رەسەيدىڭ  يۋرمالا قالاسىندا وتەتىن "جاڭا تولقىن-2013" اتتى بايقاۋدا قازاقستاننىڭ اتىنان دينارا ادامنىڭ  جاڭا جوباسى  ADAM ەسىمدى  ءانشى  سايىسقا تۇسەدى. بايقاۋدىڭ ماسكەۋدە وتكەن سوڭعى ىرىكتەۋ كەزەڭىندە ADAM قازىلار القاسىن ەرەكشە داۋسىمەن ءتانتى ەتكەن بولاتىن. 

سوڭعى جىلدارى جۇلدىز بولۋدى ارماندايتىن جاس انشىلەردى جارىققا شىعارۋ قولعا الىنۋدا. بولاشاعىنان  ءۇمىت كۇتتىرەتىن، بويىندا تابيعي دارىنى بار، ءوز ەرەكشەلىگى دە جەتەرلىك جاستارعا قولداۋ كورسەتۋ كەرەك. سونداي  جاستاردىڭ  ءبىرى،  وتاندىق  مۋزىكا  ونەرىنە  جاڭاشىلدىعىمەن  ەنگەن   ءانشى ADAM    كلاسسيكالىق ريتم-ن-بليۋز جانرى بويىنشا العاشقى ورىنداۋشى بولۋىمەن  ەرەك. پروديۋسەرلەردىڭ ADAM-دى جارىققا شىعارۋداعى باستى ماقساتى – جاۋىر بولعان ءبىرسارىندى مۋزىكا مەن قازاقستان شوۋ-بيزنەسىنە بۇرىن-سوڭدى بولماعان  جاڭا ۇلگىدەگى جاڭالىق اكەلۋ. ورىنداۋشىنىڭ باستى ەرەكشەلىگى – ءاندى تازا، شىنايى ورىنداۋمەن قاتار دراماتۋرگيا مەن جان تەبىرەنتەر، ءومىر تاقىرىبىنداعى اندەردى تىڭدارمانداردىڭ جۇرەگىنە جەتكىزۋى ەكەن. ەستەرىڭىزدە بولسا، «ەۋرازيالىق Muzzone EMA- 2012» ماراپاتتاۋ كەشىندە ADAM-نىڭ تۇساۋى كەسىلگەن ەدى. «Muzzone EMA 2012» ماراپاتتاۋ ءراسىمىنىڭ شىمىلدىعىن «جول» دەپ اتالاتىن انىمەن اشتى.

بايگەگە  ۇكىلەپ قوسقان  جاس  ءانشى  شەتەلدىك   بايقاۋدا  توپ  جارىپ، ەل  ءۇمىتىن اقتايدى دەپ  سەنەيىك!

تورعىن  ءابۋشاحمان