قاراعاندى وبلىستىق بەينەلەۋ ونەرى مۇراجايىندا «العاشقى» اتتى ەرەكشە كورمە اشىلماق. مۇراجاي قىزمەتكەرلەرىنىڭ ايتۋىنشا، كورمەگە قۋعىن-سۇرگىنگە ۇشىراپ، قاراعاندى جەرىنە تابان تىرەپ، وسى جەردە شىعارماشىلىقپەن اينالىسقان سۋرەتشىلەردىڭ تۋىندىلارى قويىلىپ، ەل نازارىنا ۇسىنىلاتىن بولادى دەپ جازادى Qamshy.kz اقپارات اگەنتتىگى baq.kz سايتىنىڭ دەرەگىن نەگىزگە الىپ. 

26 cاۋىردەن باستاپ قاراعاندى تۇرعىندارى مەن قالا قوناقتارى وبلىستىق بەينەلەۋ ونەرى مۇراجايىنان تاعدىر تاۋقىمەتىمەن قۋعىنعا ۇشىراپ، كەيىننەن شىعارماشىلىققا بەت بۇرعان قىل قالام شەبەرلەرىنىڭ تۋىندىلارىمەن تانىسۋ مۇمكىندىگىنە يە بولماق.

«بۇل كورمە قاراعاندىلىق العاشقى سۋرەتشىلەرگە ارنالعان. «العاشقى» كورمەسىنىڭ اشىلۋى 26 cاۋىرگە جوسپارلانعان. وسى كورمە اياسىندا «قۋعىن-سۇرگىنگە ۇشىراعان عىلىم جانە مادەنيەت قايراتكەرلەرىنىڭ شىعارماشىلىق مۇراسى» تاقىرىبىندا دوڭگەلەك ۇستەل وتكىزىلەدى»، - دەيدى مۋزەي قىزمەتكەرى نازەركە جارتىن.

ونىڭ ايتۋىنشا، كورمەنىڭ اشىلۋ سالتاناتىنا جانە دوڭگەلەك ۇستەل وتىرىسىنا قازاقستان جۋرناليستەر وداعىنىڭ العاشقى لاۋرەاتى ە.ب. كۋزنەسوۆا، قۋعىن-سۇرگىنگە ۇشىراعان سۋرەتشىلەردىڭ شىعارماشىلىعى جايلى العاش رەت كورمە ۇيىمداستىرعان، ق ر ەڭبەك سىڭىرگەن مادەنيەت قايراتكەرى گ.ي. لاۆرەنتيەۆا، ونەرتانۋشى ن.ي. يۆانينا، «رۋحانيات» عىلىمي-زەرتتەۋ ورتالىعىنىڭ ديرەكتورى، ونەرتانۋشى، «بولاشاق» اكادەمياسى «كارلاگ. ەستە ساقتايمىز» عىلىمي-زەرتتەۋ ورتالىعى، قاراعاندى وبلىسى قازاقستان حالقى اسسامبلەياسىنىڭ عىلىمي-زەرتتەۋ ورتالىعىنىڭ مۇشەسى ا.ۋ. اۋپەنوۆا قاتىسپاق. سونداي-اق، شاراعا دولينكا قۋعىن-سۇرگىنگە ۇشىراعانداردى ەسكە الۋ مۋزەيىنىڭ جانە قاراعاندى وبلىستىق تاريحي-ولكەتانۋ مۋزەيىنىڭ وكىلدەرى دە اتسالىسادى.

ۇسىنعان: اسەل بولات قىزى