تۇركىستان وبلىسى ارىس قالاسىنداعى اسكەري قويماداعى جارىلىس كەزىندە جارالانعان ءۇش ادامنىڭ ءبىرى سەگىز جاسار ايان شارىپبەك اۋرۋحانادا قايتىس بولدى. بۇل تۋرالى بالانىڭ اكەسى ەربول شارىپبەك حابارلادى دەپ جازى Qamshy.kz اقپارات اگەنتتىگى.
بۇگىنگە دەيىن نۇر-سۇلتان قالالىق № 2 بالالار اۋرۋحاناسىنىڭ جان ساقتاۋ بولىمىندە جاتقان بالانىڭ دارىگەرى ايدىن نۇرتاس ۇلىنىڭ سوزىنشە، اياننىڭ جۇرەگى 2 تامىزدا تاڭەرتەڭ توقتاعان.
24 ماۋسىمدا ارىستاعى اسكەري قارۋ-جاراق قويماسىندا جارىلىس بولىپ، ادامداردى ەۆاكۋاسيالاپ جاتقان كەزدە 8 جاسار ايان شارىپبەكتى كولىك قاعىپ كەتىپ، باسى جاراقاتتانعان ەدى. ءبۇلدىرشىندى 28 ماۋسىمدا ساناۆياسيامەن نۇر-سۇلتان قالاسىنا شۇعىل جەتكىزگەن. دارىگەرلەر وپەراسيا جاساپ، شەتەلدەن ماماندار شاقىرتىلعان.
اكەسى ەربول شارىپبەكتىڭ سوزىنشە، ءۇيدىڭ كەنجەسى ايان زەرەك ءارى پىسىق بالا بولعان. بۇعان دەيىن ازاتتىققا بەرگەن سۇقباتىندا ەربول شارىپبەك ارىس قالاسىنداعى جەدەل جاردەمنىڭ ۇلىنا دەر كەزىندە كومەك كورسەتپەگەنىن ايتقان.
ايان شارىپبەك – ارىستاعى اسكەري قويماداعى جارىلىس سالدارىنان ءومىرى قيىلعان ءتورتىنشى ادام. بۇعان دەيىن قازاقستان دەنساۋلىق ساقتاۋ مينيسترلىگى ءۇش ادام – ءبىر بەيبىت تۇرعان مەن ەكى اسكەري جان تاپسىرعانىن حابارلاعان. جارىلىستان سوڭ 400-دەن استام ازامات دارىگەر كومەگىنە جۇگىنگەن. تاعى 80 ادام ءتۇرلى جاراقاتپەن اۋرۋحاناعا جاتقىزىلعان.
اسەمگۇل مۇحيت قىزى
azattyq.org
پىكىر قالدىرۋ