22 ماۋسىمدا جامبىل وبلىسى شۋ اۋدانىندا «وبلىس اۋماعىندا ۆەتەريناريالىق – سانيتارلىق قاۋىپسىزدىكتى قامتاماسىز ەتۋ ماسەلەلەرى» اتتى وبلىستىق سەمينار-كەڭەس بولىپ ءوتتى.

اتالعان جيىنعا وبلىس اكىمىنىڭ ورىنباسارى مۇراتحان شۇكەيەۆ، وبلىس اكىمدىگى ۆەتەريناريا باسقارماسىنىڭ باسشىسى وسپان بەردياروۆ جانە جامبىل وبلىسىنداعى بارلىق اۋداننىڭ ۆەتەريناريا سالاسىنا جاۋاپتى ماماندارى قاتىستى. سەمينار-كەڭەستىڭ باعدارلاماسىنا سايكەس، شۋعا ارنايى اتباسىن بۇرعان قوناقتار الدىمەن اۋداندىق ۆەتەريناريالىق كاسىپورىن مەكەمەسىنىڭ اۋماعىندا ورنالاسقان ۆەتەريناريالىق بيوپرەپاراتتاردى ۇزاق مەرزىمدە ساقتايتىن قويمانىڭ جانە يەسىز، قاراۋسىز قالعان جانۋارلاردى يەسى انىقتالعانشا ۋاقىتشا ۇستاۋ ورنىنىڭ جۇمىسىمەن تانىستى. سونىمەن قاتار، جانۋارلاردىڭ ولەكسەلەرىمەن بيولوگيالىق قالدىقتاردى جانە ۆاكسينالاردان بوساعان قۇتى ىدىستاردى ورتەۋگە ارنالعان ينسينەراتور قوندىرعىلارىمەن، برۋسەللەزگە شالدىققان ۋاق مالداردى سانيتارلىق سويۋ الاڭىنا تاسىمالداۋ الدىندا جيناقتايتىن يزولياتورمەن سونداي-اق، تولە بي اۋىلدىق وكرۋگىنىڭ ۆەتەريناريالىق پۋنكتىنىڭ دە جۇمىسىن كوزبەن كورىپ، ءوزارا تاجىريبە الماستى.

بۇدان ءارى سەمينار-كەڭەس اۋدان ورتالىعىندا ورنالاسقان ۆەتەريناريالىق پۋنكتىڭ ءماجىلىس زالىندا جالعاسىن تاپتى. باسقوسۋدى وبلىس اكىمىنىڭ ورىنباسارى مۇراتحان ءجۇنىسالى ۇلى اشىپ، جالپى وڭىرىمىزگە قاراستى اۋداندارداعى ۆەتەريناريالىق قىزمەتتىڭ دەڭگەيىن ءسوز ەتتى. ول ءوز سوزىندە سەمينار-كەڭەستىڭ ءدال وسى شۋ اۋدانىندا ۇيىمداستىرىلۋىنىڭ دا وزىندىك سەبەبى بار ەكەنىن ايتتى. ويتكەنى، مۇنداعى ۆەتەريناريالىق قىزمەت ءبىر جولعا قويىلىپ، وزگە اۋداندارعا ۇلگى بولارلىقتاي جۇيەلى جۇمىس جاساۋدا. سونىمەن بىرگە، وبلىس اكىمىنىڭ ورىنباسارى جامبىل وبلىسى ءۇشىن ەت ەكسپورتىن قولعا الىپ، ۇلكەن نارىققا شىعۋعا مول مۇمكىندىك تۋىپ وتىرعانىن جەتكىزدى. «قازىرگى كەزدە شەت مەملەكەتتەرگە ەت ەكسپورتتاۋعا ۇلكەن مۇمكىندىك تۋىپ وتىر. ونىڭ ۇستىنە، ءبىزدىڭ الدىمىزدا اۋىلشارۋشىلىعى ونىمدەرىن ەكى ەسەگە دەيىن ارتتىرۋ مىندەتى تۇر. ول ءۇشىن ەڭ الدىمەن وبلىستىڭ ەپيزوتيالىق جاعدايى قالىپتى دەڭگەيدە بولۋى ءتيىس. بۇگىنگى تاڭدا ءوڭىرىمىز بۇل باعىتتا رەسپۋبليكا بويىنشا الدىڭعى قاتاردا. بۇنىڭ ءبارى، ارينە، سىزدەردىڭ ياعني، ۆەتەريناريا سالاسىندا ەڭبەك ەتەتىن مامانداردىڭ ارقاسى. وسى ەپيزوتيالىق تۇراقتىلىقتى الداعى ۋاقىتتا دا ءدال وسى قالپىندا ساقتاپ قالۋىمىز كەرەك» - دەدى م.شۇكەيەۆ.

سەمينار-كەڭەس بارىسىندا وبلىس اكىمدىگى ۆەتەريناريا باسقارماسىنىڭ باسشىسى وسپان بەردياروۆ وڭىردەگى ەپيزوتيالىق جاعداي بويىنشا بايانداما جاساپ، ءبىرقاتار اۋدانداردا ورىن العان كەمشىلىكتەردى تىلگە تيەك ەتسە، جۇمىسى ءبىر جولعا قويىلعان اۋداندارعا ودان ءارى دە وسى باعىتتا بىرلەسە جۇمىس ىستەۋگە شاقىردى. ءوز كەزەگىندە اۋدان اكىمىنىڭ ورىنباسارى ءاليحان بالقىبەكوۆ اۋداننىڭ ۆەتەريناريا سالاسىندا اتقارىلىپ جاتقان اۋقىمدى ىستەرگە كەڭىنەن توقتالىپ، الداعى جوسپارلارمەن دە ءبولىستى. جيىن سوڭىندا وزگە اۋدانداردان كەلگەن سالا ماماندارى ءوز پىكىرلەرىن ءبىلدىرىپ، كەيبىر تۇيتكىلدى ماسەلەلەر بويىنشا قويىلعان سۇراقتارىنا جاۋاپ الىپ، ءوزارا تاجىريبە الماستى.

شاپاعات قونىسباي