جامبىل وبلىسى شۋ اۋدانىندا  كاسىپكەرلىكپەن اينالىساتىن تۇرعىندار جەتىپ ارتىلادى. كەيىنگى جىلدارى بۇل سالاعا بەت بۇرعانداردىڭ اراسىندا نازىك جاندىلاردىڭ ۇلەسى ارتىپ كەلەدى دەسەك ارتىق ايتپاعانىمىز. سولاردىڭ ءبىرى – شۋ اۋدانىنىڭ تۇرعىنى مارجان بايماناسوۆا. ونىڭ كاسىپكەرلىك سالاسىندا جۇرگەنىنە بيىل 10 جىل تولىپ وتىر.

فابريكادا قاراپايىم تىگىنشى بولعان بايماناسوۆا كاسىپ يەسى بولۋدى كىشكەنتايىنان ارمان ەتكەن.  بۇگىندە شۋ قالاسىندا تىگىن شەبەرحاناسىن اشىپ، 10-نان اسا ادامدى جۇمىسپەن قامتىپ وتىرعان جەكە كاسىپكەردىڭ ءىسى وڭعا باسىپ تۇر.

«بالا كەزىمنەن ۇلتتىق ناقىشتاعى كيىمدەردى تىگۋگە قۇمارتىپ ءوستىم. تىگىنشىلىك قاسيەت انامنان دارىعان. ول كىسىگە اكەسىنەن بۇيىرىپتى. ناعاشى اتام كوزى تىرىسىندە ءوز قىزدارىنا توي كويلەكتەرىن تىگىپ، قۇتتى ورىندارىنا قوندىرعان ەكەن. بالا كەزىمدە العاش كيىم تىگە باستاعانىمدى كورگەن انام: «وسى قىز تىگىنشى بولادى-اۋ» دەپ ماعان سۇيسىنە قارايدى ەكەن. وسە كەلە، وسى تىگىن سالاسىنىڭ قىر-سىرىنا قانىق بولۋ ءۇشىن 1989 جىلى تاراز قالاسىنداعى «سۇلۋ»فابريكاسىندا تىگىنشى بولىپ جۇمىس ىستەپ، تاجىريبە جيناقتاي باستادىم. كەيىننەن، تاۋەكەلگە بەل بۋىپ، ازدى-كوپتى تىگىن ماشينالارىن الىپ، از عانا اداممەن ءوز كاسىبىمدى باستاپ كەتتىم»، - دەيدى كاسىپكەر.

وبلىس ورتالىعى تاراز قالاسىدا تۋعان م.بايماناسوۆا تارازداعى كاسىپتىك تەحنيكالىق كوللەدجدى تىگىنشى ماماندىعى بويىنشا بىتىرگەن. ومىرلىك جارىن شۋ وڭىرىنەن جولىقتىرىپ، وتاۋ قۇرعاننان كەيىن دە تىگىنشىلىكتى تاستاماعان. اۋدانداعى اتەلەلەردە جۇمىس ىستەيتىن تىگىنشىلەرمەن بىرگە مەيرامحانا، مەكتەپ جانە تاعى باسقالارىنىڭ پەردەلەرىن اسەمدەپ، ءساندى ەتىپ تىگۋمەن اينالىسادى. 2008 جىلى ءوز كاسىبىن قولعا العان مارجان «بايماناسوۆا» جەكە كاسىپكەرلىگىن اشادى. العاشىندا شاعىن عانا بولمەلەردى جالعا الىپ، كيىم تىگۋ، قىسقارتۋ، وڭدەۋ سىندى جۇمىستاردى اتقارعان. كەيىن ۇلتتىق ۇلگىدەگى كيىمدەرى ارنايى تاپسىرىسپەن تىگە باستاعان. بۇل كاسىپتى جاڭادان باستاعاندا نەمىستىڭ «Zinger» تىگىن ماشيناسىمەن جۇمىس ىستەسە، ءقازىر بايماناسوۆانىڭ شەبەرحاناسى كۇردەلى جۇمىستاردى وڭاي اتقارا الاتىن ارنايى تىگىن ماشينالارىمەن جابدىقتالعان. ءقازىر مارجان بايماناسوۆانىڭ تۇراقتى تابىس كوزى – قازاقتىڭ تويلارى.

بايماناسوۆانىڭ ايتۋىنشا، العا قويعان جوسپارى مەن ماقساتارى اۋقىمدى. «ارمانىم ۇلكەن تىگىن فابريكاسىن اشۋ»، - دەيدى ول. اۋدانداعى كاسىپكەرلەر پالاتاسىنان نەسيە الۋعا مۇمكىندىك تۋىپ جاتسا، ءوندىرىس كولەمىن بىرنەشە ەسەگە كوبەيتىپ، قول استىنداعى جۇمىسشى سانىن ارتتىرۋدى دا كوزدەپ وتىر.

شاپاعات قونىسباي