پاۆلودارلىق بالاقاي ءبىر جىلدان استام ۋاقىت جانساقتاۋ بولىمىندە جاتىر. اۋرۋحاناعا ءسابي مانۋالدى تەراپيەۆتىڭ قابىلداۋىنان كەيىن تۇسكەن دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ. 

ناقتىراق ايتساق 2 جاستاعى كارىم تاڭىربەرگەنوۆ 475 كۇننەن بەرى ءومىر مەن ءولىمنىڭ اراسىندا جاتىر. تەراپيەۆت مامان بالانىڭ ومىرتقاسىنا زاقىم كەلتىرگەن.

سوڭعى ءبىر جارىم جىلدان بەرى پاۆلودار قالاسىنىڭ تۇرعىنى گۇلميرا جانايداروۆا ءوز پەرزەنتىن امان الىپ قالۋ ءۇشىن كۇرەسىپ كەلەدى. ول ۇلىنىڭ 7 ايلىق كەزىندە ەمدەتۋ ءۇشىن جەكە مانۋالدى دارىگەردىڭ قابىلداۋىنا جازىلعان. 

–ول بالامدى قاراپ شىعىپ، مويىن بولىگىندە تۋا بىتكەن جاراقات بار دەدى. كارىمدى قولىنا الىپ ءوزىنىڭ ەم-دومىن جۇرگىزە باستادى. ۋقالاۋ كەزىندە بالامنىڭ دەنەسىنىڭ قاتتى سىتىرى ەستىلدى. سول ەمنەن كەيىن، پەرزەنتىمنىڭ جاعدايى بىرتە-بىرتە ناشارلاپ، جانساقتاۋ بولىمىنەن ءبىر -اق شىقتىق، - دەدى اناسى گۇلميرا جانايداروۆا.

بالانى مۇقيات تەكسەرۋدەن وتكىزگەن اق حالاتتىلار 7 ايلىق كارىمنىڭ جەلكە بولىگىندەگى ەكى ومىرتقانىڭ ۇساقتالىپ سىنعانىن، ءارى قاتپاعان سۇيەك ورنىنان جىلجىپ كەتكەنىن انىقتاعان. مۇنى كورگەن دارىگەرلەر بالاقايدىڭ مۇنداي دارەجەگە قالاي جەتكەنىنە تاڭ قالىپ وتىر. ولار جاعدايى ءسات سايىن ناشارلاعان ءبۇلدىرشىندى دەرەۋ جانساقتاۋ بولىمىنە جاتقىزعان. جاساندى اۋا جەتكىزگىش قۇرىلعىمەن دەمالىپ جاتقان ءبۇلدىرشىن 16 ايدان بەرى ولىممەن كۇرەسىپ كەلەدى.

–جاعدايىنىڭ ناشارلاۋى - بۇل زاڭدى قۇبىلىس. سەبەبى، بالانىڭ جاعدايى كۇننەن-كۇنگە وزگەرىپ وتىرادى. سوندىقتان، بۇلدىرشىنگە شۇعىل تۇردە وتا جاساۋ قاجەت. بۇل ونىڭ ءومىر سۇرۋىنە بەرىلىپ وتىرعان سوڭعى مۇمكىندىك، - دەيدى وبلىستىق بالالار اۋرۋحاناسى باسشىسىنىڭ ورىنباسارى يرينا ورساگوش. 

اتا-اناسىنىڭ ءۇمىتىن وياتقان كۇردەلى وتانى جاساۋعا رەسەيلىك ماماندار نيەتتى بولىپ وتىر. ءبىراق، كارىمنىڭ دەنساۋلىعى ناشار بولۋىنا بايلانىستى، ونى ۇزاق ۋاقىت قالادان شىعارۋعا مۇمكىندىك بولماپتى. تەك، بۇگىن دارىگەرلەر سانيتارلىق اۆياسيامەن بالاقايدى ەلوردالىق نەيروحيرۋرگيا ورتالىعىنا جەتكىزدى. بولجام بويىنشا سول جەردە وتا جاسالادى ەكەن. ال، ءسابيدى مۇنداي جاعدايعا تۇسىرگەن تەراپيەۆت ءالى بوستاندىقتا ءجۇر.

–قازىرگى تاڭدا پوليسيا قىزمەتكەرلەرىمەن قىلمىستىق كودەكستىڭ 317-بابىمەن سوتقا دەيىنگى تەرگەۋ جۇرىزىلۋدە. تەرگەۋ بارىسىندا قوسىمشا ساراپتامالار تاعايىندالدى. ولاردىڭ ناتيجەلەرى بويىنشا پروسەسسۋالدىق شەشىم قابىلدانادى، - دەپ مالىمدەدى وبلىستىق پوليسيا دەپارتامەنتىنىڭ باسپا ءسوز حاتشىسى الما مۇسابەكوۆا. 

قولدا بار اقپاراتقا سۇيەنسەك، ەكىباستۇز قالاسىنداعى قوناق ۇيلەردىڭ بىرىندە قابىلداۋ جۇرگىزگەن مامان ءوز جۇمىسىن قازاقستاننىڭ باسقا دا وڭىرلەرىندە جالعاستىرىپ ءجۇر.

ۇسىنعان: مارجان سابەت