جامبىل وبلىسى شۋ اۋدانىنىڭ ىرگەسىندەگى ساۋىتبەك اۋىلىندا وسىدان بىرنەشە جىل بۇرىن ەل كۇتكەن جارقىن ءىس باستاۋ العان ەدى. ءبىر جەڭنەن قول، ءبىر جاعادان باس شىعارعان اۋىل تۇرعىندارى تۋىپ-وسكەن جەرلەرىنە يمان جولىندا مەشىت سالۋدى كوزدەگەن بولاتىن. ەندى، مىنە، كوپتەن كۇتكەن اتالمىش مەشىتتىڭ قۇرىلىسى دا اياقتالۋعا جاقىن قالىپتى.

مۇسىلماندى تىلىنە، ناسىلىنە، ۇلتىنا قاراپ بولمەي، باستارىن ءبىر جەرگە توعىستىراتىن قۇتتى مەكەننىڭ قۇرىلىسى وسىدان 3 جىل بۇرىن باستالعان. بۇگىندە يماندىلىق ءۇيىنىڭ قۇرىلىسىن تۇگەلدەي ءوز قولىنا العان سول اۋىلدىڭ تۋماسى، جەكە كاسىپكەر جاقسىعۇل ديقانبايەۆ اۋەلگىدە بۇل ىسكە تۇتاس اۋىل جۇمىلا كىرىسكەنىن ايتادى. «ءاۋ باستا وزىمىزدە مەشىت سالاتىن وي بولعان. شامالى قاراجات جيناپ الۋدى كوزدەگەن ەدىك. سودان اۋىلدىقتار ءبىر اۋىزدان قۇرىلىستى باستايمىز دەگەندە 100 قاپ سەمەنت الىپ بەرىپ، ىرگەتاسىن قالاعانبىز. الايدا، ءدال وسى قالپىندا ءبىر جىل وزگەرىسسىز تۇردى. اراعا ءبىر جىل سالىپ، كىرپىش تۇسىردىك تە، قابىرعاسىن قالادىق. كەيىننەن بۇل ىسكە بەل شەشە كىرىسىپ، قۇرىلىستى باستاپ كەتتىك. وتكەن جىلى ارنايى ادام جالداپ، مەشىتتىڭ ىشكى-سىرتقى ارلەۋ جۇمىستارىن جاساتقانبىز. سوڭعى 3 ايعا جۋىق ۋاقىتتا قۇرىلىس ەرەكشە قارقىن الىپ، جۇمىستىڭ كوبى ىستەلىپ، ازى قالدى. ءساتىن سالسا، قىركۇيەك ايىنا دەيىن قۇرىلىستى تولىق اياقتاۋدى جوسپارلاپ وتىرمىز. يگى ءىستى باستاماس بۇرىن، ءمۇفتياتتان رۇقسات الىپ، قۇجاتتارىن دا راسىمدەپ قويدىق. تۇتاستاي العاندا، مەشىتتى سالۋ ءۇشىن 15 ميلليونداي قارجى جۇمسالدى. ونىڭ ىشىندە، اۋىلدان شىققان ازاماتتار دا قارجىلاي قولداۋ بىلدىرگەنىن ايتا كەتۋ كەرەك» - دەيدى ج.ديقانبايەۆ.

اۋىلدىڭ كىرەبەرىسىندە ورنالاسقان اسايىن شىنىبەك ۇلى اتىنداعى مەشىت 14 سوتىق جەرگە سوعىلۋدا. ونىڭ ۇزىندىعى 16 مەتردى قۇراسا، ەنى 10 مەتر بولادى. اۋىلدىڭ رۋحاني بولمىسىنا جاڭاشا سەرپىن بەرەتىن ساۋلەتى مەن ءسانى كەلىسكەن مەشىتتە قۇلشىلىق بولمەسى، يمامعا ارنالعان جەكە بولمە، تابيعي گازبەن جۇمىس ىستەيتىن قازاندىق جانە اۋلاداعى اس بەرۋ الاڭى مەن دارەت الاتىن ارنايى ورىن قاراستىرىلعان.

وسىلايشا، 3 ۇل، 1 قىزدان وربىگەن 10 نەمەرەنىڭ اتاسى اۋىلداستارى باستاعان ءىستى قولىنا الىپ، ونى ابىرويمەن اتقارىپ كەلەدى. وسىندايدا، قازاقتىڭ «اۋىلىنا قاراپ، ازاماتىن تانى!» دەگەن اتالى ءسوزى ەرىكسىز ەسكە تۇسەدى. راسىمەن دە، ءوزى تۋىپ-وسكەن اۋىلىن ءوز باسپاناسىن قامداعانداي كەم-كەتىگىن تۇگەندەپ، جىرتىعىن جاماپ، تۇرمىسىن بازارلى ەتۋگە بار كۇشىن جۇمسايتىن ازاماتتاردىڭ بار ەكەنى كوڭىل قۋانتادى. جاسىراتىنى جوق، بۇنداي اۋىلدان بەرەكەنىڭ ەشقاشان تارقامايتىنى دا بەلگىلى. سول سەبەپتى دە، جەرلەستەرىمىزدىڭ وسىناۋ يگى ىستەرى وزگەلەرگە دە ۇلگى بولسا ەكەن دەيمىز. «يگى ءىستىڭ باسىنا، جاقسى كەلەر قاسىنا» دەگەندەي، اۋىل حالقى ءۇشىن جاسالىپ جاتقان يگى شارا بەرەكەلى بولسا ەكەن دەيمىز.

شاپاعات قونىسباي