ۋكراينانىڭ مەملەكەتتىك تەرگەۋ بيۋروسى ەلدىڭ ەكس-پرەزيدەنتى پەتر پوروشەنكو مەن بىرنەشە جوعارى لاۋازىمدى تۇلعالاردىڭ ۇستىنەن 11 قىلمىستىق ءىس قوزعادى. بۇل تۋرالى بيۋرو ديرەكتورى رومان ترۋبا بريفينگ بارىسىندا ايتتى دەپ حابارلايدى Qamshy.kz اقپارات اگەنتتىگى «ريا نوۆوستيگە» سىلتەمە جاساپ.

رومان ترۋبانىڭ ايتۋىنشا، پوروشەنكونى "سالىق تولەۋدەن جانە «كۋزنيا نا رىبالسكوم» زاۋىتىن ساتۋ بارىسىندا 300 ملن دوللاردى زاڭداستىرۋدان جالتارۋى مۇمكىن" دەگەن ىسكە كۋاگەر رەتىندە شاقىرعان.

ۋكراينانىڭ بۇرىنعى پرەزيدەنتىنىڭ ەسىمى بۇعان دەيىن بىرنەشە قىلمىستىق ىستە اتالعان بولاتىن. اتاپ ايتقاندا، قىزمەتىن اسىرا پايدالاندى، كەرچ بۇعازىنداعى وقيعادا مەملەكەتتىك ساتقىندىق جاسادى، «پرياموي» تەلەارناسىن زاڭسىز يەلەندى، دەپۋتاتتىق فراكسيا قۇرۋدا جالعان قۇجاتتار جاسادى، بيلىكتى باسىپ الماق بولدى دەگەن سياقتى ايىپتار تاعىلدى.

دەسە دە، ەكس-پرەزيدەنتكە قاتىستى ازىرگە ناقتى تەرگەۋ امالدارى ءجۇرىپ جاتقان جوق. پوروشەنكونىڭ ءوزى «ەۋروپالىق ىستەر» پارتياسىنىڭ سەزىندە ۋكراين حالقىنىڭ الدىندا جاۋاپكەرشىلىك ارقالايتىنىن، ەشقانداي ىزگە تۇسۋشىلىكتەن قورىقپايتىنىن ايتقان.