وبلىس اكىمى ەرالى توعجانوۆ مەملەكەتتىك رامىزدەر كۇنىنە ارنالعان مەرەكەلىك شارانىڭ قۇتىقتاۋ سوزىندە ماڭعىستاۋ اتاۋىنىڭ مىڭ جىلدىعىنا وراي، ايماقتا جۇزدەگەن ءىس شارا ۇيىمداستىرىلاتىنىن مالىمدەدى. ەلىمىزدە تۋعان جەرگە دەگەن وتانشىلدىق يدەياسىن قالىپتاستىرىپ، بىرلىگىمىز بەن ىنتىماعىمىزدى نىعايتاتىن مەملەكەتتىك رامىزدەردىڭ مەرەيلى مەرەكەسىن جىل سايىن اتاپ ءوتۋ داستۇرگە اينالعان. 

تاعلىمى مول «ماڭعىستاۋدىڭ مىڭ جىلدىعى» اتاۋلى داتاسىن رەسمي تۇردە جاريالاۋ مەملەكەتتىك رامىزدەر كۇنىمەن تۇسپا-تۇس كەلۋى كەزدەيسوقتىق ەمەس دەدى ءوڭىر باسشىسى. ەرالى توعجانوۆ: «ءبىز بىرلىك پەن تاتۋلىقتىڭ ارقاسىندا تاۋەلسىزدىگىمىزدى تۇعىرىنا قوندىرىپ، ماڭگىلىك ەل قۇردىق. مەملەكەتتىك تۋ، ەلتاڭبا، گيمن – تاۋەلسىزدىكتىڭ سيمۆولى، ەلدىكتىڭ نىشانى بولسا، «ماڭعىستاۋدىڭ مىڭجىلدىعى» ولكەمىزدىڭ سيمۆولى، ءتۇپ-تامىرىمىز تەرەڭ ەكەندىگىنىڭ ايشىقتى دالەلى. مەملەكەتتىك رامىزدەردە اتا-بابالارىمىزدىڭ وتكەن جولى مەن تاريحى كورىنىس تاپسا، سول تاريحتى تەرەڭ تانۋ، وسكەلەڭ ۇرپاققا ناسيحاتتاۋ ءبىزدىڭ، اعا بۋىننىڭ اسىل پارىزى»،- دەپ اتاپ ءوتتى. 

وڭىردە ماڭعىستاۋدىڭ تاريحىن جۇيەلەۋ ماقساتىندا وبلىس اكىمىنىڭ تاپسىرماسىنا سايكەس كەشەندى عىلىمي زەرتتەۋلەر، حالىقارالىق دەڭگەيدە ەكسپەديسيالار مەن كونفەرەنسيالار ىسكە اسقان بولاتىن. ناتيجەسىندە تاريح بەتىندە 1000 جىل بۇرىن ماڭعىستاۋ اتاۋىنىڭ پايدا بولعانى دالەلدەندى. 
ءبىر جىل التى اي ىشىندە 7 ەلدىڭ 70-كە جۋىق عالىمدارىنىڭ ماڭعىستاۋ مۇرالارىن زەرتتەۋدەگى كەشەندى جۇمىستارىنىڭ ناتيجەسىندە «ماڭعىستاۋ اتاۋىنىڭ مىڭ جىلدىعى» ناقتىلاندى.

اتاۋلى داتا اياسىندا وبلىسىمىزدا «تاريح تولقىنى: ماڭعىستاۋدىڭ مىڭ جىلدىعى» حالىقارالىق عىلىمي كونفەرەنسياسى ۇيىمداستىرىلىپ، ۇلى جىبەك جولىنداعى التىنقازعان، قاراقاباق، قىزىلقالا، كەتىكقالا قالاشىقتارىنا كەشەندى ارحەولوگيالىق قازبا جۇمىستارىن جۇرگىزۋ، جەر استى مەشىتتەرى مەن تاڭبالى تاستارىن عىلىمي زەرتتەۋ، ولاردى قورعاۋعا الۋ شارالارىن قابىلداۋ ءىس-شارالارى جوسپارلانۋدا. سونىمەن قاتار، تاريحي - ارحەولوگيالىق ەسكەركىشتەرگە قىزىعۋشىلىق تانىتقان دۇنيەجۇزىلىك National Geographic جانە فرانسيالىق Pernel Media كومپانيالار وبلىسىمىزدا دەرەكتى فيلمدەر تۇسىرەدى.