بۇگىن ءماجىلىستىڭ جالپى وتىرىسىندا دەپۋتاتتار 2019-2021 جىلدارعا ارنالعان رەسپۋبليكالىق بيۋدجەتكە تۇزەتۋلەردى ماقۇلدادى. وسى رەتتە، پالاتا سپيكەرى نۇرلان نىعماتۋلين مەملەكەت قابىلداعان الەۋمەتتىك شارالار حالىقتىڭ كوپتەگەن پروبلەمالارىن شەشۋگە مۇمكىندىك بەرەتىنىن ايتتى دەپ حابارلايدى Qamshy.kz اقپارات اگەنتتىگى.
“وزدەرىڭىزگە بەلگىلى، ەلباسىمىز نۇرسۇلتان ءابىش ۇلى نازاربايەۆتىڭ الەۋمەتتىك ستراتەگيالىق باستامالارىن ودان ءارى جالعاستىرۋ ماقساتىندا مەملەكەت باسشىسى قاسىم-جومارت توقايەۆ ارنايى تاپسىرمالار جۇكتەگەن بولاتىن. وسىعان بايلانىستى، تۇرمىسى تومەن ازاماتتارعا جان-جاقتى قولداۋ كورسەتۋ ءۇشىن، حالقىمىزدىڭ الەۋمەتتىك جاعدايىن كۇشەيتۋ ءۇشىن ناقتى شارالار قولعا الىنۋدا. سوندىقتان، وسى ءۇش جىلدىق بيۋدجەتكە ەنگىزگەن وزگەرىستەر بارلىق الەۋمەتتىك تاپسىرمالاردى جەتكىلىكتى قاراجاتپەن قامتاماسىز ەتۋگە زور ىقپال ەتەتىن بولادى”، - دەدى نىعماتۋلين.
سونداي-اق، ءماجىلىس ءتوراعاسى ورتالىق جانە جەرگىلىكتى مەملەكەتتىك ورگاندار قيىن ومىرلىك جاعدايعا تاپ بولعان ادامدارعا كومەكتەسۋ جاعىن ۇيىمداستىرۋى كەرەكتىگىنە باسا نازار اۋداردى.
وسىعان بايلانىستى نۇرلان نىعماتۋلين بولىنگەن قاراجاتتى پايدالانۋدىڭ تيىمدىلىگىنە نازار اۋدارىپ، ءماجىلىس دەپۋتاتتارى وسى ماسەلەنى مۇقيات قاراپ، قول جەتكىزىلگەن ناتيجەلەردى تالداۋعا نيەتتى ەكەنىن اتاپ ءوتتى.
“ءبارىمىز، ۇكىمەت پەن دەپۋتاتتىق كورپۋستىڭ مۇشەلەرى، حالىق اراسىندا ءتۇسىندىرۋ جۇمىستارىن جۇرگىزۋىمىز كەرەك”، - دەدى ءماجىلىس ءتوراعاسى.
نىعماتۋلين سەسسيا اياقتالعاننان كەيىن دەپۋتاتتار وڭىرلەرگە بارعان كەزدە وسى جۇمىسقا بەلسەنە اتسالىسۋى كەرەكتىگىنە توقتالدى.
سونىمەن قاتار، بۇگىنگى پالاتانىڭ ءتورتىنشى سەسسياداعى سوڭعى جالپى وتىرىسىندا ءماجىلىس ءتوراعاسى نۇرلان نىعماتۋلين وتكەن سەسسيا جۇمىسىن قورىتىندىلادى. ءوز سوزىندە ءماجىلىس سپيكەرى:
“بۇگىن ءبىز ءتورتىنشى سەسسياداعى ءماجىلىستىڭ سوڭعى جالپى وتىرىسىن وتكىزىپ وتىرمىز. وزدەرىڭىز بىلەسىزدەر، بۇل سەسسيا ءماجىلىس تاريحىنداعى ماڭىزدى كەزەڭدەردىڭ ءبىرى بولدى. وسىعان وراي، ەلىمىزگە، حالقىمىزعا قاجەتتى كوپتەگەن زاڭدار قابىلداندى. كوپتەگەن پارلامەنتتىك شارالار ءوتتى. ولاردىڭ بارلىعى، ەڭ الدىمەن ەلباسىمىز نۇرسۇلتان ءابىش ۇلى نازاربايەۆتىڭ الەۋمەتتىك-ەكونوميكالىق، ستراتەگيالىق مىندەتتەرىن ورىنداۋعا ارنالدى. سونىمەن بىرگە، مەملەكەت باسشىسى قاسىم-جومارت توقايەۆتىڭ العا قويعان تاپسىرمالارىن جۇزەگە اسىرۋعا باعىتتالدى”، - دەدى.
