ەلىمىزدە وسكەلەڭ ۇرپاقتىڭ ىلكىمدى ىستەرىن ىلگەرىلەتۋگە، ولاردىڭ ەڭبەك ەتۋىنە، بولاشاعىنا بايىپپەن قاراپ، قاجەتىنشە ءبىلىم الۋىنا بارلىق جاعداي جاسالعان. بۇلاي بولۋى دا زاڭدىلىق. ويتكەنى، تاۋەلسىز ەلىمىزدىڭ نەگىزگى قۋاتى ەڭ اۋەلى تالاپتى جاستاردىڭ بىلىمىمەن ولشەنەدى. ۇلتىمىزدىڭ كەلەشەكتەگى كەلبەتى مەن كەمەل كوكجيەگىنىڭ باستاۋى دا ءدال وسى جاستار ەكەنى ءسوزسىز. ال، بۇگىنگى كۇنى قالادان بولەك، اۋىلداعى جاستاردىڭ جاي-كۇيى كىم-كىمدى بولماسىن الاڭداتارى انىق. وسىعان بايلانىستى، بۇرناعى جىلدارى مال شارۋاشىلىعىمەن اتى شىققان مويىنقۇمداعى جاستاردىڭ احۋالىن ءبىلىپ كورگەن ەدىك.

جالپى، اۋداندا تۇرىپ جاتقان تۇرعىندار سانى 32770 بولسا، ونىڭ 8 مىڭعا جۋىعى 14 پەن 29 جاس ارالىعىنداعى جاستار ەكەن. بۇل مويىنقۇمدىق تۇرعىنداردىڭ 23،7 پايىزىن جاستار قۇرايدى دەگەن ءسوز. بۇگىندە جاستاردىڭ كوبى اۋىلدان قالاعا كەتۋگە قۇمارتىپ تۇراتىنى جاسىرىن ەمەس. ال، كەرىسىنشە اۋىلدى جەردى وگەيسىنبەي، تۋعان جەردىڭ ءتۇتىنىن ءتۇزۋ تۇتەتۋدى ءجون كورگەن اۋىل جاستارىمەن جۇمىستى جۇيەلى تۇردە ۇيلەستىرۋ اۋداندىق جاستار رەسۋرستىق ورتالىعىنا جۇكتەلگەن. جاستارعا جان-جاقتى جاعداي جاسالىپ وتىرعان تۇستا، ەلدى مەكەندەرگە يمەنبەي بارىپ، ەسەلى ەڭبەك ەتۋدى كوزدەگەن جاستارعا قولداۋ بىلدىرۋدە ورتالىقتىڭ ەڭبەگى راسىمەن دە زور. قازىرگى تاڭدا ورتالىقتىڭ وزىندە 30-عا جۋىق جاس ورەن قىزمەت ەتەدى ەكەن. وعان قوسا، ءار اۋىلدىق وكرۋگتەردە جاستار ءىسى جونىندەگى كەڭەسشى ماماندار دا جۇمىس ىستەۋدە. ولار جاستاردىڭ مەملەكەتتىك باعدارلامالارعا قاتىسۋىن قامتاماسىز ەتۋ، جۇمىسسىزدىقپەن كۇرەس، ءتۇرلى قىلمىستاردىڭ الدىن الۋ، بۇقارالىق سپورت تۇرلەرىمەن اينالىسۋ ماقساتىندا دەنساۋلىق ساقتاۋ، ءبىلىم بەرۋ، سپورت، مادەنيەت مەكەمەلەرىمەن، ىشكى ىستەر ورگاندارىمەن، اۋىل اكىمدەرىمەن بىرلەسە جۇمىس اتقارىپ كەلەدى. ورتالىقتىڭ بەرگەن مالىمەتىنە سۇيەنسەك، بيىل  مەملەكەتتىك جاستار ساياساتىن جۇزەگە اسىرۋ ءۇشىن جەرگىلىكتى بيۋدجەت كوزدەرىنەن 29 ميلليون 803 مىڭ تەڭگە بولىنگەن ەكەن. وتكەن جىلى وسى ماقساتتا 26 ميلليون 44 مىڭ تەڭگە قاراستىرىلعانىن ەسكەرەر بولساق، ۇستىمىزدەگى جىلى اۋداندا جاستار ساياساتىنا ەرەكشە دەن قويىلعانىن اڭعارۋ قيىن ەمەس. سونىڭ ناتيجەسىندە، سوڭعى 11 ايدا ورتالىق 5 سپورتتىق، 2 اكسيا، 10 كەزدەسۋ، 5 قايىرىمدىلىق كومەك، 6 دوڭگەلەك ۇستەل، 5 سەنبىلىك جانە 1 رەيد وتكىزگەن.

