اتىراۋداعى "جەر داۋى" بويىنشا سوتتالعان قوعام بەلسەندى تالعات اياندى 19 شىلدەدە №2 اتىراۋ قالالىق سوتى مەرزىمىنەن بۇرىن بوساتتى دەپ حابارلايدى Qamshy.kz اقپارات اگەنتتىگى اق جايىق باسىلىمىنا سىلتەمە جاساپ.
"وسىدان ءبىر جىل بۇرىن ولار مەنىڭ باس بوستاندىعىمدى شەكتەۋ جازاسىن شارتتىعا وزگەرتىپ، ونى 2021 جىلعا دەيىن سوزدى. باس بوستاندىعىڭنىڭ شەكتەلۋى نە ەكەنىن ءتۇسىنسىن دەگەن سەكىلدى. بىلاي قاراپ تۇرساڭىز، بوستاندىقتاسىز، ۇيدەسىز عوي، ءبىراق ەشقايدا بارا المايسىز، رۇقساتسىز ارەكەت قىلا المايسىز، بوس ۋاقىتىڭىز دا شەكتەلەدى. ءار اپتا سايىن پروباسيا ورگاندارىنا بارىپ، توبە كورسەتىپ تۇرۋىڭىز كەرەك، كەشكى ۋاقىتتا ەشقانداي ەسكەرتۋسىز پوليسيا قىزمەتكەرلەرى ۇيگە ساۋ ەتە تۇسە الادى. سوندىقتان قاس قارايا "كۇلشەقىز" قۇساپ ۇيىڭىزگە تۇرا جۇگىرەسىڭ. كوڭىل كوتەرەتىن كەشتەرگە بارا المايسىز، مىسالى تويعا بارۋعا قۇقىڭ جوق. باسقا جەرگە، مىسالى قازاعا بارۋ كەرەك بولسا، وندا دا رۇقسات الۋىڭ كەرەك. ءجسن-نىڭ دە بۇعاتتالعان، ويتكەنى ءاتى-جونىڭىز لاڭكەستىكتى قارجىلاندىرۋمەن اينالىساتىن ادامداردىڭ تىزىمىندە تۇر، ءبىر سوزبەن ايتقاندا بۇل ەشبىر جۇمىس ورنى جۇمىسقا المايتىن تاڭبا"، - دەپ جازدى تالعات ءوزىنىڭ Facebook-تەگى پاراقشاسىندا.
تالعات اياننىڭ ايتۋىنشا، سوتقا قاتىسقان پروكۋرور مەن پروباسيا قىزمەتى بۇل شەشىمگە قارسى بولعان، ءبىراق سوت ونى مەرزىمىنەن بۇرىن بوساتۋ تۋرالى ءوتىنىشىن قاناعاتتاندىرعان. الايدا قوعامدىق قىزمەتكە تىيىم سالۋ كۇشىندە قالادى. ەسكە سالايىق، بىلتىر 28 ساۋىرىندە تالعات ايان اقتوبە تۇزەۋ كولونياسىنان بوساتىلىپ، جازانىڭ وتەلمەگەن بولىگىن (باس بوستاندىعىنان ايىرۋ تۇرىندە) ءۇش جىلعا باس بوستاندىعىنان شەكتەۋگە اۋىستىردى.
تالعات اياننىڭ سەرىگى ماكس بوقايەۆ ءوزىنىڭ بەسجىلدىق قاماۋ مەرزىمىن اقتوبەدە، كا-168/2 ورتا رەجيمدەگى كولونيادا وتەۋىن جالعاستىرىپ جاتىر.
