ءاربىر جاس ەل بولاشاعى ءۇشىن جاسالىپ جاتقان يگى باستامالاردان تىس قالماۋى ءتيىس. ەل ۇلانى رەتىندە قوعامدىق وزگەرىستەرگە وزىنشە ءۇن قوسىپ، ورنىقتى وي ايتا ءبىلۋ – پەرزەنتتىك پارىزدارىنىڭ ءبىرى. سول سەبەپتى قازۇۋ، زاڭ فاكۋلتەتىنىڭ «ەلتۇتقا» پىكىرتالاس ۇيىمىنىڭ ۇيىتقى بولۋىمەن ۋنيۆەرسيتەتارالىق «قازاقستان-2050» ستراتەگياسىنىڭ ءمان-ماڭىزى اتتى پىكىرسايىس ءتۋرنيرى ءوتت. پىكىرسايىسقا ەلىمىزدىڭ بەس جوعارعى وقۋ ورىندارىنىڭ كوماندالارى، اتاپ ايتقاندا قارجى پوليسياسى اكدەمياسى، ت.رىسقۇلوۆ اتىنداعى قازەۋ، اباي اتىنداعى قازۇپۋ، م.اۋەزوۆ اتىنداعى وقمۋ جانە ءال-فارابي اتىنداعى قازۇۋ قاتىستى.
پىكىرتالاس تۋرنيرىندە سايىسكەرلەر ««ەحرو-2017» كورمەسىنىڭ قازاقستاندا وتكىزىلۋى اقتالادى ما؟»، «قازاقستان-2050» ستراتەگياسىنىڭ ءمانى قانداي؟»، «الەمدىك كۇش باتىستان شىعىسقا قاراي اۋىسىپ جاتىر ما؟» دەگەن سەكىلدى تاقىرىپتار توڭىرەگىندە پىكىر الماسىپ، ورنىقتى ويلارىن ايتتى. قازۇۋ-دىڭ «التىن ساپا» كومانداسىنىڭ سپيكەرى الدوڭعاروۆ قۇرالبەك «ەحرو-2017» كورمەسى تۋرالى: «بۇل كورمەدە قاتىسۋشى ءار ءبىر ەل ءوزىنىڭ يننوۆاسياسىن، جاڭا تەحنولوگياسىن الىپ كەلمەك. شەتەلدەرمەن تاجىريبە الماسۋعا مۇمكىندىكتەر تۋادى. سونىمەن قاتار، تاريحتان بەلگىلى وسى كورمەنىڭ وتكىزىلۋى كوپتەگەن ءىرى قالالاردىڭ ۇلكەيىپ، الەمگە تانىلۋىنا اسەر ەتتى. سول سەكىلدى استانا قالاسىنىڭ دا تانىلۋىنا، ينفراسترۋكتۋراسىنىڭ جاقسارۋىنا، تۋريستىك ورىندارىمىزدىڭ جاندانۋىنا، جاڭا عيماراتتاردىڭ سالىنۋىنا الىپ كەلەدى. ءبىر سوزبەن ايتقاندا ەلىمىزدىڭ ابىرويىن كوتەرىپ، ەكونوميكامىزدىڭ وسۋىنە وڭ اسەر ەتەدى»، - دەسە، قارسى توپتىڭ سپيكەرى، قارجى پوليسياسى اكادەمياسىنىڭ ستۋدەنتى بايتەنوۆ بەرنار: «ءبىزدىڭ مۇنداي ءىرى جوبانى جاۋاپكەرشىلىككە العانىمىزبەن، ونى ءوز دەڭگەيىندە وتكىزە الاتىنىمىزعا سەنىمدى ەمەسپىز. «ەحرو» وتە ۇلكەن جوبا، ۇلكەن قارجى مەن قاراقەتتى قاجەت ەتەدى. ال مۇنىڭ بارلىعىنا ءبىزدىڭ ەلدىڭ ەكونوميكاسى قانشالىقتى قاۋقارلى؟» ،− دەيدى.
ەكى كۇنگە سوزىلعان تۋرنير قارجى پوليسياسى اكدەمياسى مەن ءال-فارابي اتىنداعى قازۇۋ كوماندالارىنىڭ تەڭ تۇسۋىمەن اياقتالدى. ستۋدەنتتەر ماراپاتتالىپ، سىي-قۇرمەت جاسالدى. قازۇۋ، زاڭ فاكۋلتەتىنىڭ قىلمىستىق قۇقىق، قىلمىستىق ءىس جۇرگىزۋ جانە كريميناليستيكا كافەدراسىنىڭ مەڭگەرۋشىسى دجانسارايەۆا ريما ەرەناتقىزىنا جانە «ەلتۇتقا» پىكىرتالاس ۇيىمىنىڭ ءتوراعاسى امىربەك اسقارعا قارجى پوليسياسى اكادەمياسى اتىنان ارنايى «العىسحات» تابىس ەتىلدى.
مۇنداي ءتۋرنيردىڭ وتكىزىلۋى ەلىمىزدىڭ بەلسەندى جاستارىن ءبىر ورتاعا بىرىكتىرۋدە، وسكەلەڭ ۇرپاقتىڭ ەلدىك ىستەرگە كەلگەندە ىنتىماقتاستىقتا بولۋىن جاقسارتۋدا ماڭىزى زور. بۇل تۋراسىندا زاڭ فاكۋلتەتىنىڭ دوسەنتى ورىنباسار تىلەپبەرگەنوۆ: «بۇل تۋرنير قازاقستانداعى جوعارعى وقۋ ورىندارىنداعى بولاشاق ساپالى كادرلاردى دايىنداۋ ماقساتىندا جاسالىپ جاتقان شارالاردىڭ ءبىرى. جاستارىمىزدىڭ ەلدىڭ ساياسي جاعدايىنا، ەكونوميكالىق دامۋىنا قوسقان بەلگىلى ءبىر ۇلەسى دەپ قابىلداۋ كەرەك» ،− دەپ تۇيىندەدى شارانى.
جانيا ابدىبەك
پىكىر قالدىرۋ