جامبىل وبلىسى شۋ اۋدانىندا تاعى ءبىر ۇشەم دۇنيەگە كەلدى. بۇنداي جاعداي اتالعان اۋداندا العاش رەت بولىپ تۇرعان جوق. ماسەلەن وتكەن جىلى عانا شۋ اۋدانىندا ۇشەمدەردىڭ دۇنيەگە كەلگەنىن كوپتەگەن ب ا ق سۇيىنشىلەپ جازعان. ەندى مىنە، ءدال وسىنداي قۋانىش بيىل دا قايتالانىپ وتىر. ناقتىراق ايتساق، اۋدان ورتالىعىنان شالعاي ورنالاسقان دالاقاينار اۋىلدىق وكرۋگىنىڭ تۇرعىنى انتونينا انتيپوۆا شەكەسى تورسىقتاي ءۇش ۇلدى دۇنيەگە اكەلدى. ەرلى-زايىپتىلار ۇلدارىنا اندرەي، دانيل جانە ارتەم دەپ ەسىم بەرگەن.

ۇشەمدەردىڭ اناسىنىڭ ايتۋىنشا، ول «ءۇش بىردەي ۇلدى دۇنيەگە الىپ كەلەتىنىن الدىن الا ءبىلىپتى».

«جۇكتىلىكتىڭ سوڭعى ايلارىندا اۋرۋحاناداعى دارىگەرلەر ۇشەم بولاتىنىن ايتقان ەدى. اۋەلگىدە تاڭىرقاپ قالعانىمىز دا راس. «قانشا مالى بولسا دا، باي قۋانار ەگىزگە» دەگەندەي، بۇنىڭ بىزگە بەرىلگەن ۇلكەن سىي ەكەنىن اڭعاردىق. بوساناتىن ۋاقىت جاقىنداعاندا اۋدانىمىزدىڭ اق حالاتتىلارى تاراز قالاسىنداعى پەريناتالدىق ورتالىققا جەدەل-جاردەم كولىگىمەن جەدەل جونەلتتى. شۇكىر، نارەستەلەر امان-ەسەن ومىرگە كەلدى. اندرەي 2 كەلى 300 گرامم، دانيل 1 كەلى 900 گرامم، ال ارتەم 2 كەلى 300 گرامم بوپ تۋىلدى. ءقازىر ۇشەۋىنىڭ دە دەنساۋلىعى جاقسى»، - دەيدى انتونينا.

وسىلايشا، كۇنى كەشە عانا ءتورت بىردەي قىزدى تاربيەلەپ وتىرعان انتونينا ءبىر-اق كۇندە التىن القا يەگەرى اتانىپ شىعا كەلدى. ءوزى ورىس ۇلتىنان بولعانىمەن، جولداسى اندرەي تومپا ۆەنگر ۇلتىنىڭ وكىلى. دەگەنمەن، قازاقىلىقتىڭ قايماعى بۇزىلماعان دالاقاينار اۋىلىندا تۇراتىن وتباسى جەرگىلىكتى تۇرعىندارمەن تۋعان-تۋىسىنداي ارالاسىپ كەتكەن.

 «اتا-انام وسى اۋىلدا تۇرىپ، وسى جەردە ومىردەن وزدى. مەن دە وسىندا دۇنيەگە كەلدىم. قازاق ۇلتىنىڭ باۋىرمالدىعىنا ءالى كۇنگە تاڭعالامىن. بۇگىن دە قولدارىنان كەلگەنشە قاۋىم بولىپ كومەك قولىن سوزۋدا. اۋىلداستارىما العىستان باسقا ايتارىم جوق»، - دەيدى اندرەي تومپا.

اۋىزبىرشىلىگى مەن ىنتىماعى قاتار جۇرەتىن اۋىل تۇرعىندارى ەرلى-زايىپتىلارعا قوي، ەشكى، سيىر سىندى ءتورت تۇلىكتىڭ ءتۇر-تۇرىن شاما-شارقىنا قاراي جيناپ بەرسە، اۋىلداعى اكىمشىلىك، مەكتەپ، بالاباقشا جانە دارىگەرلىك امبۋلاتوريا ۇجىمى 200 مىڭ تەڭگە كولەمىندە قارجى جيناپ بەرگەن. بۇدان بولەك، جەكە-جەكە سىيلىق جاساپ، كومەك قولىن سوزعان تۇرعىندار دا جەتەرلىك. ءوز كەزەگىندە ەرلى-زايىپتىلار اۋدان باسشىلارى مەن اۋىل تۇرعىندارىنا ءوز ريزاشىلىقتارىن ءبىلدىرىپ، العىستارىن ايتىپ جاتىر.

شاپاعات قونىسباي