گەنناديي گولوۆكين جاڭا باپكەرى دجوناتون بەنكسپەن دايىندىق قالاي جۇرگىزىلىپ جاتقانى تۋرالى بەينەجازبا جاريالادى دەپ حابارلايدى Qamshy.kz اقپارات اگەنتتىگى گولوۆكيننىڭ Youtube  ارناسىنا سىلتەمە جاساپ.

گەنناديي جاتتىعۋ پروسەسسىنەن باسقا لاس-ۆەگاستاعى T-Mobile Arena-دا وتكەن ساۋل الۆارەس - دەنيەل دجەيكوبستىڭ جەكپە-جەگى تۋرالى ايتتى. ول بوكستاعى ۇلكەن شوۋلاردى ساعىنعانىن جانە نە سەبەپتى باپكەرىن اۋىستىرعانىن دا باياندادى.

«ءيا، مۇنى جاڭارۋ دەسەك تە بولادى: كوماندامىزعا جاڭا لەپ كەلدى، بارلىعىنا جاڭا كوزقاراسپەن قاراپ جاتىرمىز. مەن وسىعان دەيىن دۇرىس ەمەس جولمەن جۇردىك دەپ ايتا المايمىن. ءبىز مانساپ جولىمىزدا ءساتتى قادامدار جاسادىق، ءبىراق ءقازىر باسقا جولدار پايدا بولدى. مەن ءوزىمدى ءقازىر بارلىعىن بايقاپ كورۋگە، بىلۋگە تالپىنعان ۇيرەنۋشى سياقتى سەزىنەمىن. ماقسات بار. وتكەن جولمەن ءجۇرۋ مىندەت ەمەس – باسقا جولداردى، باسقا كوزقاراستى دا سىناپ كورۋ كەرەك»، - دەدى گەنناديي گولوۆكين بەينەجازبادا.

ەستەرىڭىزگە سالا كەتسەك، گولوۆكين بەنكستىڭ باپكەرلىگىمەن 8 ماۋسىم كۇنى نيۋ-يورك قالاسىندا كانادالىق ستيۆ روللسپەن جەكپە-جەككە شىعادى.

 ۇسىنعان: مارجان سابەت