ەرتەڭ 27ء-ساۋىر كۇنى «سارىارقا» كينوتەاترىنىڭ اۋلاسىندا بولاتىن جيىنعا قالا تۇرعىندارىن شاقىرعان ءۇنپاراقتار قاپتاپ كەتتى. وسى وقيعاعا قاتىستى ءمان-جايدى بىلمەك ءۇشىن شارانى ۇيىمداستىرۋ توبىنىڭ ءبىر مۇشەسى – مارات ۋاتقان مىرزاعا تەلەفون ارقىلى حابارلاسقان ەدىك:
-اعا، ناۋقاندارىڭىز قابىل بولسىن! قانداي ماسەلەلەردى كوتەرىپ جاتىرسىزدار؟
ء-بىز نەگىزىنەن قوردالانعان الەۋمەتتىك ماسەلەلەر بويىنشا جيىن وتكىزبەكشىمىز.
- ماسەلەن؟
-ماسەلەن، اۋەلى جكح تاريفتەرىنىڭ وسۋىنە توسقاۋىل قويۋدى تالاپ ەتەمىز. ايەلدەردىڭ زەينەتكە شىعۋ جاسىن بۇرىنعى شەگىندە قالدىرۋ، انالار مەن بالالارعا لايىقتى جاردەم اقى تاعايىنداۋ، ءار وتباسىعا تەگىن بەرىلۋگە ءتيىستى 10 سوتىق جەر تەلىمى دەگەن سياقتى جيىنى 45 ءتۇرلى ماسەلە بار.
-اكىمدىكتەن رۇحسات الدىڭىزدار ما؟
-الدىق.
-توسقاۋىل بولعان جوق پا؟
-باسىندا سىلتاۋلار ايتىلدى. اقىرى كەلىستى. ءبىز جيىنعا قالا تۇرعىندارىن عانا ەمەس بيلىك وكىلدەرىن دە شاقىرىپ وتىرمىز. بايقاۋىمىزشا، ولار دا جىبىرلاي باستاعان سىڭايلى.
- قالاي؟
-كەشە ەلباسى الماتىعا كەلىپتى دەپ ەستىدىك. وزىمەن بىرگە بىرنەشە ءمينيستردى دە ەرتە كەلگەن كورىنەدى. اراسىندى الەۋمەتتىك قورعاۋ ءمينيسترى – سەرىك ابدەنوۆ تە بار. سول ابدەنوۆ مىرزا بۇگىن ساعات 14-تە «دەموكراتتار ۇيىندە» قوعام بەلسەندىسى – يرينا ساۆوستينا حانىممەن كەزدەسەتىنى تۋرالى جاڭا عانا حابار الدىم. سوعان قاراعاندا، ازاماتتىق ۇيىمدار كوتەرگەن ماسەلە بيلىكتىڭ ءوزىن دە سەلت ەتكىزگەن كورىنەدى. بيلىك بىزدەن ەمەس شىندىعىنا كەلگەندە حالىقتىڭ قاھارىنان قورقىپ وتىر. ەگەر حالقىمىز ءوزىنىڭ زاڭدى قۇقىقتارىن ساۋاتتى تۇردە تىزە قوسىپ، تالاپ ەتە بىلەتىن بولسا، مينيستر ەمەس پرەزيدەنتتىڭ ءوزى دە حالىقپەن مامىلەگە كەلۋگە ءماجبۇر بولادى. حالىق – الاپات كۇش ەكەنىن ەندى عانا تۇسىنە باستاعان سىڭايلى.
-قالاي ويلايسىز، بيلىك سىزدەرمەن مامىلەگە كەلە مە؟
-بيلىكتى مامىلەگە ءتۇرلى ازاماتتىق ۇيىمدار ارقىلى حالىقتىڭ ءوزى كەلتىرەدى.
اڭگىمەلەسكەن نۇرعالي نۇرتاي
پىكىر قالدىرۋ