كەز-كەلگەن ايماقتا ادام اياعىن اتتاپ باسۋعا قورقاتىن ءزاۋلىم عيماراتتار، جارتىلاي سوعىلعان نىساندار نەمەسە بەلگىلى ءبىر تىلسىم كۇشكە يە ورىندار بولادى. اتالعان جەرلەردەن ادامدار ءارتۇرلى تۇسىنىكسىز بەينەلەردى، دىبىستاردى بايقاپ، سودان كەيىن اڭگىمە تاراعان ۇستىنە تاراي بەرەدى.

بۇگىن سىزدەردىڭ نازارلارىڭىزعا الماتى شاھارىنداعى كوپتىڭ كوكەيىندە ۇرەي ورناتقان ميستيكالىق ورىندار تۋرالى اقپاراتتى ۇسىنامىز. Qamshy.kz اقپارات اگەنتتىگى بۇل اقپاراتتى El.kz پورتالىنىڭ ماعلۇماتتارىنا سۇيەنە وتىرىپ جازدى.

1. قاڭىراعان ۇوس گوسپيتالى

اتالعان گوسپيتالدى وتكەن عاسىردىڭ 40-جىلدارى ۇوس ارداگەرلەرى مەن مۇگەدەكتەرى تۇرعىزعان. 90 جىلدارى مۇندا اۋعانستان سوعىسىنىڭ ارداگەرلەرى ەم قابىلداعان ەكەن. قاتتى جەر سىلكىنىسى ەمحانانىڭ شاتىرىن زاقىمداعان سوڭ، ەمحانا بوس قالادى. دەسەك تە، قاڭىراپ قالۋىنا تەك تابيعات اپاتى عانا سەبەپكەر ەمەس سەكىلدى. مۇندا دارىلىك زاتتار، ورىندىقتار ءار جەردە شاشىلىپ جاتىر. ال كىرەبەرىس ەسىگى قۇبىجىق كىرىپ كەتەردەي نەمەسە ىشىندەگى ەلەس اتاۋلىلارى سىرتقا شىعىپ كەتپەسىن دەگەندەي تاس بەكىتىلگەن. بۇل ورىن الماتىداعى ەلەستەر مەكەندەيتىن اتاقتى جەرگە اينالعان.

2. «28 پانفيلوۆشىلار» ساياباعى

الماتىلىقتار ءۇشىن دەمالىس ورنىنا اينالعان ساياباقتا قانداي ميستيكامەن بايلانىستى وقيعالار بولىپ تۇرادى دەيسىز عوي؟... مۋزىكا اسپاپتارىنىڭ مۇراجايىنا قاراما-قارسى بەتتەن ىلعي اق كويلەكتەگى قىزدىڭ ەلەسى جۇرەدى ەكەن. سونداي-اق، وسى ماڭداعى شىركەۋدىڭ استىندا جەر استى جولى بار-مىس. وندا ءتورت توننالىق قوڭىراۋ جاتۋى مۇمكىن. قوڭىراۋ جەر سىلىكىنىسى بولاردىڭ الدىندا سوعىلىپ، دىبىس بەرەدى ەكەن.

3. قاپشاعاي تاس جولى

جىل سايىن قاپشاعاي تاس جولىندا كوپتەگەن كەلەڭسىز جايتتار بولىپ جاتاتىنى جاسىرىن ەمەس. كەيبىرەۋلەر اتالعان جولدىڭ استىندا مازار بار دەسە، كەيبىرى وسى جولدا قايتىس بولعانداردىڭ ارۋاعى مازا بەرمەيدى دەپ جاتادى. سونداي-اق، ءتۇن اۋاسىندا تۇياقتى قىزدىڭ بەينەسىن كورگەن ادامدار دا جەتەرلىك. ول جول جيەگىندە كولىك توقتاتىپ تۇرادى ەكەن. سول سەبەپتى، جۇرگىزۋشىلەر بۇل ماڭنان تەمىر تۇلپارلارىنا ەشكىمدى وتىرعىزباۋعا تىرىسادى.

4. باۋم توعايى

"مەن بۇل ماڭعا جايسىز سەزىممەن بەتتەدىم. بۇرىن اۋىلداعى توعايدان كورگەن بەينە كوز الدىما كەلگەندە، ءتىپتى ءتىلىم بايلانىپ، بىرەۋ ۇستىمنەن سۋىق سۋ قۇيىپ جىبەرگەندەي بولدى. قاسىمداعىلار دا ءبىرتۇرلى كۇيدى باستارىنان وتكەرگەندەرىن ايتتى. ءبىراق ەشقانداي ەلەس كورمەپتى" دەيدى ءانۋار ەسىمدى جىگىت. راسىمەن، كوپشىلىك مۇندا ەلەستەردىڭ ارى-بەرى جۇرەتىنى جايلى ءجيى ايتادى. بۇرىن مۇندا ارحيەپيسكوپتى قيناپ ولتىرگەن دەيدى (مازا تاپپاي جۇرگەن سونىڭ ارۋاعى بولۋى مۇمكىن). ول ولەردىڭ الدىندا باۋم توعايىنا شىركەۋدەگى قاسيەتتى زاتتى جاسىرىپ كەتىپتى.

5. جەر استى شىركەۋى

مەدەۋ ماڭىندا سەرافيم مەن اناتوليي ەسىمدى ەكى موناح تۇرعىزعان سكيت (موناستىر) بار. ۋسپەن شىركەۋىنە قاراعان بۇل سكيت وتكەن عاسىردا ىلعالدىڭ كوپتىگىنەن تومەن ءتۇسىپ كەتكەن. ەل اۋزىندا ول جەردى ارۋاقتار مەكەن ەتەدى دەگەن اڭىز تاراپ ءجۇر. كەيبىرەۋلەرى موناستىردى سالعان ەكى موناحتى وسى جەردە ءولتىرىپ كەتكەنىن ايتادى. مىنە، سولاردىڭ ارۋاقتارى تىنىم تاپپاي كەلۋشەلىردى ءجيى مازالايدى ەكەن.

6. مەدەۋدەگى ارۋاقتار مەكەن ەتەتىن ءۇي

بۇل ءۇي نەگىزى مەيرامحانا بولۋى كەرەك بولعان. ءبىراق، قۇرىلىستى جۇرگىزگەندەر ءجيى ميستيكالىق وقيعالارعا تاپ بولعان سوڭ، ارى قاراي جۇمىس جۇرگىزۋدەن باس تارتقان. سودان بەرى ءۇي قاڭىراپ بوس تۇر. مۇندا كەلۋشىلەردىڭ كوبىسى ءۇيدى اشۋلى ەلەس مەكەن ەتەدى دەيدى.

7. "قازاقستان" كينوتەاترى

كينوتەاتردىڭ استىندا بۇرىن ادامدار كىرىپ-شىعا بەرەتىن ۇڭگىر بولعان دەيدى. وندا قۇرىلىس بارىسىندا قازا بولعانداردىڭ ەلەسەتەرى جۇرەدى-مىس. كينوتەاتردا جۇمىس ىستەيتىن قىزمەتكەرلەر تومەننەن ادامنىڭ جۇرگەن دىبىسىن ءجيى ەستيتىندىكتەرىن ايتقان. تەك تومەننەن ەمەس، تۇنگە كەزەكشىلىككە قالعان كۇزەتشى كينوتەاتر ىشىندە ورىندىقتا وتىرعان ادامنىڭ ەلەسىن كورگەنىن مالىمدەگەن.

ۇسىنعان: ادىلەت مادەنيەت