ۇلتىمىزدىڭ №1ء-شى سپورت ءتۇرى سانالاتىن بوكس ونەرىندە بۇرىن الەمدەگى نەگىزگى قارسىلاستارىمىزدىڭ ءبىرى - الا تاقيالى كورشىمىزدەن كوبىنەسە باسىم ءتۇسىپ جۇرگەن قازاق بىلعارى قولعاپ شەبەرلەرى سوڭعى جىلدارى (شامامەن، 2015-2019)، وكىنىشكە وراي، بۇل باسەكەدە (وليمپيادا ويىندارى بولسىن، الەم، ازيا بىرىنشىلىكتەرى مەن ازيادالار بولسىن) ۇنەمى دەرلىك ولاردان كەمشىن تۇسەتىن «اۋرۋعا» ۇشىرادى. جانە دە مۇنداي جاعىمسىز جاعداي نەگىزىنەن ەرەسەكتەرىمىزگە ءتان بولىپ، ال جاستارىمىز تاۋىرلەۋ كورىنىپ جۇرسە، ەندى اتالمىش «اۋرۋ» ولاردى دا شارپىعانعا ۇقسايدى!

وزدەرىڭىز ويلاپ قاراڭىزدار: وسىدان بىرنەشە كۇن بۇرىن كۋۆەيتتە اياقتالعان كادەتتەر (مەكتەپ وقۋشىلارى) اراسىنداعى ازيا چەمپيوناتىندا قازاقتار وزبەكتەردەن قيراي جەڭىلدى! قيراماعان نەسى قالدى، ەگەر وزبەك-قازاق كەزدەسۋلەرىندە ەسەپ 8:1 بولسا!

ەگەر وزبەك سايتىنان الىنعان مالىمەتتەرگە سۇيەنە وتىرىپ (ءبىزدىڭ سايتتار قارىن اشىتىپ، بۇل چەمپيونات ناتيجەلەرىن ەشقانداي جۇيەسىز، تەك ءار جەرىنەن ءۇزىپ-جۇلىپ قانا بەردى)، ناقتىلاي ايتار بولساق، مىناداي فاكتىلەرگە كۋا بولامىز.

شيرەكفينال:
-35 كگ: حۋمويۋنميرزو ابدۋراسۋلوۆ — پاۆەل توكاريەۆ (كازاحستان) 5:0
-58 كگ: ابدۋلازيز ابدۋراحمانوۆ — ايدوس ماتايەۆ (كازاحستان) 5:0

جارتىلايفينال:
-40 كگ: فاررۋح تۋلاگانوۆ — امير سەيلحان (كازاحستان) 5:0
-43 كگ: ۋميديللو ابدۋراسۋلوۆ — باحتيار اناربايەۆ (كازاحستان) 3:2
-46 كگ: بوبۋربەك بوبوجونوۆ — دارحان نۋرجيگيت (كازاحستان) 5:0
-49 كگ: لازيزبەك تۋلكينوۆ — سۋلتان مولداش (كازاحستان) 5:0
-64 كگ: شاۆكاتجون بولتايەۆ — جاندوس ەرسۋلتانوۆ (كازاحستان) 5:0

فينال:
-61 كگ: ميرزوب نەكبويەۆ – ۆيكتور ليتۆينوۆ (كازاحستان) 5:0
-67 كگ: شاحبوز Ҳاميدۋللايەۆ – باتيرحان سەيتەنوۆ (كازاحستان) 1:4

مەدال ۇلەستىرەتىن كەزەڭدەرگە نازار اۋدارساق، جارتىلاي فينالعا وزبەكتەر بارلىق 14 سالماق بويىنشا قاتىسسا، قازاقتاردان 9 سالماقتا 10 بوكسشى قاتىستى (43 كگ. 2 بوكسشى)، ال فينالعا 12 وزبەك شىقسا، قازاقتاردان تەك 3 بوكسشى ءىلىندى.

چەمپيونات قورىتىندىسى:
وزبەكستان – 10 «التىن»، 2 «كۇمىس»، 2 «قولا».
قازاقستان – 2 «التىن»، 1 «كۇمىس»، 7 «قولا» 
(«التىندى» باتىرحان سەيتەنوۆتەن باسقا، +70 كگ سالماقتا ءۇندى بوكسشىسىن جەڭگەن ەردوس شارىپبەك الدى).

