بۇگىنگى تاڭدا جامبىل وڭىرىندە ازاماتتاردى الەۋمەتتىك تۇرعىدان قولداۋ، ولاردى جۇمىسپەن قامتۋ، ازاماتتاردىڭ مارتەبەسىن انىقتاۋ ماسەلەلەرى ءتيىستى دەڭگەيدە اتقارىلىپ كەلەدى. سونىمەن قاتار، جەرگىلىكتى اكىمدىك تاراپىنان ولارعا لايىقتى دەڭگەيدە قولداۋ كورسەتىلۋدە. جامبىل وبلىسىنىڭ اكىمى اسقار مىرزاحمەتوۆتىڭ توراعالىعىمەن وتكەن جيىندا ءبىرىڭعاي جيىنتىق تولەمنىڭ ەنگىزىلۋىنە بايلانىستى، ازاماتتاردىڭ مارتەبەلەرىن وزەكتەندىرۋ جانە وسى باعىتتا بەكىتىلگەن جول كارتالارىنىڭ ورىندالۋ بارىسى قارالدى. وندا كۇن تارتىبىندەگى ماسەلە بويىنشا وبلىس اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ بايانداما جاسادى.

  باسقارما باسشىسىنىڭ ايتۋىنشا، الدىمەن ازاماتتاردىڭ ءبىرىڭعاي جيىنتىق تولەمدى تولەۋ بويىنشا اعىمداعى جىلدىڭ ءى جارتىجىلدىعىنا ارنالعان جوسپارىنىڭ ورىندالۋ بارىسىنا توقتالدى. جالپى، بۇل باعىتتا ءوڭىردىڭ جىلدىق جوسپارىمەن 20969، ال، جارتى جىلدىقتىڭ جوسپارىمەن 6454 ادامدى قامتۋ كوزدەلۋدە. بۇگىندە التى ايلىقتىڭ جوسپارى 3004 ادامعا، ياعني، 46،5 پايىزعا ورىندالعان دەسەك، رەسپۋبليكانىڭ ورتاشا كورسەتكىشى 49،8 پايىزدى قۇراپ وتىر.

  سونداي-اق، جيىن بارىسىندا ازاماتتاردىڭ مارتەبەلەرىن انىقتاۋ جۇمىستارىنىڭ ناتيجەسى دە سارالاندى. بۇگىنگى تاڭدا وبلىس اۋماعىنداعى 207205 ازاماتتىڭ 152048ء-ىنىڭ مارتەبەسى انىقتالىپ، كورسەتكىش 73،4 پايىزعا جەتكەن. بۇل ءوز كەزەگىندە وبلىسىمىزعا ەلىمىزدىڭ وزگە وڭىرلەرى اراسىندا بەسىنشى ساتىعا كوتەرىلۋىنە مۇمكىندىك بەرىپ وتىر. سونىمەن قاتار، مارتەبەسى وزەكتەندىرىلۋگە ءتيىس ازاماتتاردىڭ اراسىنان 4140 ازامات جۇمىسپەن قامتۋدىڭ بەلسەندى شارالارىنا تارتىلعانىن دا ايرىقشا اتاپ وتكەن ءجون.

  اسقار يسابەك ۇلى بۇل جۇمىستاردىڭ ماڭىزدىلىعىن باسا ايتىپ، جۇمىس ناتيجەلىگىن ارتتىرۋ جولىندا جالپى جوسپاردىڭ ءار ايعا بەكىتىلگەن ينديكاتورىن بەلگىلەۋ كەرەكتىگىن تىلگە تيەك ەتتى. سونداي-اق، ءوڭىر باسشىسى جوسپاردى ورىنداۋدا سىلبىرلىق تانىتقان تاراز قالاسى جانە ءبىرقاتار اۋدان باسشىلارىنان جاۋاپتار الدى. جوسپاردى قالايدا ورىنداۋ كەرەكتىگىن العا تارتىپ، ءتيىستى تۇلعالارعا ناقتى تاپسىرمالار جۇكتەدى.

دۋلات ايتباي