از عانا جىلدا اياققا تۇرىپ، دامۋدىڭ داڭعىل جولىنا تۇسكەن مەملەكەتىمىز اۋىل تۇرمىسىن تىكتەۋگە بىلەك سىبانا كىرىستى. ءوز كەزەگىندە قاتارىنان ءۇش جىلدىڭ اۋىل جىلدارى بولىپ جاريالانۋى دا دالالى جەردىڭ تىنىسىن كەڭەيتەتە تۇسكەنى انىق. سونداي-اق، وسىدان بىرنەشە جىل بۇرىن قابىلدانعان «ديپلوممەن اۋىلعا»، «جاسىل ەل» باعدارلامالارى مەن «جاستار پراكتيكاسى» سىندى جاستارعا باعىتتالعان زور مۇمكىندىكتەر اۋىلدى جەرلەردى قاجەتتى ماماندارمەن قامتاماسىز ەتۋدە جانە جۇمىسسىزداردىڭ سانىن ازايتۋدا ۇلكەن ماڭىزعا يە بولعانىن ءسىز بەن ءبىز جاقسى بىلەمىز. سونداي-اق، وتكەن جىلى اقىلى قوعامدىق جۇمىسقا تارتىلعان جاستاردىڭ سانى 55 بولسا، بيىل بۇل كورسەتكىش 225-كە جەتىپ وتىر. بۇدان بولەك، تۇراقتى جۇمىسقا 112 جاس ورنالاسقان. ايتا كەتۋ كەرەك، «ديپلوممەن اۋىلعا» باعدارلاماسى اياسىندا وتكەن جىلى 25 جاس مامانعا تۇرعىن ءۇي الۋ ءۇشىن 80 ميلليون تەڭگە قاراستىرىلعان. بۇل ءۇردىس بيىلعى جىلى دا جالعاسىن تاۋىپ وتىر. ناتيجەسىندە، 30 مامانعا 5 ميلليوننان اسا كوتەرمە جاردەماقى بەرىلىپ، 12 مامان ءۇي ساتىپ الۋى ءۇشىن 43 ميلليون 290 مىڭ تەڭگەگە قول جەتكىزگەن. مويىنقۇم اۋدانى وڭىرىمىزدەگى ءوندىرىس سالاسى وركەندەگەن ايماقتاردىڭ بىرەگەيى ەكەنى ايتپاسا دا بەلگىلى. مىنە، سول سەبەپتى دە مۇنداعى جاستاردىڭ باسىم بولىگى اۋدانداعى ءوندىرىس وشاقتارىن كۇنكورىس كوزىنە اينالدىرعان. مىسالى، بۇگىنگى كۇنى مويىنقۇم اۋدانىنداعى شىعاناق «باريت» زاۋىتىندا جۇمىس ىستەپ جاتقان 80، «التىن الماس» كەن بايىتۋ ورنىنداعى 197، جامبىل سەمەنت پەن بالىق زاۋىتىنداعى 146 جانە حانتاۋ سەمەنت زاۋىتىنداعى 75 جاس وسى ءسوزىمىزدىڭ دالەلى بولا الادى. جاس ورەندەردىڭ اراسىندا سالاۋاتتى ءومىر سالتىن كەڭىنەن ناسيحاتتاۋ دا ورتالىقتىڭ نازارىنان تىس قالعان ەمەس. جالپى، مويىنقۇمدىق جاستاردىڭ سپورتپەن شۇعىلدانۋى ءۇشىن 100-دەن اسا سپورتتىق نىسان تۇراقتى جۇمىس ىستەپ تۇر. ولاردىڭ بارلىعىنا دەرلىك كىرۋ تەگىن جانە ورتا مەكتەپتەردىڭ سپورت  زالدارىنا ارنايى كەستە بەكىتىلىپ، جاستاردىڭ سپورتپەن جۇيەلى تۇردە شۇعىلدانۋىنا جاعداي جاسالعان. سونىمەن قاتار، اۋدانداعى 6740 تۇرعىن بۇقارالىق سپورتپەن اينالىسسا، ونىڭ 60 پايىزىن جاستار قۇرايدى ەكەن.

ال، جاستار رەسۋرستىق ورتالىعىنداعى جاستاردىڭ اعىمداعى جىلدىڭ 11 ايىندا اتقارعان ءىس-شارالارى دا اۋىز تولتىرىپ ايتارلىقتاي. مىسالى، «العىس ايتۋ» كۇنىنە وراي، مۇنداعى قىزمەتكەرلەر اۋىل تۇرعىندارىن ءتىس دارىگەرىنە تەگىن ەمدەلۋىنە مۇرىندىق بولىپ، ساۋاپتى ىسكە بىلەك سىبانا كىرىسكەن. بۇدان بولەك، «اناعا حات» يمميدجدىك جوباسى اياسىندا بەينەپوەزيا، «بۇگىنگى قادام - ەرتەڭگىى وشپەيتىن ءىز»، «ارىڭدى ساقتا، بويجەتكەن!»، «وتباسى – ءومىر اياسى» جانە «عاسىرلارمەن ۇندەسكەن اسقاق استانا» سىندى كوپتەگەن ءىس-شارالاردى ۇيىمداستىرىپ، ءتۇرلى جاس ەرەكشەلىكتەرى بويىنشا اۋدانداعى بارلىق جاستاردى قامتىعان.

وبلىس اۋماعىنىڭ ۇشتەن ءبىر بولىگىن الىپ جاتقان مويىنقۇمدا جاستاردىڭ دەنىن ءبىر ورتالىققا بىرىكتىرگەن اۋداندىق «جاستار رەسۋرستىق ورتالىعى» اۋداننىڭ ابىرويىن ارتتىرۋعا، ونى گۇلدەندىرۋگە ءوز ۇلەستەرىن قوسىپ كەلەدى. جاستاردى مەملەكەتتىك ساياساتتىڭ توڭىرەگىنە توپتاستىرىپ وتىرعان بۇل ورتالىققا اۋدان اكىمشىلىگىنەن كورسەتىلىپ وتىرعان قامقورلىقتىڭ دا مول ەكەنىن اتاپ وتكەن ءجون. وسىنىڭ ءوزى جالىندى جاستاردىڭ ەڭبەگى ەلەنىپ، جاساعان جۇمىستارىنىڭ ەش كەتپەگەنىن اڭعارتسا كەرەك-تى.

شاپاعات قونىسباي