وتكەن اپتادا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆتىڭ باستاماسىنان قولعا الىنعان #Birge #TazaQazaqstan ەكولوگيالىق اكسياسىنا جامبىلدىقتار دا  جاپپاي اتسالىستى. اتالعان تازالىق شاراسىنا جامبىل وبلىس اكىمىنىڭ مىندەتىن اتقارۋشى نۇرجان كالەندەروۆ باستاعان وبلىس اكىمى اپپاراتىنىڭ جانە وبلىس اۋماعىنداعى بارلىق مەملەكەتتىك مەكەمەلەردىڭ، ونەركاسىپ ورىندارىنىڭ قىزمەتكەرلەرى مەن ءتۇرلى سالا ماماندارى  قاتىستى. 

بىردەن ايتا كەتەيىك، اكسيانىڭ نەگىزگى ماقساتى — سۋ ايدىندارىن كۇل قوقىستان تازارتۋ بولاتىن. سوعان وراي سەنبىلىككە شىققاندار وبلىس ورتالىعى تاراز قالاسىنىڭ اۋماعىنداعى «قاراسۋ – 1»، «قاراسۋ - 2»، «تۇيتە»، «تورەگەلدى»، «بازارباي»، «ءۇشبۇلاق»، «سەڭكىباي»، «وڭتۇستىك قۇرعاتۋ درەناجدى»، «تايۆان»، درەناجدى كانالاردىڭ بويى، «تالاس» وزەنى جانە «اقبۇلاق»، «قاراتاۋ» مولتەك اۋداندارىنداعى كانالداردىڭ جاعاجايلارىنا تازالىق جۇمىستارىن جۇرگىزدى. 

"بۇگىندە بارشامىز ءبىر كىسىدەي وسى كانالدار مەن وزەندەردىڭ ماڭايىن تازارتۋعا جۇمىلىپ وتىرمىز. بۇعان قالا تۇرعىندارى دا ءوز بەلسەندىلىكتەرىن تانىتىپ جاتىر. بۇل باستاما تەك قالا اۋماعىندا عانا ەمەس،  وبلىستىڭ بارلىق 10 اۋدانىندا جۇزەگە اسىپ جاتىر. اۋىلدىق ەلدى-مەكەندەردەگى وزەندەر مەن كانالداردىڭ، ءتىپتى قامىس باسقان ارىق-اتىزداردىڭ دا اۋماقتارى تازالاندى. بۇل شارا اتاۋىنا سايكەس ەلدى بىرىگىپ ەڭبەك ەتۋگە، اينالانى تازا ۇستاۋعا ۇندەيدى"، – دەدى نۇرجان كالەندەروۆ.

قالا اۋماعىنداعى وزەن-كولدەر مەن سۋ ايدىندارىنىڭ جاعالاۋلارىن جالپى حالىقتىڭ بىرگە تازارتۋىن تاراز تۇرعىندارى دا قولداپ وتىر. جانىبەك سۇرىمباي ەسىمدى تۇرعىننىڭ ايتۋىنشا، تازالىقتى ساقتاۋ ەڭ الدىمەن تۇرعىنداردىڭ وزدەرى ءۇشىن ماڭىزدى.

«جاز مەزگىلىدە سۋ ايدىندارىنىڭ جاعالاۋلارىنىڭ بارلىعى قوقىسقا تولىپ كەتەتىنى جاسىرىن ەمەس. بۇعان ءبىرىنشى كەزەكتە، سول ماڭدا قىدىراتىن ادامدار كىنالى. الايدا، «ولار شاشىپ كەتتى، باسقا بىرەۋ جيناپ بەرەدى» دەپ وتىرۋعا بولمايدى. قالانىڭ ءاربىر تۇرعىنى قوقىس كورسە تازالاپ جۇرگەنى ءجون. سونىمەن قاتار، ءدال وسىنداي سەنبىلىكتەرگە بەلسەنە اتسالىسقانى ابزال»، – دەدى قالا تۇرعىنى جانىبەك سۇرىمباي.

تاراز قالاسى اكىمدىگىنىڭ مالىمەتىنشە، 21 نىسان قوقىستان تازارتىلعان. جۇرگىزىلگەن سەنبىلىككە  قالا بويىنشا 4535 ادام قاتىسىپ، 47 تەحنيكا جۇمىس ىستەدى. قالا اۋماعىندا 61،8 شاقىرىم كانالداردىڭ بويى تازارتىلىپ، 258 توننا كۇل-قوقىس شىعارىلدى.