بۇگىنگى كۇنى شۇكىر، ىزدەنگەن ادامعا كەز كەلگەن ءىستىڭ كوزىن تابۋعا مۇمكىندىك بار. تەك، تالابى بولسىن دەڭىز. جىل وتكەن سايىن شۋ اۋدانىندا كاسىپكەرلىكتىڭ كوكجيەگى كەڭەيىپ كەلە جاتقانىن ۇنەمى ايتىپ كەلەمىز. اۋدان كاسىپكەرلەرى تەك ءبىر سالادا عانا ەمەس، كاسىپكەرلىكتىڭ ءتۇرلى باعىتىندا دا وزدەرىن جاقسى قىرىنان تانىتىپ ءجۇر. ولاردىڭ اراسىندا بۇرىن قازاققا تاڭسىقتاۋ كورىنەتىن كاسىپپەن اينالىسىپ، تۇرمىسىن تۇزەتىپ جاتقاندار دا از ەمەس. سونىڭ ءبىرى – جامبىل وبلىسى شۋ اۋدانىنىڭ تۇرعىنى كارينا كاشايەۆا دەسەك قاتەلەسپەيمىز. بۇگىنگى كەيىپكەرىمىز مىنە كەزىندە قازاق قورەكتىك قۋاتى بار اسقا ساناماعان ساڭىراۋقۇلاقتى ءوسىرىپ، سودان وتباسىنىڭ ءناپاقاسىن ايىرىپ وتىر.

راسىن ايتۋ كەرەك، ءوڭىر تۇرعىندارى ساڭىراۋقۇلاقتى كوكتەم مەزگىلىندە  تاۋلى جانە قۇمدى ايماقتاردان تەرىپ الىپ پايداعا جاراتاتىنىن كورىپ تە، ءبىلىپ تە ءجۇرمىز. الايدا، ارنايى جىلىجاي سالىپ، ءوز قولىمەن باقشاسىندا ساڭىراۋقۇلاق ءوسىرىپ، ونى جىل ون ەكى اي نارىققا شىعاراتىن اۋدانداعى كاسىپكەردى ءبىز بۇعان دەيىن ەستىمەگەنبىز. بۇل اقپاردى ەستي سالىسىمەن، تاۋەكەلشىل كاسىپكەردىڭ وزىمەن تىلدەسۋدى ءجون كوردىك. بىلگەنىمىزدەي، كارينا نۇرعازى قىزى نەبارى 25 جاستا ەكەن. جوعارى وقۋ ورنىن ءتامامداعان سوڭ، استانا قالاسىندا ءتۇرلى مەكەمەلەردە جۇمىس ىستەگەن كورىنەدى. دەي تۇرعانمەن، الىپ قالاداعى ماردىمسىز جالاقىعا كوڭىلى تولماعاندىقتان، تۋعان ولكەسىنە كەلىپ، ءوز كاسىبىن اشۋدى قۇپ كورگەن.

– بۇل كاسىپتى قولعا العانىما ەكى ايعا جۋىقتادى. اۋەلگىدە، جىلىجاي قۇرىلىسى مەن ساڭىرۋقۇلاق تۇپتەرىن الماتى قالاسىنان جەتكىزۋگە ەكى جۇماداي ۋاقىت كەتتى. «ۆەشەنكا» دەپ اتالاتىن ساڭىراۋقۇلاقتىڭ بۇل سۇرپى  قولدا وسىرۋگە ارنالعان. قازىرگى كەزدە ەلىمىزدىڭ تۇكپىر-تۇكپىرىندە وسى سۇرىپتى ءوسىرۋدى قولعا العان كاسىپكەرلەردىڭ قاتارى ارتىپ كەلەدى. مىنە، ءبىز دە تاۋەكەلگە بەل بۋىپ، سوڭعى ەكى اپتادان بەرى ساڭىراۋقۇلاقتان ءونىم الىپ وتىرمىز. بۇل جىلىجاي 1000 ءتۇپ ساڭىراۋقۇلاق وسىرۋگە شاقتالعان. الايدا، اتالمىش كاسىپپەن العاش رەت اينالىسىپ وتىرعاندىقتان، 500 ءتۇپتى ءوسىرىپ كورەيىن دەپ شەشتىم. ازىرگە ناتيجەسى جامان ەمەس. كۇنىنە 20-30 كەلى ساڭىراۋقۇلاق الىپ وتىرمىز. نەگىزىنەن، ءار تۇپتەن 600-800 گرامم ارالىعىندا ءونىم الۋعا بولادى. ساڭىراۋقۇلاق وتە مۇقيات كۇتىمدى قاجەت ەتەدى. اۋا-رايىنا بايلانىستى جىلىجايدىڭ تەمپەراتۋراسىن كۇنى بويى باقىلاۋدا ۇستاۋ كەرەك. ءقازىر كۇندىز-تۇنى ۇيىقتاماي، اپكەمنىڭ قولعابىس بەرۋىنىڭ ارقاسىندا ەكەۋمىز وسى ىسپەن اينالىسۋدامىز، - دەيدى جاس كاسىپكەر.

