جامبىل وبلىسىنىڭ اكىمدىگىندە وبلىس اكىمى اسقار مىرزاحمەتوۆتىڭ توراعالىعىمەن ءوڭىر اۋداندارى مەن تاراز قالاسىندا شاعىن سپورت الاڭشالارىن سالۋ ماسەلەلەرى قارالدى. كۇن تارتىبىندەگى ماسەلە بويىنشا وبلىس اكىمدىگىنىڭ دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ اتقارىلىپ جاتقان جۇمىستار جونىندە باياندادى.

  ايتا كەتۋ كەرەك، بۇعان دەيىن وبلىس  باسشىسىنىڭ تىكەلەي تاپسىرماسىنا سايكەس، وڭىردە بارلىق سپورت نىساندارىنا زەردەلەۋ جۇرگىزىلىپ، ولاردىڭ ىشىندەگى 203 نىساننان ءتۇرلى دەڭگەيدەگى اقاۋلار انىقتالعان بولاتىن. بۇگىندە 132 سپورت نىسانىنا جوندەۋ جۇمىستارى جۇرگىزىلىپ، قالپىنا كەلتىرىلدى. ەندىگى كەزەكتە 68 نىسان بويىنشا جوندەۋ جۇمىستارى جۇرگىزىلمەك. ونىڭ ىشىندە 17 نىسان تاراز قالاسىنا، قالعاندارى اۋداندارعا تيەسىلى.

  اسقار يسابەك ۇلى بۇل جوندەۋ جۇمىستارىن ۋاقىت سوزباي  اياقتاۋدى جۇكتەدى. سونداي-اق، مەكتەپ سپورت زالدارىن تۇرعىندارعا بارىنشا قولجەتىمدى ەتۋ كەرەكتىگىنە ايرىقشا كوڭىل ءبولدى. ءوڭىر باسشىسى مەكتەپ سپورت زالدارىنىڭ جازعى دەمالىستا  جابىق تۇرماۋىن، تەك كەشكى ۋاقىتتا عانا ەمەس، كۇندىزگى مەزەتتە دە تۇرعىنداردىڭ يگىلىگىنە جۇمىس ىستەۋىن قامتاماسىز ەتۋدى باسا ايتتى. بۇعان ءوز كەزەگىندە ءبىلىم باسقارماسى رەتتەۋ، باقىلاۋ شارالارى ارقىلى اتسالىسۋ كەرەك. مەكتەپكە قاراستى سپورت  الاڭشالارىنىڭ دا تۇرعىندارعا قولجەتىمدىلىگىن  نازار ۇستاۋ تاپسىرىلدى.

  باسقوسۋ بارىسىندا سپورت نىسانداردىڭ ماتەريالدىق-تەحنيكالىق بازاسى، ولاردىڭ كۇتىپ ۇستاۋ ماسەلەلەرى دە جان-جاقتى تالقىلاندى. تاراز قالاسىنداعى قولدانىستاعى 200-دەن اسا سپورت الاڭشالارىن بىرنەشە سپورت ءتۇرىن قامتيتىن امبەباپ الاڭشالار رەتىندە ىڭعايلاستىرۋدىڭ ماڭىزدىلىعى ايتىلدى. ءوڭىر باسشىسى بيۋدجەت قاراجاتىن كەرەكسىز دۇنيەلەرگە جۇمساۋدان گورى، وسىنداي يگىلىكتى ىستەرگە ۇتىمدى پايدالانۋ كەرەكتىگىن، بۇل باعىتتا حالىقتىڭ سۇرانىسىن قاناعاتتاندىرۋ ايتارلىقتاي قوماقتى قاراجاتتى قاجەت ەتپەيتىندىگىن تىلگە تيەك ەتتى.

  سونداي-اق، جيىندا وبلىس بويىنشا سپورت الاڭشالارىنىڭ جالپى قاجەتتىلىگى سارالاندى. باسقارما باسشىسى تۇرعىنداردىڭ ۇسىنىس-سۇرانىستارى مەن باسقارمانىڭ زەردەلەۋ جۇمىستارىنىڭ ناتيجەسىندە وڭىردە بارلىعى 200-دەن استام سپورت الاڭشاسىنىڭ قاجەتتىلىگى انىقتالعانىن جەتكىزدى. ونىڭ 86-سى وبلىس ورتالىعىنا تيەسىلى بولىپ وتىر. اسقار يسابەك ۇلى بۇل قاجەتتىلىكتەردى ءبىر جىلدىڭ ىشىندە شەشۋ كەرەكتىگىن اتاپ ءوتىپ، ول ءۇشىن جاۋاپتى تۇلعالارعا ناقتى تاپسىرمالار جۇكتەدى.  بۇل باعىتتا ءتيىستى ەسەپتەۋلەر مەن تالداۋلار جۇرگىزۋ، جۇمىس جوسپارىن قۇرۋ ءۇشىن جاۋاپتى تۇلعالارعا ناقتى تاپسىرمالار جولدانىپ،  بەس كۇن ۋاقىت بەرىلدى.

دۋلات ايتباي