قازاقستان پرەزيدەنتى قاسىم-جومارت توقايەۆ اكىمدەرگە حالىقپەن كەرى بايلانىس ورناتۋعا تاپسىرما بەرگەننەن كەيىن، ەلوردا اكىمى باقىت سۇلتانوۆ اۋداندىق دەڭگەيدەگى باسشىلاردىڭ جەكە تەلەفون نومىرلەرىن جاريالادى. الايدا ولارمەن سويلەسۋ مۇمكىن ەمەس، دەپ حابارلايدى Qamshy.kz اقپارات اگەنتتىگى Sputnik cايتىنا سىلتەمە جاساپ.

ول تۋرالى Qazaqstan تەلەارناسىنىڭ جاڭالىقتار بولىمىندە ايتىلعان. 

پرەزيدەنتتىڭ تاپسىرماسىنان سوڭ ەكى اي وتكەندە، تەلەارنا ءتىلشىسى نۇر-سۇلتان اكىمى بەرگەن تەلەفون نومىرلەرىنە قوڭىراۋ شالىپ كورىپتى. ءبىراق كەيبىر باسشىلار تەلەفوندارىن كوتەرمەگەن.

"ءقازىر اكىمدەرمەن بايلانىسۋ قيىن. مىسالى، ەسىل اۋدانىنىڭ اكىمى قايرات زاكاريانوۆتىڭ تەلەفونى كۇنى بويى ءوشىرۋلى. الماتى اۋدانىنىڭ اكىمى ادىلبەك سارسەمبايەۆ تەلەفون تۇتقاسىن كوتەرمەدى. Whats اpp جەلىسىنە تاڭەرتەڭ جازعان جازبامىزعا دا كەشكە دەيىن جاۋاپ بەرمەدى"، - دەيدى ءتىلشى.

ال بايقوڭىر اۋدانىنىڭ اكىمى اسقار ەسىلوۆ ورىس تىلىندە قىسقا جاۋاپ بەرىپتى. قايتا حابارلاسام دەگەن اكىم سول كۇيى حابارسىز كەتكەن. اكىمدەردىڭ ىشىندە تەك سارىارقا اۋدانىنىڭ اكىمىمەن بايلانىسۋدىڭ ءساتى تۇسكەن كورىنەدى.

ۇسىنعان: مارجان سابەت