جامبىل وبلىسىنىڭ سارىسۋ اۋدانىندا وبلىس اكىمنىڭ ورىنباسارى نۇرجان كالەندەروۆتىڭ قاتىسۋىمەن  قۋاتتى 100 مەگاۆاتت بولاتىن «جاڭاتاس جەل ەلەكتر ستانساسى» جشس-نىڭ قۇرىلىسى سالتاناتتى تۇردە باستالدى.

جامبىل وبلىس اكىمدىگىنىڭ مالىمەتىنشە، اعىمداعى جىلى قۇرىلىس جۇمىستارىنىڭ العاشقى كەزەڭى باستالعان اتالعان جەل ەلەكتر ستانساسى الداعى ۋاقىتتا ورتا ازياداعى جەلدەن ەلەكتر قۋاتىن وندىرەتىن ەڭ ۇلكەن ستانسا بولماق. بۇل ەلەكتر ستانساسىن سالۋ تۋرالى كەلىسىم-شارت ينۆەستورلارمەن 2013 جىلدىڭ مامىر ايىنان باستاپ جۇرگىزىلە باستاعان. ءقازىر باعانالاردى ورناتۋ جۇمىستارىنا ارنايى كاسىبي مامانداردان بولەك، جەرگىلىكتى تۇرعىنداردان 300-گە جۋىق جۇمىسشى تارتىلعان.

رەسمي مالىمەتتەر بويىنشا، جوبانىڭ جالپى قۇنى – 130 ميلليون دوللاردى قۇرايدى. سونىمەن قاتار، جەل ەلەكتر ستانساسىنىڭ قۇرىلىسى 2020 جىلى تولىق اياقتالىپ، 40 ادام تۇراقتى جۇمىس ىستەيدى دەپ كۇتىلۋدە.

«قازىرگى ۋاقىتتا جوبانى جۇزەگە اسىرۋ ءۇشىن قۇرىلىس جۇمىستارىن جۇرگىزۋمەن اينالىساتىن كومپانياعا سارىسۋ اۋدانى اكىمدىگىنىڭ تۇركىستان اۋىلدىق وكرۋگىنەن 233 گەكتار جەر بەرىلگەن. ينۆەستيسيالىق جوبا اياسىندا جەرگىلىكتى حالىقتىڭ جاعدايىن جاساۋمەن قاتار الەۋمەتتىك-ەكونوميكالىق دامۋعا دا ەرەكشە سەرپىن بەرىلمەك. سونىمەن قاتار، قۇرىلىس جۇمىستارىنىڭ العاشقى كەزەڭىن باستاعالى وتىرعان جەل ەلەكتر ستانساسى ورتا ازياداعى ەلەكتر قۋاتىن وندىرەتىن ەڭ ۇلكەن ستانسا بولماق»، - دەگەن وبلىس اكىمىنىڭ ورىنباسارى نۇرجان كالەندەروۆ بۇل نىساننىڭ ەكولوگيالىق قاۋىپسىزدىگىنە دە توقتالىپ ءوتتى.

«جەل ەلەكتر ستانساسىنىڭ قورشاعان ورتاعا سانيتارلىق-ەپيدەميولوگيالىق اسەرى تولىق تەكسەرىلىپ، وبلىس اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ وڭ قورىتىندىسىن الدى. بۇل نىسان پايدالانۋعا بەرىلگەن سوڭ تۇرعىندارعا ەشقانداي دا ەكولوگيالىق ءقاۋىپ بولمايدى»، - دەدى نۇرجان كالەندەروۆ.

رەسمي مالىمەتتەر بويىنشا جوبانىڭ نەگىزگى اكسيونەرى - «ۆيزور قازاقستان» كومپانياسى. «جاڭاتاس جەل ەلەكتر ستانساسى» ج ش س ءبىرىنشى جارتىجىلدىقتا سارىسۋ اۋدانى ەكونوميكاسىنىڭ نەگىزگى كاپيتالىنا 4،5 ميلليارد تەڭگە كولەمىندە ينۆەستيسيا سالىپ، نەگىزگى كورسەتكىشتەردىڭ ورىندالۋىنا وڭ اسەرىن تيگىزدى.

سونىمەن قاتار، سالتاناتتى شارادا كەلىسىم-شارتقا قول قويىلىپ، جوبا ينۆەستورلارى اۋداندىق اۋرۋحاناعا جەدەل جاردەم كولىگىن سىيعا تارتتى.