ءاربىر ادامنىڭ ومىرىنە اراشا تۇسەتىن دارىگەرلىك ماماندىقتى تاڭداۋ كىم-كىمگە دە بولماسىن ۇلكەن جاۋاپكەرشىلىك جۇكتەيدى. ويتكەنى دارىگەرلەر ادامنىڭ جان-دۇنيەسىن وتە تەرەڭ بىلۋمەن قاتار، ادام تاعدىرىنا نەمقۇرايدى قارامايتىن، كۇيزەلىسكە ءتوزىمدى، جۇيكەسى مىقتى جان بولۋى شارت. ولاي دەيتىنىمىز، اق حالاتتى جانداردىڭ الدىنا كۇن سايىن بالتىرى سىزداپ، باسى اۋىرعان قانشاما جان كەلەدى. سوندىقتان دا قاجىرلى جۇمىس يەلەرى - اق حالاتتىلار حالىقتىڭ العىسىن ارقالاعان جاندار. اسىرەسە، شالعاي ەلدى مەكەندەردە تۇراتىن اۋىلدىقتار دارىگەردىڭ كومەگىنە ءزارۋ كەلەتىنى بەلگىلى عوي. مىنە، وسىندايدا بار ءبىلىمى مەن بىلىگىن كادەگە جاراتىپ، ەلدىڭ ىقىلاسىنا بولەنىپ جۇرەتىن ەرەكشە ماماندار بولادى. سولاردىڭ ءبىرى – بورانكۇل ابيشيەۆا.

وبلىس ورتالىعىنان ەڭ شالعاي ورنالاسقان مويىنقۇم اۋدانىندا تۇراتىن اق حالاتتى اۋداندىق اۋرۋحانادا باس دارىگەردىڭ ادىستەمەلىك-ۇيىمداستىرۋ جونىندەگى ورىنباسارى بولىپ قىزمەت اتقارادى. 33 جىلدان بەرى اتالمىش قۇمدى ولكەدە قىزمەت ەتىپ جۇرگەن ول وسى اۋداننىڭ تۋماسى ەكەن. 1977 جىلى وسىنداعى جامبىل اتىنداعى مەكتەپتى بىتىرگەننەن كەيىن سەمەي مەملەكەتتىك مەديسينالىق ينستيتۋتىندا پەدياتريا ماماندىعى بويىنشا ءبىلىم الىپ، ونى ۇزدىك باعامەن ءتامامداعان. كەيىننەن جامبىل وبلىسىنداعى بالالار اۋرۋحاناسىندا ينتەرناتۋرادان ءوتىپ، 1986 جىلى تۋعان جەرىنە كەلىپ پەدياتر رەتىندە جۇمىسقا ورنالاسادى. جالپى، مەديسينا سالاسى – جاۋاپكەرشىلىگى مول، ءارى وتە كۇردەلى سالا ەكەنى بەلگىلى. كەرەك دەسەڭىز، بۇل جولدا ەڭبەك ەتۋ ءۇشىن بىرنەشە جىل وقۋدىڭ ءوزى ازدىق ەتەدى. اتالمىش سالانى تولىققاندى يگەرۋ ءۇشىن ۇزاق جىلدار بويى ۇزدىكسىز تاجىريبە جيناپ، ماماندىق بويىنشا ءبىلىمى مەن بىلىكتىلىگىن تولىقتىرىپ وتىرۋدىڭ قاجەت ەكەنى ايتپاسا دا تۇسىنىكتى. وسىنى جەتە تۇسىنگەن بورانكۇل سامەك قىزى 1993 جىلى الماتى قالاسىنا بارىپ تەرى جانە ۆەنەرولوگيا اۋرۋلارى بويىنشا ءۇش ايلىق وقۋدى ءبىتىرىپ، ءبىلىمىن جەتىلدىرىپ كەلگەن. وسىلايشا، بىرنەشە جىلدا مەديسينا سالاسىنىڭ قىر-سىرىنا ابدەن قانىققان ابزال جان 2002 جىلى اۋدانداعى كلينيكالىق-دياگنوستيكالىق ەمحانانىڭ مەڭگەرۋشىسى قىزمەتىنە تاعايىندالادى. اراعا ءتورت جىل سالىپ ءدال وسى ەمحانانىڭ باس دارىگەرى قىزمەتىنە دەيىن كوتەرىلەدى.

