ەلىمىزدىڭ ەرتەڭى سانالاتىن جاستاردىڭ اۋىل ومىرىندە الاتىن ورنى ەرەكشە. سوندىقتان، العىر دا، پاراساتتى، ءبىلىمدى جاستاردىڭ اۋىلداعى قايناعان تىرشىلىككە ارالاسۋى قۇپتارلىق ءىس. جاستار قالاعا ۇدەرە كوشىپ، سونىڭ سالدارىنان ءبىر كەزدەرى تۇرالاپ قالعان اۋىلدىڭ تىنىس – تىرشىلىگىنە ءقازىر قان جۇرە باستادى. كەيىنگى جىلدارى جوعارى وقۋ ورنىن ءتامامداعان جاس مامانداردىڭ اۋىلدى تۇلەتسەم ەكەن دەگەن تىلەكتەرى ورىندالىپ، «ديپلوممەن اۋىلعا» باعدارلاماسى ولاردىڭ بولاشاعىنا جول اشتى. بۇگىندە اتالمىش جوبا رەسپۋبليكالىق دەڭگەيدە كەڭ قولداۋ تاۋىپ، ەلىمىزدىڭ تۇكپىر-تۇكپىرىندە ءوز جەمىسىن بەرىپ جاتقانى قۋانتادى. بۇرىنعىداي ديپ­لومىن قۇشاقتاپ جۇمىس ىزدەۋشى جاستاردىڭ قاتارى دا سيرەگەن سەكىلدى. اسىرەسە، الەۋمەتتىك سالا ماماندارىنا سۇرانىس جوعارى. ەڭ الدىمەن شالعاي ەلدى مەكەندەردەگى مامان تاپشىلىعىن جويۋعا باعىتتالعان بۇل باعدارلاما سول سۇرانىستى تولىق وتەپ جاتىر دەۋگە ابدەن بولادى. ويتكەنى، اۋىلدى جەردە ءبىلىم بەرۋ، دەنساۋلىق، مادەنيەت جانە سپورت ماماندىقتارىنا ءبىرىنشى كەزەكتە جۇمىس تابىلادى. اتالعان باعدارلامانىڭ يگىلىگىن كورىپ، اۋىلدا ابىرويلى قىزمەت ەتىپ جۇرگەن وسىنداي جاس مامانداردىڭ ءبىرى رەتىندە مويىنقۇم اۋدانىنىڭ تۇرعىنى قۇرالاي ايتقۇلدى ايتۋىمىزعا بولادى.

كەيىپكەرىمىز – اۋدان ىرگەسىندەگى جامبىل اۋىلدىق وكرۋگىنىڭ تۋماسى. وسىنداعى ا.قۇنانبايەۆ اتىنداعى ورتا مەكتەپتى 2011 جىلى ءتامامداعان قۇرالاي سول جىلى قاراعاندى مەملەكەتتىك مەديسينالىق ۋنيۆەرسيتەتىنە وقۋعا تۇسەدى. بالا كۇنگى ارمانىنا قانات ءبىتىرۋدى كوزدەگەن جەرلەسىمىز اتالعان ءبىلىم ورداسىندا 5 جىل بويى «جالپى مەديسينا» مامانداعىندا ءبىلىم السا، ودان كەيىنگى 2 جىلىن ينتەرناتۋراعا ارناپ، تەراپيەۆت دارىگەر بىلىكتىلىگىنە قول جەتكىزەدى. ودان كەيىن جاس مامان «ديپلوممەن اۋىلعا» باعدارلاماسى ارقىلى جولدامامەن ءوزىنىڭ تۋعان جەرىنە كەلىپ، وسىندا جۇمىسقا ورنالاسادى. وسىلايشا، وتكەن جىلى عانا جوعارعى وقۋ ورنىنىڭ تۇلەگى اتانعان جاس مامان بۇگىندە بىلىكتى دارىگەرگە اينالعان. قازىرگى كەزدە مويىنقۇم اۋداندىق ورتالىق اۋرۋحاناسىنىڭ «جالپى ەمدەۋ» بولىمىندە تەراپيەۆت دارىگەر بولىپ جۇمىس ىستەۋدە. ول اتالمىش باعدارلامانىڭ جاستار ءۇشىن ءالى دە بەرەرى مول ەكەنىن ايتادى.

