بۇگىن الماتى قالاسىندا مانەرلەپ سىرعاناۋدان قازاقستان رەسپۋبليكاسىنىڭ بەلگىلى ەڭبەك سىڭىرگەن  سپورت شەبەرى دەنيس تەندى ەسكە الۋ شاراسى بولدى دەپ حابارلايدى Qamshy.kz اقپارات اگەنتتىگى. 

ەسكە الۋ جيىنى وسىدان ءبىر جىل بۇرىن دەنيس تەن قايتىس بولعان قۇرمانعازى مەن بايسەيىتوۆا كوشەلەرىنىڭ قيىلىسىندا بولدى. ءدال وسى جەردە سپورت شەبەرىنە ارنالعان ەسكەرتكىش ورناتىلعان بولاتىن. 

"قۇرمەتتى قاۋىم، بۇگىن ءبىز ەلىمىزدىڭ بەلگىلى ازاماتى دەنيس تەندى ەسكە الۋ راسىمىنە جينالدىق. دەنيس قامشىنىڭ سابىنداي قىسقا عۇمىرىندا وشپەس ءىز قالدىرىپ، ءوز ەسىمىن سپورت تاريحىندا التىن ارىپپەن جازىپ كەتتى"، - دەدى جيىنعا قاتىسقان الماتى قالاسى اكىمىنىڭ ورىنباسارى ەرجان باباقۇماروۆ.

دەنيس تەندى ەسكە الۋعا قالا تۇرعىندارى، قوعام قايراتكەرلەرى، سپورت شەبەرلەرى قاتىستى.

"دەنيستىڭ قانداي ادام بولعانىن ايتىپ ءتۇسىندىرىپ جاتۋدىڭ قاجەتى جوق. ويتكەنى دەنيستىڭ قانداي ادام بولعانىن بارلىعى بىلەدى. ەگەر ونىڭ قانداي ەكەنىن ەشكىم بىلمەسە، ءبىر جىل بۇرىن دەنيسپەن قوشتاسۋعا حالىق تۇگەل كەلمەس ەدى. بۇل ونىڭ قانداي ادام بولعانىنىڭ كورسەتكىشى. مەن ءۇشىن مانەرلەپ سىرعاناۋ دەنيستىڭ وبرازىمەن سيپاتتالادى. ول ءبىزدىڭ ادامىمىز بولدى. ول ونەردىڭ ادامى بولدى. مانەرلەپ سىرعاناۋدان وزگە مۋزىكامەن، كينومەن اۋەستەندى. ءوزىن جان-جاقتى قالىپتاستىردى. سوندىقتان، مەن وعان بارلىعى ءۇشىن العىس ايتقىم كەلەدى. ءبىز ونى ەشقاشان ۇمىتپايمىز. ول ءبىزدىڭ ماڭگى جۇرەگىمىزدە"، - دەدى ءانشى ءالي وقاپوۆ.  

ەسكە الۋ جيىنىنىڭ سوڭىندا دەنيس تەننىڭ ەسكەرتكىشىنە گۇل شوقتارى قويىلدى. 

"ءومىردى شىن سۇيەمىن. اتا-انامدى جاقسى كورەمىن. ادامداردى جاقسى كورەمىن. سۇيگەندى جاقسى كورەمىن. سونىمەن بولىسكىم كەلەدى. ياعني، ءوزىم ەمەس، سومداعان كەيىپكەرىم ارقىلى بولىسسەم دەيمىن. جيىرما بەس جاستا الەمگە باسقاشا قارايدى ەكەنسىڭ"، – دەپ جازعان ەدى دەنيس تەن 2018 جىلدىڭ 13 ماۋسىمداعى سوڭعى تۋعان كۇنىندە.

الەمگە وزگەشە كوزقاراسپەن قاراعان سپورت شەبەرىنىڭ شىنايى ماحابباتى حالقىنىڭ جۇرەگىندە ماڭگىلىك ساقتالماق.