شىعىس قازاقستان وبلىسىندا 1 ماۋسىمنان بەرى 20 ادام سۋعا كەتكەن، دەپ حابارلايدى Qamshy.kz قازاقپاراتقا سىلتەمە جاساپ.

ءوڭىردىڭ توتەنشە جاعدايلار دەپارتامەنتىنىڭ مالىمەتىنشە، كەشە وسكەمەن قالاسىندا سۇڭگۋىرلەر ەرتىس وزەنىنەن 57 جاستاعى ازاماتتىڭ دەنەسىن الىپ شىققان.

مامانداردىڭ ايتۋىنشا، قايعىلى جاعدايدىڭ كوبى شومىلۋعا ارنالماعان، ارنايى جابدىقتالماعان توعانداردا بولعان. ەكىنشى ۇلكەن سەبەپ – ىشىمدىك بولسا، سوڭعى كەزدە ۇرلەمەلى ماتراستار دا ءقاۋىپتى قۇرالعا اينالعان.

«بۇرىن جۇزۋگە ارنالعان ۇرلەمەلى ماتراستار جۇقا ءارى ىقشام بولسا، ءقازىر ولار وتە قالىڭ بولىپ كەلەدى. مۇنداي قۇرالدار سۋ بەتىندە جەل تۇرعاندا ءقاۋىپتى بولىپ كەتەدى. اۋدارىلعان ادامنىڭ وعان قايتادان ءمىنۋى قيىن. ءتىپتى قۇتقارۋشىلاردىڭ ءوزى سۋ بەتىندە جەل تۇرعان كەزدە ماتراستى ىرىققا كوندىرۋ قيىن ەكەنىن ايتادى»، – دەيدى دەپارتامەنتتىڭ باسپا ءسوز قىزمەتىنىڭ باسشىسى اناستاسيا سكليار.

دەپارتامەنت وكىلى شومىلۋ ماۋسىمى باستالعاننان بەرى شىعىسقازاقستاندىق قۇتقارۋشىلار 11 ادامدى اجالدان اراشالاپ قالعانىن ايتادى.