بريتاندىق عالىمدار كوڭىلسىز ويلار مەن كۇيزەلىسكە ءجيى ءتۇسۋدىڭ سالدارى تەك قانا پسيحولوگيالىق جاعدايىڭىزعا عانا ەمەس، سىمباتىڭىزعا دا سىزات تۇسىرەتىنىن انىقتاعان دەپ حابارلايدى Qamshy.kz اقپارات اگەنتتىگى.

بەتتىڭ سولعىن تارتۋى، ءاجىم ءتۇسۋى، تەرىنىڭ تەز جيىرىلۋى – بۇنىڭ بارلىعى ءوزىڭىزدى كۇن سايىن جەگىدەي جەگەن ويلاردىڭ جەتەگىندە كەتكەن كەزدە پايدا بولاتىن كەرى اسەرلەردىڭ تولىق ەمەس ءتىزىمى. ويتكەنى ىشكى ويىڭىز اينالاڭىزداعى ادامداردىڭ ءسىزدى قالاي قابىلدايتىنىنا اسەر ەتەدى. سونىمەن قاتار، عالىمدار ونىڭ قانداي ويلار ەكەنىن انىقتاپ، ءسىزدى تارتىمسىز ەتىپ كورسەتەتىن 7 ويدان ارىلۋعا شاقىرادى.

ءوزىڭدى ۇنەمى اياۋ جانە اينالاداعى وقيعالارعا ءجيى شاعىمدانۋ

ەسىڭىزدە ساقتاڭىز، ۇنەمى ۇنجىرعاڭىز ءتۇسىپ، مەنىڭ ەشقاشان جولىم بولمايدى دەپ شاعىمدانا بەرۋ ەشكىمگە جاقسىلىق اكەلمەگەن. اسىرەسە، ايەلدەرگە... سول ءۇشىن ۇيقىم قانبادى، نە بولماسا ەڭبەگىمدى ەشكىم باعالامادى دەگەن ويلارعا ەرە بەرمەڭىز.

ءار كۇنىڭىزدى كوڭىلدى ويلارمەن باستاڭىز – سۇيىكتى ءانىڭىزدى تىڭداڭىز، جەڭىل ماكياج جاساڭىز، ادەمى كيىم كيىڭىز. سونىمەن قاتار، تۇنگى 12-دە جاتىپ، تاڭعى 8-دە تۇراتىنداي ەتىپ كۇنىڭىزدى جوسپارلاڭىز. كۇندەلىكتى سپورتتىق جاتتىعۋلار جاساۋدى دا ۇمىت قالدىرماڭىز. سول كەزدە شاعىمدانۋعا ۋاقىت تاپپاي قالاسىز.  

ءوزىڭدى باعالاماۋ

ەگەر ءسىز كۇن سايىن اينانىڭ الدىندا تۇرىپ، «دەنە ءبىتىمىم ءمىنسىز ەمەس» دەگەن ويعا جول بەرسەڭىز، ومىردە ماحابباتىڭىزدى جولىقتىرىپ، باقىتتى بولا المايسىز. البەتتە، نازىك جاندىلاردىڭ 80%-ى وزدەرىنە كوڭىلى تولمايدى. سول سەبەپتى ءوزىڭىزدىڭ كەمشىلىگىڭىزدى جاقسى كورىپ، كەرىسىنشە ارتىق تۇستارىڭىزدى باعالاۋدى ۇيرەنىڭىز.

اشۋ مەن ادامدارمەن ءجيى قاقتىعىسۋ

ۇنەمى اشۋلانىپ، جانىڭداعى ادامداردان اشۋىڭدى الىپ جۇرەتىن بولساڭىز دەنىڭىز دە ساۋ بولمايدى، سىمباتىڭىز دا كەلىسپەيدى. اشۋ ءسىزدىڭ دەنساۋلىعىڭىزعا پسيحولوگيالىق جاعىنان دا، فيزيكالىق جاعىنان دا وتە زيان. ەگەر اشۋ قىسسا، تەرەڭ تىنىستاپ اينالاڭىزدا بولىپ جاتقان جاقسى جاڭالىقتارعا قۇلاق ءتۇرىڭىز. سونىمەن قاتار، ءسىزدى شىن مانىندە باقىتقا بولەيتىن ىسپەن اينالىسۋعا تىرىسىڭىز.