– مەنىڭ بۇل باعدارلامانىڭ بەرەرى مول ەكەندىگىنە كوزىم جەتتى. ەلباسىمىز جاس ماماندارعا: «اۋىلعا ەلىم دەپ، جەرىم دەپ وسكەلەڭ ۇرپاقتىڭ ءبىلىم، ءتالىم – تاربيە الۋىنا ءوز ۇلەستەرىڭدى قوسۋعا كەلىپ جاتقاندارىڭ ۇلكەن ەرلىك. ەندى جاس ۇرپاقتى تاربيەلەپ، وتباسىن قۇرىپ، وسى اۋىلدىڭ زيالى قاۋىمىنا اينالاسىڭدار...» - دەپ ايتقان بولاتىن. وسى ماقساتپەن تۋعان اۋىلىمدى تۇلەتۋگە، دەنى ساۋ ۇرپاق تاربيەلەۋگە كۇش جۇمساۋدامىز، – دەيدى قۇرالاي بىزبەن اڭگىمە اراسىندا.

جاس ماماننىڭ ايتۋىنشا، ول وتكەن جىلى جولدامامەن كەلگەندە اۋداننان 165 مىڭ، وبلىستان 850 مىڭ تەڭگە كولەمىندە ءبىر رەتتىك كوتەرمە جاردەماقى العانىن ايتادى. قۇرالاي وسىندا تۇرمىس قۇرعاندىقتان، باسپاناعا اسا قاجەتتىلىك بولماعان. سوندىقتان، باعدارلاما اياسىنداعى ءۇي كەزەگىنە تۇرماپتى. ال، اۋدان اكىمدىگىنىڭ ەكونوميكا جانە بيۋدجەتتىك جوسپارلاۋ ءبولىمىنىڭ بەرگەن مالىمەتىنە سۇيەنسەك، مويىنقۇم اۋدانى بويىنشا ۇستىمىزدەگى جىلدىڭ ءتورت ايىندا 5 جاس مامانعا تۇرعىن ءۇي ساتىپ الۋ ءۇشىن بيۋدجەتتىك كرەديت بەرىلىپتى. ول ءۇشىن اۋدان قازىناسىنان 18 ميلليوننان اسا قۇرجى جۇمسالعان. سونىمەن قاتار، جىل باسىنان بەرى 19 مامانعا ءبىر رەتتىك كوتەرمە جاردەماقى بەرىلىپ، بۇل ماقساتقا 3 ميلليون 358 مىڭ تەڭگە بولىنگەن ەكەن. ايتا كەتۋ كەرەك، بيىل وتكەن جىلعا قاراعاندا اۋدانعا اتباسىن بۇرعان ءبىلىم سالاسىنداعى ماماندار ەكى ەسەگە ءوسىپتى. دالىرەك ايتساق، بىلتىرعى جىلدىڭ العاشقى ءتورت ايىندا اۋداننىڭ ءبىلىم بەرۋ سالاسىنا 7 مامان كەلگەن بولسا، بيىل بۇل كورسەتكىش 15 ادامعا جەتىپ وتىر. مىنە، وسىلايشا وبلىس ورتالىعىنان ەڭ شالعاي ورنالاسقان مويىنقۇمعا «ديپلوممەن اۋىلعا» باعدارلاماسى ارقىلى كەلىپ جاتقان جاس ماماندار سانى جىل وتكەن سايىن ارتىپ كەلەدى. سايكەسىنشە، ولاردىڭ الەۋمەتتىك ماسەلەلەرى دە مەملەكەتتىڭ ءتيىمدى قولداۋىنىڭ ارقاسىندا وڭتايلى شەشىلۋدە.