– ارينە، مەديسينا ۇلكەن جاۋاپكەرشىلىكتى تالاپ ەتەتىن سالا. مۇندا ءسال دە بولسا بوساڭسىپ، سالعىرتتىققا جول بەرۋگە مۇلدە بولمايدى. ەڭبەكتەگەن بالادان ەڭكەيگەن قارياعا دەيىن ساعان سەنىم ءبىلدىرىپ كەلەدى. وزىڭە سونداي جاۋاپكەرشىلىك ارتقان سوڭ بارىنشا تياناقتى بولۋعا تىرىساسىڭ. نەگىزىنەن، بالا كەزىمنەن-اق وسى سالاعا اڭسارىم اۋىپ، دارىگەر بولۋدى ارماندايتىنمىن. اللا ءساتىن سالىپ، مەكتەپ بىتىرە سالىسىمەن ارمانىنا قول جەتكىزدىم. ءوزىمنىڭ تۋعان اعام دا وسى سالادا قىزمەت جۇمىس ىستەيدى. بۇگىندە ەكى قىزىمنان ءتورت نەمەرە ءسۇيىپ وتىرمىن. اۋدانىمىزداعى اۋرۋحاناعا قاراستى 49 دارىگەر مەن 238 ورتا بۋىندى مەديسينالىق قىزمەتكەرلەر جۇمىس ىستەيدى. بۇگىندە ەلۋدىڭ ەڭسەرىپ، الپىسقا اياق باسقالى تۇرسام دا قولىمنان كەلگەنشە وسىنداي جاس ماماندارعا جول سىلتەپ، تاجىريبەممەن ءبولىسىپ كەلەمىن، - دەيدى بورانكۇل سامەك قىزى.

ءوز ماماندىعىن ماقتانىش ەمەس، ۇلكەن جاۋاپكەرشىلىك دەپ سەزىنەتىن دارىگەر قاشاندا قاراپايىمدىلىعىنان تانعان ەمەس. ول ءوزىنىڭ ەڭبەكقورلىعى مەن ءبىلىمىنىڭ ارقاسىندا مەديسينا سالاسىنىڭ سان ساتىسىنان ءوتىپ، بۇگىندە تاجىريبەسى تولىسقان اق حالاتتىلاردىڭ قاتارىندا ءجۇر. ماسەلەن، وسىدان 33 جىل بۇرىن اۋدانعا پەدياتر بولىپ كەلگەن جاس مامان 2006-2011 جىلدارى اۋداندىق ەمحانادا باس دارىگەر، 2011-2018 جىلدارى اۋداندىق اۋرۋحانادا باس دارىگەردىڭ مەديسينالىق كومەكتىڭ ساپاسىن باقىلاۋ جونىندەگى ورىنباسارى بولىپ ىستەگەن. وسى جىلدار ارالىعىندا ءتۇرلى ماراپاتتارعا دا يە بولعانىن ايتا كەتۋ كەرەك. دالىرەك ايتساق، ازاماتتاردىڭ دەنساۋلىعىن ساقتاۋ ىسىنە قوسقان جەكە ۇلەسى مەن ءمىنسىز ادال ەڭبەگى ءۇشىن دەنساۋلىق ساقتاۋ ءمينيسترىنىڭ قۇرمەت گراموتاسىمەن، وبلىس اكىمىنىڭ قۇرمەت گراموتاسىمەن، سونداي-اق، «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىمەن جانە «قازاقستان كونستيتۋسياسىنا 20 جىل» مەرەكەلىك مەدالىمەن ناگرادتالعان.

راس، اۋرۋدىڭ جاسقا دا، كارىگە دە قاراماستان، ۇرىمتال جەردەن سوعا بەرەتىنى اقيقات. وسىندايدا، قىل ۇستىندەگى ادام تاعدىرىن اراشالاۋشى اق حالاتتى ابزال جاندار كومەككە كەلەدى. سوندىقتان دا، وسىناۋ ابزال ماماندىق يەسى التىن قولدى دارىگەرلەر قاۋىمىنا بەسىكتەگى بالادان ەسىكتەگى قارياعا دەيىن ايتار العىسى شەكسىز ەكەندىگىنە ءشۇبامىز جوق. ەندەشە، قينالعاندا كومەك سۇراپ، اۋىرعاندا شيپا ىزدەپ الدىنا بارعان كەز كەلگەن ناۋقاسقا قولداۋ كورسەتەتىن، ومىرلەرىنە ءقاۋىپ تونگەن ساتتە اراشا ءتۇسىپ، ءتىپتى، كەيدە ەكىنشى ءومىر سىيلاپ جاتاتىن بارشا دارىگەرلەرىمىزدى ءتول مەرەكەلەرىمەن شىن جۇرەكتەن قۇتتىقتايمىز!