بولجاممەن بەس-التى جىلدان كەيىن قازاقستاندا نەكە قياتىندار سانى ەڭ جوعارى شەككە جەتەدى. بۇل تۋرالى ق ر ۇلتتىق ەكونوميكا ءمينيسترى رۋسلان دالەنوۆ حالىققا ەسەپ بەرۋ كەزدەسۋىندە ايتتى دەپ حابارلايدى Qamshy.kz اقپارات اگەنتتىگى Sputnik قازاقستان  سايتىنا سىلتەمە جاساپ

حالىققا ەسەپ بەرۋ كەزدەسۋىندە ەلوردالىق تۇرعىن مينيستردەن زامانداستارى اراسىندا شاڭىراق كوتەرگەندەر از ەكەنىن ايتىپ، "نەكەلەسۋ سانىنىڭ ازايۋى ەلدىڭ ەكونوميكالىق جاعدايىمەن بايلانىستى ما؟" دەپ سۇرادى.

مۇنداي سۇراقتى كۇتپەگەن بولۋى كەرەك، مينيستر دالەنوۆ تە، زالدا وتىرعان قوناقتار دا ءبىر كۇلىپ الدى.

"ەكونوميست رەتىندە، مەن ءۇشىن بارلىعى ەكونوميكامەن بايلانىستى. ب ا ق بەتىندە سوڭعى كەزدە اجىراساتىندار قاتارى ارتىپ بارادى دەگەن ماسەلە ءجيى كوتەرىلگەن سوڭ، تاياۋدا مەن ستاتيستيكانى قاراپ شىقتىم. بىزدە جىل سايىن 140 مىڭ ادام نەكەسىن قيادى ەكەن، ءبىراق، وكىنىشكە قاراي، 55 مىڭى اجىراسادى"، - دەدى مينيستر.

ول قازىرگى تاڭدا جاستار اراسىندا نەكەلەسۋ سانىنىڭ ازايۋى 90-شى جىلدارداعى دەموگرافيامەن بايلانىستى ەكەنىن ايتتى.

"توقسانىنشى جىلدارى دۇنيەگە كەلگەندەر ءقازىر وتباسىن قۇراتىن جاسقا جەتىپ قالدى. ءبىراق ولاردىڭ سانى كوپ ەمەس، سوندىقتان نەكەلەسۋدىڭ تومەندەۋى وسىمەن بايلانىستى"، - دەدى دالەنوۆ.

مينيستر بولجاممەن بەس-التى جىلدان كەيىن نەكەلەسەتىندەر سانى 2015 جىلعى كورسەتكىشتەن اسىپ تۇسەتىنىن جەتكىزدى. وسىدان ءتورت جىل بۇرىن ەلىمىزدە 150 مىڭ نەكە قيىلعان ەكەن.

وسى ورايدا دالەنوۆ تۇرمىس قۇرماعان قىزدارعا قىزىقتى ستاتيستيكانى مىسالعا كەلتىردى.

"قىزىق ءۇشىن ايتايىن، اسىرەسە جاس قىزدارعا قاجەت بولار. ەگەر نەكە قيۋ ديناميكاسىن قاراساق، قازان ايىندا وتاۋ قۇراتىندار كوپ ەكەن، شامامەن 13،5 مىڭ نەكە قيىلعان. ال ەڭ قولايسىز مەزگىل – اقپان ايى، 8،5 مىڭ نەكە. مىنە، وسىنداي قىزىق ستاتيستيكا"، - دەدى ۆەدومستۆو باسشىسى.