ۇلتتىق ءبىرىڭعاي تەستىلەۋ مەملەكەتتىك گرانتتاردى بولگەن كەزدە سىبايلاس جەمقورلىقتى ازايتۋ ءۇشىن وتكىزىلەدى. بۇل تۋرالى ءبىلىم جانە عىلىم ءمينيسترى كۇلاش ءشامشيدينوۆا مالىمدەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.
"ۇلتتىق ءبىرىڭعاي تەستىلەۋ مەملەكەتتىك گرانتتاردى بولگەن كەزدە جەمقورلىق تاۋەكەلدەرىن ازايتۋ ءۇشىن وتكىزىلەدى. ءبىز تەستىلەۋ جۇيەسىن ودان ءارى جەتىلدىرۋ كەرەك دەپ ويلايمىز. ءقازىر ءبىلىم جۇيەسىندە ىستەيتىن قىزمەتكەرلەرمەن كونسۋلتاسيالىق جۇمىستار ءجۇرىپ جاتىر. ءبىلىم جانە عىلىم مينيسترلىگى جوعارى وقۋ ورنىنا ءتۇسۋ جۇيەسىن جەتىلدىرۋدى كوزدەپ وتىر"، - دەدى ءشامشيدينوۆا جۋرناليستەرگە.
مينيستر مەملەكەتىك گرانتتى ءبولۋ ماڭىزدى پروسەسس ەكەنىن اتاپ ءوتتى.
"ويتكەنى ەلىمىزدىڭ بارلىق ازاماتى وسى گرانتقا ۇمىتتەنەدى. سوندىقتان مينيسترلىكتىڭ مىندەتى – بارىنشا اشىقتىقتى، ازاماتتاردىڭ تەڭ قۇقىعىن، ەڭ باستىسى، گرانتتى ءبولۋ كەزىندە ادىلدىكتى قامتاماسىز ەتۋ. سوندىقتان ءبىز مۇنى وسى پوزيسيا تۇرعىسىنان قاراستىرامىز"، - دەدى ۆەدومستۆو باسشىسى.
ۇسىنعان: مارجان سابەت
