ءار قادام سايىن شاشىلىپ جاتاتىن تەمەكى تۇقىلى كىم-كىمدى دە مەزى ەتەرى انىق. بولماشى نارسە عانا بولىپ كورىنگەنىمەن تەمەكىدەن سوڭ قالاتىن تەمەكى تۇقىلىنىڭ تابيعاتقا كەلتىرەر زالالى پلاستيك قالدىقتاردان كوپ بولماسا، از ەمەس. وسىنى ەسكەرگەن گوللانديالىق "Crowded cities" كومپانياسى قالانى قورشاعان ورتاعا زياندى تەمەكى تۇقىلى مەن قالدىقتارىنان تازالاۋعا بىلەك سىبانا كىرىسكەن.

گوللانديالىقتار بۇل ماسەلەمەن قالاي كۇرەسىپ جاتىر دەپ ويلايسىز؟ ادام سەنگىسىز، ارنايى ۇيرەتىلگەن قارعالار ارقىلى. كومپانيا وكىلدەرى قۇستارعا جاڭعاق بەرەتىن قۇرىلعىنى قالاي دۇرىس پايدالانۋ كەرەكتىگىن ۇيرەتكەن. قارعا تەمەكى تۇقىلىن ارنايى قوقىس كونتەينەرىنە سالسا بولعانى، اپپارات اراحيس جاڭعاعىن ۇسىنادى.

قارعا – ءوز پايداسىن الىستان سەزەتىن اقىلدى قۇس، ءارى ءبىرىنىڭ ىستەگەنىن ءبىرى اينىتپاي قايتالاۋعا شەبەر. تابيعات تارتۋ ەتكەن وسى قاسيەتتەرىنىڭ ارقاسىندا، ولار كوشە سىپىرۋشىلاردىڭ ءوزى كورە قويمايتىن تاسا جەردەگى تەمەكى قالدىقتارىن تاۋىپ، قالا تازالىعىنا ولشەۋسىز ەڭبەك سىڭىرەدى.

"Crowded Cities" ماماندارى تەمەكى تۇقىلىنىڭ قۇستاردىڭ دەنساۋلىعىنا قانداي كەرى اسەرى بارىن زەرتتەپ جاتقاندا، فرانسيانىڭ لەز-ەپەسس قالاسىنداعى ويىن-ساۋىق ساياباعىنىڭ اكىمشىلىگى بۇل يدەيانى جۇزەگە اسىرۋعا كىرىسىپ كەتكەن. ساياباقتا اۋلانى قوقىس پەن تەمەكى تۇقىلىنان تازارتۋعا ۇلەس قوسام دەگەن قارعالارعا جاڭعاق سىيلايتىن 6 جاشىك ورناتىلعان. ەندى مۇنداعى قۇستاردى ساياباقتا جۇمىس ىستەيتىن ۇجىم قىزمەتكەرلەرى رەتىندە كورۋگە ابدەن بولادى.

اۋدارعان: داۋرەن سىبانباي