جوق جەردەن پروبلەما ىزدەۋ

دەنەڭىزدەگى ارتىق سالماق پەن بەتىڭىزدەگى ءاجىمدى ۋايىمداۋدىڭ قاجەتى جوق. ادامداردىڭ بارلىعى ءار ءتۇرلى ءسىز ءۇشىن پروبلەما بولىپ سانالاتىن كەمشىلىكتەر، بىرەۋ ءۇشىن مۇلدەم باسقاشا بولۋى مۇمكىن. ويتكەنى ءبىز كومپلەكستەردى جوق جەردەن ءوزىمىز تاۋىپ الامىز. ءسويتىپ بويىمىزدا سەنىمسىزدىك پايدا بولادى. بۇل ادەتپەن كۇرەسىڭىز. ءسىز وزىڭىزگە سەنىمدى بولساڭىز، ءسىزدىڭ ءتۇرىڭىز دە اجارلانا تۇسەدى.

وتكەن كۇندەرگە وكىنۋ

جاستىق شاق وتەدى. وعان ءسىز ەشتەڭە ىستەي المايسىز. الايدا قازىرگى ادىستەردىڭ ارقاسىندا ۇنەمى ادەمى بولىپ جۇرۋگە بارلىق جاعداي جاسالعان. ءتىپتى 50-60 جاستاعى كىسىلەر وزدەرىن كۇتىپ، سالاۋاتتى ءومىر سالتىن ساقتاپ ادەمى بولۋعا ۇمتىلىپ ءجۇر. ولاردىڭ سۇلۋلىعى جاستاردان كەم تۇسپەيدى. سول ءۇشىن وتكەن كۇندەردى ويلاپ، كۇيزەلىسكە ءتۇسۋدىڭ قاجەتى جوق. پسيحولوگتار قازىرگى ساتپەن ءومىر سۇرۋگە كەڭەس بەرەدى.

كۇندەلىكتى كۇيبەڭ تىرشىلىك

تىرشىلىكتەن قاشىپ قۇتىلا المايسىڭ. كەيدە، ويلاساق شاشىمىز اعاراتىن ىستەر جينالىپ قالۋى مۇمكىن. ونداي ويلاردى سانامىزدا ساقتاماي، الايدا ماڭىزدى ىستەردى ۇمىتىپ كەتپەۋ ءۇشىن، ءموبيلدى قوسىمشالاردى پايدالانۋعا كەڭەس بەرەدى. ءقازىر زامان تالابىنا ساي ونداي ءموبيلدى قوسىمشالاردىڭ سانى جەتىپ ارتىلادى. سول سەبەپتى ءسىز ءۇشىن تەحنيكا قىزمەت ەتسىن. ال ءسىز تەك جاقسىلىق ويلاڭىز.

وزگەلەردى كورە الماۋ

وزگەلەر مەنەن جاقسى ءومىر ءسۇرىپ جاتىر دەگەن ويدىڭ ءوزى ءسىزدىڭ كوڭىل-كۇيىڭىزدى بۇزىپ، سۇلۋلىعىڭىزعا كەرى اسەرىن تيگىزۋى مۇمكىن. قازىرگى تاڭدا الەۋمەتتىك جەلىلەر ارقىلى باي-قۋاتتى ءومىر سۇرەتىن ادامداردىڭ پاراقشاسىن اقتارىپ وتىرىپ سونداي ويعا كەتەرىڭىز انىق. عالىمدار شەتتەن تىس كورە الماۋشىلىق تەز قارتايۋعا اپارىپ سوقتىرادى دەيدى. سول سەبەپتى وزگەلەردىڭ جەڭىسىنە شىنايى قۋانىپ ۇيرەنىڭىز. سوندا عانا ويىڭىز دۇرىستالىپ، ءسىز دە بەلگىلى ءبىر جەتىستىكتەرگە جەتە باستايسىز.

دايىنداعان: مارجان سابەت