بايقاۋىمىزشا، بۇل ءوزى ۇڭعىل-شۇڭعىلى كوپ شارۋا ەكەن. ساڭىراۋقۇلاق جىلۋدى جاقسى كورەدى، بولمەدەگى بولماشى اۋا وزگەرىسى دە وعان قاتتى اسەر ەتەدى. كەزدەيسوق باكتەريادان دا قىرىلىپ قالۋى مۇمكىن. كوپ ادامنىڭ ساڭىراۋقۇلاق وسىرۋدەن بويىن اۋلاق سالاتىنى دا سوندىقتان بولسا كەرەك. كاسىپكەردىڭ ايتۋىنشا، «ۆەشەنكا» ساڭىراۋقۇلاعى كەرەمەت دامىمەن قوسا، قورەكتىك قۋاتىمەن دە ەرەكشەلەنەتىن كورىنەدى. ونىڭ ادام اعزاسىنداعى ىسىك جاسۋشالارىمەن كۇرەسەتىن ەمدىك قاسيەتى دە بار ەكەنىن ايتادى بىلەتىندەر. تىڭ كاسىپتىڭ قىر-سىرىن ۇعىنىپ، ودان مول ءونىم الۋدى كوزدەگەن جاس كاسىپكەردىڭ ونەگەسى ءوزى سىندى جاستارعا دا قوزعاۋ سالارى ءسوزسىز. «ازىرگە، كوپ ادامدار اۋدانىمىزدا ساڭىراۋقۇلاق وسەتىنىنەن بەيحابار. ءبىز ءقازىر وسى ولقىلىقتىڭ ورنىن تولتىرىپ، ونىمدەرىمىزدى مەيرامحانالار مەن بازارعا وتكىزۋدەمىز. بۇگىنگى كۇنى تاپسىرىس كولەمى كۇن وتكەن سايىن ارتىپ كەلەدى» دەيدى ول ءسوز اراسىندا. بولاشاقتا ءونىم كولەمىن ارتتىرۋدى دا كوزدەپ وتىر. كاسىبىنىڭ كوزىن تاۋىپ، تابىستىڭ ءدامىن تاتقان كارينانىڭ بولاشاققا باعىتتالعان جوبا-جوسپارى دا از ەمەس. ول «اتامەكەن» ۇلتتىق كاسىپكەرلەر پالاتاسىنىڭ اۋداندىق فيليالىنا قۇجاتتارىن وتكىزىپ قويعان. اعىمداعى ايدان باستاپ كاسىپكەرلىك ءبىلىمىن شىڭداۋدى قۇپ كورگەن كارينا «باستاۋ بيزنەس» جوباسىنا قاتىسىپ، كاسىبىن كەڭەيتۋ ءۇشىن نەسيە الۋدى كوزدەپ وتىر. ونىڭ ايتۋىنشا، جوباسى مەملەكەت تاراپىنان قولداۋ تاۋىپ، نەسيە بەرىلىپ جاتسا، ساڭىراۋقۇلاقتان بولەك، قۇلپىناي مەن قىزاناق ءوسىرۋدى دە قولعا الماقشى نيەتتە ەكەن.

«تاۋەكەل تاۋ جىعار» دەمەكشى، كارينا دا كاسىپكەرلىككە ەندى عانا اياق باسقانىمەن، كوپكە بەيمالىم ءونىمدى ءوسىرۋدى قولعا الىپ، ۇلكەن تاۋەكەلگە بەل بۋىپ وتىر. قولعا الىپ قانا قويماي، ءارى ودان قوماقتى قارجى تابۋدا. قازاق مۇندايدا «تالاپ - پەندەدەن، قولداۋ - تاڭىردەن» دەيدى. وڭىرىمىزدەگى ءاربىر جاس جۇمىس جوق دەپ قول قۋسىرىپ وتىرماي، ءوز كاسىبىن اشۋعا تالپىنىپ، وسىلايشا ىسپەن اينالىسىپ جاتسا، اۋداندارداعى كاسىپكەرلىكتىڭ كوكجيەگى كۇن ساناپ ارتا تۇسەر مە ەدى، كىم ءبىلسىن؟!