مەرەي قارتتىڭ سوزىنە جازىلعان،  ءانى - ەرلان تولەۋبايدىڭ «ۇلى دالا ۇرانى» اتتى دانيار راحىمبايدىڭ ورىنداۋىندا جاڭا ءان جارىق كوردى، دەپ حابارلايدى Qamshy.kz اقپارات اگەنتتىگى.

ول تۋرالى ەرلان تولەۋباي Facebook الەۋمەتتىك جەلىسىندە ءبولىستى.

"ءاننىڭ دە تۋۋ تاريحى قىزىق. كەيدە كەۋدە تۇكپىرىڭە قوناقتاعان اۋەننىڭ نە ايتقالى تۇرعانىن تاپ باسىپ تاني الماي دىلگىرەسىڭ. سول ىرعاق سەنى تىنىش جاتقىزبايدى، ءتۇن ۇيقىڭدى ءتورت بولەدى. دەگەنمەن مازاڭدى قاشىرىپ، جانىڭدى جاي تاپتىرماعان سول اۋەز، سول ىرعاق شىرىلداعان بالاپاننان ءبىر كۇنى قاناتىن قومداعان قىرانعا اينالادى. مىنە، سول كەزدە سەن ونى ۇشىراتىن باعىت ىزدەيسىڭ. باعىت - ءسوز. ءسوز بولعاندا دا، ءمىردىڭ وعىنداي ءسوز، اۋەننىڭ وزەگىنە ءتۇسىپ كەتەتىن ءسوز! ال كەيدە كەرىسىنشە، كەرەمەت ولەڭ تىڭدايسىڭ. سول ساتتە جۇرەگىڭدە الدەنە شىمىر ەتە تۇسەدى. اقىننىڭ اۋزىنان توگىلگەن سوزگە كوكەيىڭدە اۋەن ىلەسەدى. تۇلا بويىڭا ءدىرىل جۇگىرەدى. بولدى. جاڭا ءان تۋدى دەگەن وسى! ەستەرىڭىزدە بولسا، جىل باسىندا ەلباسى جاستارمەن كەزدەسكەن. سول جيىندا ادۋىندى جاس اقىن مەرەي قارت ءبىر عاجاپ ولەڭ وقىعان ەدى. قۇلاعىما بىردەن اتتىڭ ءدۇبىرى كەلدى. سول ءدۇبىر دومبىرانىڭ كۇمبىرىنە ۇلاستى ما، قوبىزدىڭ ىزىڭىنا جالعاستى ما، ايتەۋىر مەنى وزىنە باۋراپ الدى. قۇلاقتى ايتاسىز، كوزىمە سايىن دالانى ەركىن جايلاعان ساق بابالار ەلەستەگەندەي بولدى... «ۇلى دالا ۇرانى» ءانىم وسىلاي ومىرگە كەلدى. مەرەيىڭ تاسىپ جۇرگىر مەرەي قارت باۋىرىم مەن تالانتتى ءانشى ءىنىم دانيار راقىمبايعا العىسىم شەكسىز! باعاسىن بەرۋ – سىزدەردىڭ شارۋا. ءبىراق تىڭداعاندا قۇلاقتارىڭىزعا تۇلپاردىڭ ءدۇبىرى كەلەرىنە ءسوز بەردىم!"، - دەدى ەرلان تولەۋباي.

♦"ۇلى دالا ۇرانى" ءانىن وسى جەردەن تىڭداي الاسىز       

ۇسىنعان: مارجان سابەت