شىمكەنتتەگى ءۇش جاسار قىزدىڭ ولىمىنە قاتىستى جاڭا دەرەكتەر شىقتى دەپ حابارلايدى Qamshy.kz اقپارات اگەنتتىگى. بالانى كورشىسى ءولتىرىپ العانى انىقتالىپ، ول قاماۋعا الىنعان. بۇل تۋرالى شىمكەنت اكىمى عابيدوللا ءابدىراحىموۆ حابارلادى.
"وسىدان 3 كۇن بۇرىن قالامىزدا قايعىلى وقيعا ورىن الدى. اۋلادا ويناپ ءجۇرىپ، 3 جاسار كاۋسار اكەسىنىڭ ارتىنان بارامىن دەپ وزدەرىنىڭ كورشىسىمەن بىرگە اكەسى وتىرعان جاققا جۇرەدى. قورشاۋدى سەكىرىپ وتپەكشى بولىپ، كىشكەنتاي كاۋساردى جەتەكتەگەن كورشىسى ونى قولىنان ءتۇسىرىپ الدى. تالىپ قالعان ءسابيدى كورىپ، كورشىسى قورقىپ، كىشكەنتاي ءسابيدى سول جەردە قالدىرىپ كەتكەن. قىلمىس جاساعان ازاماتقا قاتىستى ءىس قوزعالىپ، قاماۋعا الىنعان. ول ءسوزسىز جاۋاپقا تارتىلادى.
ءىس-ساپاردان كەلىسىمەن وقيعا ورنىنا بارىپ، ءمان-جايدىڭ بارلىعىن انىقتادىم. كاۋسارعا قاتىستى ەشقانداي زورلىق جاسالماعان. كاۋساردىڭ اتا-اناسىنا كوڭىل ايتتىم، سىندارلى ساعاتتا بەكەم بولۋعا شاقىردىم. كاۋساردىڭ جاتقان جەرى جارىق بولىپ، اللا الدىنان جارىلقاسىن! ءار بالا ءبىز ءۇشىن قىمبات. سابيلەرىمىزدىڭ قاۋىپسىزدىگىنە ءبارىمىز جاۋاپتىمىز. قۇرمەتتى قالا تۇرعىندارى، بالالارىمىزدى ساعات سايىن باقىلاپ قاداعالاپ جۇرەيىك!
اكىمشىلىك جانە قالا پوليسياسى ءتيىستى جۇمىستاردى كۇشەيتەدى. بۇگىن وسى ماسەلە بويىنشا ارنايى جينالىس وتكىزىپ، تاپسىرما بەرەمىن"،- دەلىنگەن قالا اكىمىنىڭ جازباسىندا.
پىكىر قالدىرۋ