ارىس قالاسىنداعى اپاتتى جاعدايدى كوزبەن كورگەن ايگەرىم ۋالييەۆا Qamshy.kz اقپارات اگەنتتىگىنە جارىلىس وقيعاسى تۋرالى پىكىر ءبىلدىرىپ، ءبىرشاما اقپارات بەردى.

"ءبىز جارىلىستى كوزبەن كوردىك. ءۇيدىڭ ءىشى دىرىلدەپ، تەرەزەلەر سىندى. جەلىدە 2 ادام قايتىس بولدى دەپ جاتىر. ءبىراق، بۇل – حالىقتىڭ پىكىرىنشە، مۇلدەم جالعان اقپارات. جولدا كولىك استىنا ءتۇسىپ كەتىپ جاتقان بالالار بولدى. جان-جاقتاعى قالا تۇرعىندارىنىڭ ايتۋىنشا، 1000-نان استام ادام قايتىس بولدى. ءبىراق مۇنى ناقتى فاكت دەۋگە كەلمەيدى. جولداسىمنىڭ تۋىستارى جاعىنان، ءوزىمنىڭ تۋىستارىم جاعىنان ءىز-تۇسسىز كەتكەن ادامدار بار. ءولى-تىرىسىن بىلمەيمىز"، - دەيدى وقيعا كۋاگەرى.

ايگەرىم ۋالييەۆانىڭ ايتۋىنشا، جول-كولىك كەپتەلىسى سۇمدىق بولعان. شىمكەنتكە ءبىر جارىم ساعاتتا جەتەتىن جۇرت كەشە ون ساعاتقا جاقىن ۋاقىتتا ازەر ءىلىنىپتى.

رادياسيا بولمادى دەگەن فاكت – وتىرىك

"قالادا العاش جارىلىس بولعان كەزدە مۇرىنىمىزعا كۇلىمسى ءيىس كەلدى. ال گارنيزون قالادان التى-جەتى شاقىرىم الىستا تۇر. ىستىق لەپ سوقتى. بۇل رادياسيا ما، باسقا بىلمەيمىن. ءبىراق ءبىز شىمكەنتكە كەتىپ بارا جاتقان كەزدە، ارىس قالاسىنان وتىز شاقىرىمداي ۇزاعاندا دا سناريادتار كولىك اينالاسىنا ءتۇسىپ جاتتى"، - دەيدى ول.

ارىستىقتار پانالاعان اقادىر دا ورتەندى

قالادا جارىلىس بولعان ساتتە تۇرعىندار شاھار سىرتىنا قاراي قاشتى. جوتالارعا شىققان ولار اقادىر دەگەن جەردى مەكەندەگەن. ادامداردى ەۆاكۋاسيالاپ بول بەرگەن ساتتە ءدال سول اقادىرعا سنارياد ءتۇسىپ، ورتكە ورانىپتى. ابىروي بولعاندا ول جەردەن زارداپ شەككەندەر جوق.

حالىق نارازى

ارىستاعى جاعداي تۋرالى پىكىر بەرگەن كۋاگەر ايگەرىمنىڭ ايتۋىنشا، حالىقتىڭ باسىم كوپشىلىگى ينتەرنەتتەگى جاڭالىقتارعا، ناقتى ساندارعا كوڭىلدەرى تولمايدى. ولاردىڭ ويىنشا، بارلىق فاكتىلەر كىشىرەيتىلىپ بەرىلۋدە. سونداي-اق، ەۆاكۋاسيالانعان ادامدار اراسىندا ميتينگ ۇيىمداستىرۋعا تالپىنىپ جۇرگەندەر دە بار.

ەسكەرتۋ!

Qamshy.kz اقپارات اگەنتتىگى كۋاگەر ءسوزىن اينا-قاتەسىز بەردى.