ءوز ەڭبەگىمەن بايلىق جيناعان ميلليونەرلەردىڭ كوپشىلىگى تاباندى ەڭبەك ەتەدى. ءتىپتى جۇمىس ىستەۋ قارقىنى كەشەگىگە قاراعاندا بۇگىن ەسەلەنە ءتۇسۋى مۇمكىن. كەڭسەگە جۇمىس ۋاقىتىنان ەرتە كەلىپ، وزگەلەرگە قاراعاندا كوبىرەك ەڭبەك ەتىپ، جۇمىس سوڭىندا قايتۋدى ادەتكە اينالدىرادى. ولار ءوز سالاسىنداعى ەڭبەكقورلار ساناتىنا جاتاتىن ادامداردىڭ اراسىندا ۇلكەن بەدەلگە يە. بۇل جاعداي بارىنە جاقسى تانىس.

ءوز تاجىريبەڭىزدە «40+» فورمۋلاسىن قولدانىپ كورىڭىز. بۇل فورمۋلا بويىنشا ءبىر اپتادا 40 ساعات «ءومىر ءسۇرۋ ءۇشىن» جۇمىس ىستەيسىز، ال 40 ساعاتتان تىس ۋاقىتتى – تابىسقا جەتۋ ءۇشىن جۇمسايسىز. ەگەر ءسىز 40 ساعاتتان جۇمىس ىستەيتىن بولساڭىز (بۇگىندە جۇمىس اپتاسىنىڭ ورتاشا ۇزاقتىعى – 35 ساعات)، وندا تەك ءومىر ءسۇرىپ جۇرگەن بولاسىز. سول سەبەپتى ەشقاشان العا جىلجي المايسىز. ۇلكەن قارجىلىق تابىسقا جەتەم دەگەن ويىڭىز دا قۇر اۋرەشىلىك بولىپ قالادى. ارىپتەستەرىڭىز دە ءسىزدى سىيلاپ، جوعارى باعالامايدى. اپتاسىنا ءتيىستى قىرىق ساعاتتىق  جۇمىسپەن شەكتەلسەڭىز، تالانتىڭىزدى شىڭداۋىڭىز دا ەكىتالاي.

ەسەسىنە 40 ساعاتتان تىس ۋاقىتتى ءسىزدىڭ بولاشاعىڭىزعا سالعان ينۆەستيسياڭىز دەپ ەسەپتەۋگە بولادى. ەگەر ءسىز ءار اپتادا قىرىق ساعاتتان تىس ۋاقىتىڭىزدى قانشالىقتى جۇمىسقا ارنايتىنىڭىزدى باقىلاساڭىز، وندا 5 جىلدان كەيىن قايدا بولاتىنىڭىزدى ءوزىڭىز-اق اسا دالدىكپەن بولجاي الاسىز.

تازا ءوز ەڭبەگىمەن اقشا تاۋىپ جۇرگەن امەريكالىق ميلليونەرلەر اپتاسىنا 59 ساعات جۇمىس ىستەيدى. كوپشىلىگىندە، بۇل كورسەتكىش 70 نەمەسە 80 ساعاتقا جەتۋى مۇمكىن. اسىرەسە كاسىپكەرلىك مانسابىنىڭ العاشقى كەزدەرىندە بۇل كورسەتكىشتىڭ دەڭگەيى ارتا تۇسەدى. ولار، ورتاشا ەسەپپەن، اپتاسىنا 5 كۇن ەمەس، التى كۇن ەڭبەكتەنەدى. ءارى ولاردىڭ جۇمىس كۇندەرى تىم ۇزاق. ەگەر ءسىز ميلليونەرمەن سويلەسكىڭىز كەلسە، وندا وعان جۇمىس ۋاقىتى باستالار كەزدە نەمەسە جۇمىس ۋاقىتى بىتەر كەزدە حابارلاسىڭىز. ءوزى اقشا تاۋىپ، بايىعان ميلليونەر، ساعات توعىزدان بەسكە دەيىن جۇمىس ىستەيتىن قاتارداعى قىزمەتكەرلەر ەندى جۇمىسقا كەلىپ جاتقان كەزدە، جۇمىس ۇستەلىنىڭ باسىندا وتىرادى. جانە دە جۇمىس ۋاقىتى ءبىتىپ، بارلىعى ۇيدى-ۇيىنە تارقاسقان كەزدە دە سول جەردەن تابىلادى.

«جۇمىس ورنىندا وتىرعان ۋاقىتتىڭ بارلىعىندا تەك قانا جۇمىس ىستەڭىز» دەگەن جاقسى وي ايتىلادى. جۇمىس ىستەپ وتىرىپ، ۋاقىتىڭىزدى ءتيىمسىز نارسەلەرگە جۇمساماڭىز. تاڭەرتەڭ كەڭسەگە كىرگەن بويدا جۇمىس ۇستەلىڭىزگە وتىرىپ، الدىڭىزدا جاتقان قاعازدارعا ءۇڭىلىپ، بىردەن جۇمىس ىستەۋدى باستاپ كەتىڭىز. ەگەر ارىپتەستەرىڭىز ءسىزدىڭ ويىڭىزدى ءبولىپ، اڭگىمەلەسۋگە شاقىرسا، كەشىرىم ءوتىنىپ: «مەنى جۇمىس كۇتىپ تۇر!»، - دەڭىز.

بۇل ءۇي شارۋاسىمەن اينالىسۋدى، دوستارىڭا حابارلاسۋدى، ارىپتەستەرىڭمەن سويلەسۋدى نەمەسە گازەت وقۋدى دوعارۋ كەرەك دەگەن ءسوز ەمەس. الايدا جۇمىس ۋاقىتىندا، مىندەتتى تۇردە جۇمىس ىستەڭىز. بۇگىننەن باستاپ فيرماڭىزدا بارىنەن دە قارقىندى ءارى كوپ جۇمىس ىستەيتىن ادامنىڭ بەدەلىنە جەتۋ ءۇشىن الدىڭىزعا ماقسات قويىڭىز. ول ءوز كەزەگىندە سىزگە كومەك قولىن سوزۋعا دايىن ادامداردىڭ سانىن ارتتىرادى.

اۆتورى: برايان ترەيسي

«ميلليونەرلەردىڭ 21 قۇپياسى»

 اۋدارعان: مارجان سابەت