وسى كۇنگە شەشىلمەگەن ءبىر ماسەلە – قازاق ءاتى-جونىنىڭ ورىسشالانىپ جازىلۋى دەپ جازادى Qamshy.kz اقپارات اگەنتتىگى.
بۇل ماسەلە جونىندە "تەمىرقازىق" جۋرنالىن شىعارۋشى ءنازىر تورەقۇل ۇلى: "ءبىزدىڭ قازاق حات جازىپ، قول قويسا، كىسى اتىن جازسا ورىسشالاپ كەتەدى: "جامانباي امانبايوۆ" دەپ جازادى. جامانباي حات جازىپ، قول قويسا، وزىدە "امانبايەۆ" دەپ قول قويادى. "-وۆ"، "-ەۆ" دەپ جازىپ وتىرعان جىگىتتەردىڭ وزدەرى سويلەگەندە جامانبايدىڭ ءوزىن عانا ايتادى. ءبىزدىڭ تۇركى ءتىلىنىڭ سالتى، زاڭى وسى: بۇرىنعى اتاقتى بيلەر بىزگە بەلگىلى وزدەرىنىڭ عانا اتتارىمەن تولە بي، قاز داۋىستى قازىبەك، ەدىگە، ماماي، نوعاي، جانىبەك، ايتەكە... بۇلاردىڭ كىمنىڭ بالاسى ەكەنىن ءوز ەلى عانا بىلەدى. بۇرىنعى باتىرلار دا ءوز اتتارىمەن اتالعان – نە پالەننىڭ ۇلى دەپ اتالعان: شورا باتىر، الپامىس باتىر، وراق باتىر، قاراقىپشاق قوبىلاندى، اق بالتىر ۇلى ۋاق، ءماجنۇن ۇلى شۋاق، كەڭەس ۇلى كەنجەباي،بىزبەن جاقىن تۇرىك- ستامبۇلداعى. تاريح بۇلاردى ءبىزدىڭ قاڭلى دەيدى. قازاق ىشىندە قاڭلى رۋىنىڭ كوبى جەتىسۋدا. تۇرىكتىڭ ءتىل سالتى ءدال بىزدىكى سياقتى: بۇلاردىڭ اتاقتى ازاماتتارى ءوز اتتارىمەن عانا اتالادى...ءبىزدىڭ قازاقتىڭ شالا وقىعانى "-وۆ"-قا جەرىك. "-وۆ"-پەن اتىن جازسا، بىلگىش بولا قالادى. تورەلىك بىلگىشتىك "-وۆ"-تا عانا ەمەس ەكەنىن مەششانين قايدان ءبىلسىن؟! گازەت، جۋرنال، جاڭا كىتاپ جازعان كوسەم ازاماتتار، كەڭسەلەر قازاق ءتىلىنىڭ سالتىنا ، زاڭىنا تۇسسە، "وۆ"-تى اقى يەسىنە قايتارىپ، تىلەنشى ۇلى التىنباي، وسكەنباي ۇلى قۇنانباي، قۇنانباي ۇلى اباي دەگەن جولعا تۇسسە، جۇرتىمىزبەن ويلاسۋعا وڭ بولادى"، - دەپ جازعان ەكەن.
ازاماتتاردىڭ تەگىن، اتىن جانە اكەسىنىڭ اتىن جازۋ قازاقستان رەسپۋبليكاسىنىڭ كونستيتۋسياسىمەن، 27.12.1994 جىلعى ازاماتتىق كودەكسپەن، "ۇلتى قازاق ازاماتتاردىڭ تەگى مەن اكەسىنىڭ اتىن جازۋعا بايلانىستى ماسەلەلەردى شەشۋ ءتارتىبى تۋرالى" قازاقستان رەسپۋبليكاسى پرەزيدەنتىنىڭ 1996 جىلعى 02 ساۋىردەگى №2923 جارلىعى، 26.12.2011 جىلعى "نەكە (ەرلى-زايىپتىلىق) جانە وتباسى" زاڭىمەن رەتتەلگەن.
بۇل زاڭدار بويىنشا قازاققا تەگىن(فاميلياسىن) ۇلتتىق داستۇرگە ساي الۋعا بولادى دەلىنگەن. قازىرگى تاڭنىڭ وزىندە تەگى "-وۆ" پەن "-ەۆ"-قا اياقتالاتىن قازاقتاردىڭ سانى جەتەرلىك. بۇل حالىقتىڭ ساناسىنا ءسىڭىپ، ۇيرەنشىكتى بولىپ كەتكەن سەكىلدى. ولار ءتىپتى تەگىنىڭ ورىسشالانىپ تۇرعانىنا ءمان دە بەرمەيدى.
وسى "تەك" تۋرالى ءسوز بولعاندا باۋىرجان مومىشۇلنىڭ ەرلىگىنە، نامىسشىلدىعىنا قايران قالاسىڭ.
"كەڭەس زامانىندا كوممۋنيستىك پارتيانىڭ كوسەمدەرىنىڭ ءبىرى انانتاس ميكويان قازاق حالقىنىڭ قاھارمانى باۋىرجان مومىشۇلىن قابىلدايدى. اڭگىمە بارىسىندا ميكويان باۋىرجان مومىشۇلىنا سۇراق قويىپتى: "وسى سەنىڭ فاميلياڭ نەگە "مومىشيەۆ" ەمەس؟ "مومىشۇلىن" قايدان تاپقانسىڭ؟" باۋىرجان اتامىز تايسالماستان: "ءسىزدىڭ فاميلياڭىز نەگە "ميكويەۆ" ەمەس؟ سوندىقتان مەنىڭ فاميليام "مومىش ۇلى"،-دەپ جاۋاپ قايتارىپتى. ۇلتتىق نامىسى ءۇشىن وسىنداي قادامعا بارعان باۋىرجان اتامىزدىڭ باتىلدىعىن سوناۋ زاماندا "تەمىرقازىق" جانىن سالا ايتقان ەكەن.