2020 جىلى توكيودا وليمپيادا ويىندارى وتەدى. نە جاسىراتىنى بار، مىنا قارقىنمەن قازاقتار وندا 2016 جىلعى ريو دە جانەيرو وليمپياداسى كورسەتكىشىنەن دە تومەندەپ كەتە مە دەگەن ءقاۋىپ مەن مۇندالايدى. ەستەرىڭىزگە سالا كەتەيىن: تاۋەلسىزدىك جىلدارى وتكەن بارلىق وليمپيادالاردا تەك جالعىز «التىن» العان وزبەكتەر ريودا ايدى اسپاننان ءبىر-اق شىعارىپ، 3 «التىن»، 2 «كۇمىس»، 2 «قولاعا» قول جەتكىزدى جانە جالپىكوماندالىق ەسەپتە كۋبالىقتاردىڭ ءوزىن ەكىنشى ورىنعا سىرعىتىپ، جەڭىمپاز اتاندى! ال، تاۋەلسىزدىك كەزىندە 6 «التىن» العان قازاقتار ريودا 1 «التىن»، 1 «كۇمىس»، 2 «قولانى» (بىرەۋى ايەلدەر بوكسىنان) مىسە تۇتتى.

ەگەر قازاق بوكسىنىڭ بولاشاعى – جاستاردىڭ جاعدايى جوعارىداعىداي دارەجەدە ناشارلاپ كەتكەنىن، سوڭعى جىلدارى قازاقستاندا ايەلدەر بوكسىنىڭ دا جاعدايى ءماز ەمەس ەكەنىن، ونىڭ ۇستىنە، ايبا پرەزيدەنتى بولا ءجۇرىپ، «مافيا مۇشەسى» دەگەن كۇدىككە ۇشىراعان وزبەك راحيموۆتىڭ كەسىرىنەن جالپى وليمپيادا باعدارلاماسىنان شىعىپ قالا جازداعان ەرلەر بوكسىنىڭ 10 سالماعىنان 8ء-ى عانا قالدىرىلعاندىقتان (ايەلدەر بوكسى 3 سالماقتان 5-كە كوبەيتىلدى) باسەكەلەستىكتىڭ اناعۇرلىم ارتا تۇسكەنىن ەسكەرسەك، قازاق بوكسىنىڭ باسىنا ۇيىرىلگەن ءقاۋىپ بۇلتى قويۋلانا تۇسەتىندەي بولىپ كورىنەدى. سول سەبەپتى، جامان ايتپاي جاقسى جوق دەگەندەي، دابىل قاعاتىن ءسات كەلگەن سياقتى.

مۇنداي جاعدايدا قازاقستاننىڭ مادەنيەت جانە سپورت مينيسترلىگى، بوكس فەدەراسياسى جانە باس قۇرامالاردىڭ جاتتىقتىرۋشىلار قاۋىمى نە ايتار ەكەن؟ بۇعان دەيىن مينيستر بولعان ارىستانبەك مۇحامەدي ۇلى (بۇرىنعى فاميلياسى الييەۆ) مادەنيەتتەن دە، سپورتتان دا ساۋاتسىزدىعى سالدارىنان بۇل ەكى سالانى دا كەرى كەتىرىپ، ونىڭ ۇستىنە ءتۇرلى جانجالداردان كوز اشپاي، «پورنومينيستر» اتاعىن السا، جۋىردا ونىڭ ورنىنا كەلگەن كومپوزيتور اقتوتى رايىمقۇلوۆانىڭ ازىرشە كوزگە تۇسكەن «جەتىستىگى» - ءوزىنىڭ ەشقانداي ۇعىم-تۇسىنىگى جوق قازاق تەرميندەرىنە قىرعيداي ءتيىپ، ولاردى قازاقشادان «ينتەرۇلتشىل» قالىپقا اۋىستىرۋ جوسپارى عانا. ال، ونىڭ سپورتتان ۇعىم-تۇسىنىگى، مەنىڭشە، ءتىپتى نولگە تەڭ.

سوندىقتان بار ءۇمىت تەك بوكس فەدەراسياسى مەن جاتتىقتىرۋشىلار قاۋىمىندا. بۇل تۇرعىدا، ارينە، ەڭ الدىمەن فەدەراسيا ءتوراعاسى تيمۋر قۇلىبايەۆتىڭ، بوكستان ەرلەر جانە ايەلدەر قۇرامالارىنىڭ باس باپكەرلەرى عالىم كەنجەبايەۆ پەن ەرىك العابەكتىڭ پىكرىلەرىن بىلگەن ارتىق بولماس ەدى...

جاسارال قۋانىشالين، فەيسبۋك پاراقشاسىنان