شىعىس قازاقستاندا بيىل وسىمەن ەكىنشى رەت ءجۇز شاقىرىمنان ارتىق قاشىقتىققا بەلگىلەنگەن الامان ءوتتى. اعىمداعى ناۋرىزدىڭ باسىندا زايسان اۋدانىندا بولعان 130 شاقىرىمدىق بايگەنىڭ ءدۇبىرى باسىلماي جاتىپ مىنەكي تارباعاتاي توپىراعىندا 140 شاقىرىمعا سوزىلعان الامان ۇيىمداستىرىلدى. بۇل تۋرالى Qamshy.kz اقپارات اگەنتتىگى حابارلايدى.

قازاقتىڭ قازاناتتارىن سىنعا سالعان ءدۇبىرلى جارىس ەڭ اۋەلى «رۋحاني جاڭعىرۋ» باعدارلاماسىنان باستاۋ العان «تۇعىرى بيىك تارباعاتاي» فەستيۆالى اياسىندا «ۇلى دالا قازاناتى» دەگەن اتپەن بارقىتبەل باۋىرىندا وتكەنىن ايتا كەتەيىك. بۇل الامانعا بەرىسى ەلىمىزدىڭ تۇكپىر-تۇكپىرىنەن، ارىسى كورشى رەسەيدەن جۇلدەدەن دامەلى قىلقۇيرىقتار جينالدى. اۋەلدە اتتاردىڭ قاتارى جۇزگە تارتا ەدى، ءبىراق جارىس جولىنا 88 ۇمىتكەر شىقتى. ماۋسىمنىڭ 16-سى كۇنى تاڭ قىلاڭ بەرە اتقۇمار اعايىن كوكپەكتى اۋدانىنان شابوندوزداردى شىعارىپ سالىپ، تارباعاتاي اۋدانىنىڭ ورتالىعى اقسۋاتقا قاراي بەت تۇزەگەن-دى. شاباندوزدارمەن بىرگە جارىستىڭ تورەشىلەرى مەن باقىلاۋشىلارى دا كولىككە ءمىنىپ قاتار ەرىپ وتىردى. قاتىسۋشىلار ءۇشىن ءار وتىز شاقىرىم سايىن تىگىلگەن كيىز ۇيگە تىزگىن تارتىپ، ءسال تىنىستاپ، ءشول باسىپ الۋعا مۇمكىندىك جاسالدى.

ءسويتىپ تاڭعى ساعات 4:00-دە «ءيا ءسات!» دەپ جارىسقا شىققان جۇيرىكتەردىڭ الدى اراعا سەگىز ساعاتتان استام ۋاقىت جۇمساپ مارەگە تايادى. كوپتەن قارا ءۇزىپ كەلە جاتقان ەكەۋدىڭ الدىڭعىسى اقسۋات اۋىلىنىڭ تۇرعىنى الماس امىرعالييەۆتىڭ كۇرەڭ قاسقاسى ەدى. مارەگە ءبىرىنشى بولىپ سول جەتتى. ونىڭ ءىزىن الا كاتونقاراعايلىق قۋانىش تۇرسىنبەكوۆتىڭ كۇرەڭى كەلدى. ۇزدىك ۇشتىكتى تاعى ءبىر كاتونقاراعاي اۋدانىنىڭ تۇلپارى تۇيىندەدى. ايتپاقشى، ەكىنشى كەلگەن كۇرەڭ ات زايسانداعى 130 شاقىرىمدىق الاماندا دا كۇمىس جۇلدەگەر اتانعان. ءسويتىپ، ۇيىمداستىرۋشىلاردىڭ ۇيعارىمى بويىنشا بايگەگە تىگىلگەن ەكى تەمىر تۇلپاردىڭ كىلتى الاماننىڭ الدىن بەرمەگەن قوس كۇرەڭنىڭ يەسىنە تابىستالدى. مارە سىزىعىن كەسىپ وتكەن قالعان 13 اتتىڭ يەسى دە سىي-سياپاتتان قۇر قول قالعان جوق.

– مۇنداي ۇزاق قاشىقتىقتاعى الامان اتتارعا دا، شاباندوزدارعا دا وڭايعا سوققان جوق. جولدا ءبىراز قيىندىقتار بولدى. سوعان قاراماستان استىمداعى اتىم مىقتىلىعىن كورسەتىپ، مارەگە ءبىرىنشى جەتتى. ارينە، مەن بايگە كەزىندە اتىمنىڭ ءجۇرىسىن، جالپى جاعدايىن باقىلاپ وتىردىم. سونىڭ ارقاسىندا جەڭىم اتاندىم، - دەيدى 140 شاقىرىمدىق الاماندا الدىنا قارا سالماعان كۇرەڭ قاسقانىڭ شاباندوزى رۋسلان شايىرعازين.

ايتا كەتەيىك، «تۇعىرى بيىك تارباعاتاي» اتتى فەستيۆال اياسىندا وتكەن 140 شاقىرىمدىق الاماننان بولەك، اقسۋاتتىڭ اتشابارىندا تاي جارىسى، جورعا جارىس، 25 شاقىرىمدىق بايگە ۇيىمداستىرىلدى. بۇل جارىستاردىڭ جەڭىمپازدارى مەن جۇلدەگەرلەرى دە باعالى سىيلىقتارعا يە بولدى. جالپى تارباعاتايداعى ات جارىستارىنا ءتورت بىردەي تەمىر تۇلپار تىگىلدى.