەمىر جولى» اق باسقارما ءتوراعاسى ساۋات مىڭبايەۆ جانە «قازمۇنايگاز» اق باسقارما ءتوراعاسى اليك ايداربايەۆ قاتىستى.
فيدەرلىك كەمەلەر اپتا سايىن قاتىنايتىن بولادى. قىتايدان ەۋروپاعا باعىتتالعان ترانزيتتىك جۇك شوعىرلانىپ، قازاقستاندىق ەكسپورتتىق جۇكپەن بىرگە كونتەينەرلەرمەن جەدەل تاسىمالدانادى. وسىلايشا، التىنكول شەكارالىق بەكەتىنىڭ لوگيستيكالىق ينفراقۇرىلىمىن، «حورگوس-شىعىس قاقپاسى» اەا-نىڭ قۇرعاق پورتىن، اقتاۋ تەڭىز پورتىن بەلسەندى پايدالانۋ قازاقستان اۋماعى ارقىلى ترانزيتتىك تاسىمالداۋدىڭ تيىمدىلىگىن قامتاماسىز ەتەدى.
«بۇگىن ەلىمىز ءۇشىن تاريحي وقيعا – قازاقستاندا تۇڭعىش رەت اقتاۋ مەن باكۋ اراسىنداعى فيدەرلىك جەلى ىسكە قوسىلدى. «سامۇرىق-قازىنا» قورىنىڭ اكتيۆتەرىن سينەرگيالاۋ جانە كاسپيي تەڭىزىندەگى فيدەرلىك كونتەينەرلىك قىزمەتتى ىسكە قوسۋ وسى باعىتتى جانە جالپى ايماقتى دامىتۋ ءۇشىن بارىنشا مۋلتيپليكاتيۆتى اسەر الۋعا مۇمكىندىك بەرەدى»،-دەپ اتاپ ءوتتى احمەتجان ەسىموۆ.
تاسىمالداۋدى ءتيىمدى جوسپارلاعان جاعدايدا فيدەرلىك كەمە قاتىناسى كونتەينەرلىك پويىزداردىڭ جىلدامدىعىن قاداعالاۋدى قامتاماسىز ەتۋمەن قاتار، ترانسكاسپيي حالىقارالىق كولىك باعىتى بويىنشا جۇك تاسىمالدارىنىڭ ارتۋىنا جانە كاسپيي ايماعىندا جۇك كونتەينەرلەرىن ودان ءارى دامىتۋعا ىقپال ەتەدى.
بۇل باعىت «نۇرلى جول» ينفراقۇرىلىمىن دامىتۋ باعدارلاماسىنا سايكەس اشىلدى.
